ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙުގެ މިޓޯކޭޑް ހުއްޓުވައި އިދިކޮޅު އެކްޓިވިސްޓުން މިދިޔަ ހޯމަ ދުވަހުގެ ރޭ ހިންގި ހަމަނުޖެހުންތަކާ ގުޅިގެން ރައީސްގެ ސަލާމަތީ ަކަންކަން ބެލެހެއްޓުމުގައި އެޙާލަތުގައި ފުލުހުންގެ އެއްވެސް ދައުރެއް އޮތްތޯއާއި ފުލުހުންގެ އެއްވެސް އިހުމާލެއް އެކަމުގައި އޮތް ބެލުމަށް ނޭޝަނަލް އިންޓެގްރިޓީ ކޮމިޝަން (އެންއައިސީ)އިން ތަޙުޤީޤެއް ފެށައިފިއެވެ.
އެ ކޮމިޝަނުން ކުރި ޓުވީޓެއްގައި ވަނީ މިމައްސަލަ އެންއައިސީން ތަހުގީގު ކުރާނީ އެކޮމިޝަނުގެ އަމިއްލަ އިސްނެގުމަކަށް ކަމަށެވެ. އަދި ބަލަމުންދަނީ ރައީސަށް އަރުވާ ސެކިއުރިޓީގައި ފުލުހުންގެ އެއްވެސް ދައުރެއް އޮތްތޯއާއި އެދުވަހުގެ ޙާދިސާގައި ފުލުހުންގެ އެއްވެސް އިހުމާލެއް އޮތްތޯކަމަށްވެސް އެންއައިސީން ވިދާޅުވެފައިވެވެ.
20 މާރިޗު 2023 ވަނަ ދުވަހުގެ ރޭ، ދިވެހިރާއްޖޭގެ ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހު ދަތުރުކުރެއްވި މޮޓޯކޭޑް އާއްމުންގެ ބަޔަކު ހުރަސް އަޅައި ހުއްޓުވި މައްސަލާގައި 1/2
— National Integrity Commision (@NIC_Maldives) March 22, 2023
އެންއައިސީން ކުރިއަށްގެންދާ ތަހުޤިޤުގެ މާބޮޑު ތަފްސީލެއް އެކޮމިޝަނުން ހާމައެއް ނުކުރައްވައެވެ. މިމައްސަލަ އެންއައިސީން ތަހުޤީޤުކުރިޔަސް ޢާންމުގޮތެއްގައި ރައީސުލްޖުމްހޫރިއްޔާގެ ސަލާމަތީ ކަންކަން ބެލެހެއްޓުމަކީ ސިފައިން ކުރާކަމެކެވެ. އަދި އެކަމުގައި ފުލުހުން ސީދާ އެއްވެސް ދައުރެއް އޮންނަކަމެއް މިހާތަނަށް އެނގިފައެއް ނުވެއެވެ.
ކޮންމެ ރެއަކުހެން އިދިކޮޅު ފަރާތްތަކުން މާލޭގެ މަގުތަކުގައި ކުރަމުންދާ މުޒާހަރާގެ ތެރެއަށް ރައީސްގެ މޮޓޯކޭޑް ވަނުނާއެކު މުޒާހަރާކުރަން އުޅުނު މީހުން މޮޓޯކޭޑު ހުއްޓުވައި ހަމަނުޖެހުން ހިންގިއެވެ. މިމައްސަލާގައި ސަލާމަތީ ބާރުތަކަށް ޢާންމުންގެ ފާޑުކިޔުން ވަނީ އަމާޒުވެފައެވެ.
ކޮމެންޓު ފޮނުވާ