ކުރިއަށް އޮތް ރިޔާސީ އިންތިޚާބުގައި ޖުމްހޫރީޕާޓީން ނެރޭ ކެނޑިޑޭޓަކާއިއެކު ކުރިއަށް ދިއުމުގެ ފެހި ސިގުނަލް ރައީސް ނަޝީދު ދެއްވައިފިއެވެ.
ޖުމްހޫރީ ޕާޓީގެ އޮފީހުގައި މިރޭ ރައީސް ނަޝީދުގެ ފަރާތްޕުޅުން ހަސަން ލަތީފާއި، އަމްރު އަދި ޖޭޕީގެ ފަރާތުން އަމީން އިބްރާހިމްއާއި، ރިޔާޒު ރަޝީދާއި، އަލީ ހުސެއިންގެ މެދުގައި ބޭއްވި މަޝަވްރާތަކަށްފަހު ނޫސްވެރިންނާއި ވާހަކަ ދައްކަވަމުން ހަސަން ލަތީފް ވިދާޅުވީ މިރޭގެ ބައްދަލުވުމަކީ ރައީސް ނަޝީދުގެ އެދިވަޑައިގެންވެމުގެ މަތީން ބޭއްވި މަޝްވަރާ ބައްދަލުވުމެއްކަމަށެވެ.
މިބައްދަލުވުމުގައި މަޝްވަރާ ކުރެވުނީ ޖޭޕީން ވާދަކުރައްވާނެކަމަށް ބެލެވޭ ޤާސިމް އިބްރާހިމް އާއިއެކު މަސައްކަތް ކުރުމަށް އެކުލަވާލަންޖެހޭ މެނިފެސްޓޯގެ ކަންކަމާއި ގުޅޭގޮތުން ކަމަށް ހަސަން ވިދާޅުވިއެވެ. އޭނާ ވިދާޅުވީ ޖޭޕީން ވާދަކުރާއިރު އެކީގައި މަސައްކަތް ކުރެވޭނެ ސިޔާސަތު ކަނޑައެޅުމަކީ އެންމެ މުހިންމު ކަންތައްކަމަށެވެ. ކޯލިޝަނެއްގެ ތެރެއިން މަސައްކަތް ކުރާއިރު އެންމެ މުހިންމު ކަމަކީ ދެފަރާތުން އެއްބަސްވާ ކަންމުގެ މައްޗަށް އެކުލެވޭ މެނިފެސްޓޯއެއް ހެދުންކަމަސް ހަސަން ވިދާޅުވިއެވެ.
ހަސަން ވިދާޅުވީ ކުރިއަށް އޮތް ހަފްތާގައިވެސް މިމަޝްވަރާތަކުގެ އިތުރު ބައްދަލުވުމެއް ކުރިއަށް ދާނެކަމަށެވެ. ހަސަންގެ ވާހަކަތަކުން ރައީސް ނަޝީދު ހުންނެވީ ޤާސިމާއިއެކު ރިޔާސީ އިންތިޚާބުގައި މަސައްކަތް ކުރައްވަންކަން ވަރަށް ބޮޑަށް ޔަގީން ކުރެވެއެވެ.
މިބައްދަލުވުމުގަިއ ވާހަކަ ދައްކަވަމުން ޖޭޕީގެ ނައިބް ލީޑަރު އަމީން އިބްރާހިމް ވިދާޅުވީ މިރޭގެ ބައްދަލުވުމުގައި އެކީގައި ކުރިއަށްދާނެ ގޮތްތަކާއި ކުރަން ހުރި މަސައްކަތްތަކާިއ ގުޅޭގޮތުން މަޝްވަރާ ކުރެވުނުކަމަށެވެ. ވެރިކަމަށް އަންނަނީ ރައްޔިތުން އެދޭފަދަ ކަންތައްތަކެއް ހާސިލް ކުރުމަށް ކަމަށްވާއިރު އެސިޔާސަތު އެކުލަވާލުމަކީ އެންމެ މުހިންމު މަސައްކަތެއްގެ ގޮތުގައި ދެކިގެން ކުރަމުންދާކަމަށް އަމީން ވިދާޅުވިއެވެ.
ރިޔާސީ އިންތިޚާބުގައި ޖޭޕީއާއި ރައީސް ނަޝީދަށް ތާއީދުކުރާ އެމްޑީޕީގެ މެމްބަރުން ކޯލިޝަން ހެދުމާއި ހަމައަށް ގޮސްފައިވާއިރު، އެމްޑީޕީން ދަނީ ރިޔާސީ އިންތިޚާބުގައި ރައީސް ޞާލިހުއަށް އިންތިޚާބު ކާމިޔާބު ކުރުމުގެ މަސައްކަތް ކުރަމުންނެވެ. އެމްޑީޕީއާއިއެކު މިހާތަނަށް ކޯލިޝަން ހަދާފައިވަނީ އަދާލަތާއި، އެމްޑީއޭއިންނެވެ.
