ޕްރެޒިޑެންޝަލް ގާރޑްސް ހިންގުން މޭޖަރ އިބްރާހިމް ހަލީމްއާއި ހަވާލުކޮށް، މޮޓޯކޭޑް މައްސަލަ ބެލުމަށް ޚާއްސަ ކޮމިޓީއެއް

ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ އިބުރާހިމް މުހައްމަދު ސާލިހު ދަތުރުކުރެއްވި މޮޓޯކޭޑަށް ބަޔަކު ހުރަސްއެޅުމާ ގުޅިގެން ހިނގާދިޔަ ކަންކަން ބެލުމަށް ދިވެހިރާއްޖޭގެ ޤައުމީ ދިފާޢީ ބާރުން ޚާއްޞަ ކޮމެޓީއެއް އެކުލަވާލާ، ޕްރެޒިޑެންސަލް ގާޑްސްގެ ކޮމާންޑިންގ އޮފިސަރގެ މަޤާމުގައި ހުންނެވި ކާނަލް ޢަބްދުﷲ އިބްރާހިމް މަޤާމުގެ މަސްޢޫލިއްޔަތާއި ޒިންމާތަކުން އެކަހެރި ކޮށްފައިވާކަމަށް އެމްއެމްޑީއެފްއިން ބުނެފިއެވެ.

އެމްއެންޑީއެފްއިން ދާދި ދެންމެއަކު ނެރުނު ނޫސް ބަޔާނެއްގައި ބުނެފައިވަނީ، ރައީސްގެ މޮޓޯކޭޑަށް ހުރަސްއެޅި މައްސަލަ ބެލުމަށް އުފައްދާފައިވާ ޚާއްސަ ކޮމިޓީއަކީ، ދިވެހިރާއްޖޭގެ ޤައުމީ ދިފާޢީ ބާރުގެ ލީޑަރޝިޕްގެ މަޝްވަރާގެ މަތިން ދިފާޢީ ވަޒީރު ޢަލްއުސްތާޛާ މާރިޔާ އަޙްމަދު ދީދީ އުފައްދަވާފައިވާ ކޮމެޓީއެކެވެ.

އަދި މި މައްސަލައާ ގުޅިގެން، މިފަދަކަމެއް ދިމާވުމުން އެމްއެންޑީއެފް ގައި ޢަމަލުކުރަމުން އަންނަ ޕުރޮސީޖަރތަކާއި އެއްގޮތްވާ ގޮތުގެ މަތިން، ޕްރެޒިޑެންސަލް ގާޑްސްގެ ކޮމާންޑިންގ އޮފިސަރގެ މަޤާމުގައި ހުންނެވި ކާނަލް ޢަބްދުﷲ އިބްރާހިމް މަޤާމުގެ މަސްޢޫލިއްޔަތާއި ޒިންމާތަކުން އެކަހެރިކޮށް، ޕްރެޒިޑެންސަލް ގާޑްސް ވަގުތީ ގޮތުން ހިންގެވުން މޭޖަރ އިބްރާހިމް ޙަލީމްއާ ޙަވާލު ކުރައްވާފައި ވާކަމަށްވެސް މި ބަޔާނުގައި ބުނެފައި ވެއެވެ.

ހަތިޔާރު އެޅި ސިފައިންނާއެކު އޮތް ރައީސް އިބްރާހީމް މުޙައްމަދު ޞާލިޙުގެ މޮޓޯކޭޑު ކުރިއަށް ދިޔަނުދީ އިދިކޮޅު އެކްޓިވިސްޓުން މޮޓޯކޭޑަށް ހުރަސް އަޅައި ހުއްޓުވާފައިވަނީ ރޭގެ ވަގުތެއްގައި މޮޓޯކޭޑް ބޮޑުތަކުރުފާނު މަގުން ދަތުރު ކުރަމުން ދަނިކޮށެވެ. ޕީޕިއެމް އޮފީސް ކައިރީ މުޒާހިރާ ކުރިޔަށް ދަނިކޮށް، ރައީސްގެ މޮޓޯކޭޑް އެސަރަހައްދު ދަތުރު ކުރީ ރޭ ހުޅުމާލޭގައި  އޮތް އަންހެނުންގެ ދުވަހުގެ ރަސްމީ ޖަލްސާއަށްފަހު އެބުރިވަޑައިގަތް މަގުމަތީގައެވެ.

ރައީސްގެ މޮޓޯކޭޑް ދަތުރުކުރަމުން ދިޔައީ މުލީއާގެއަށް ދިއުމަށެވެ. ރައީސް ޔާމީންގެ ގެކޮޅާއި ޕީޕީއެމް އޮފީސް ހުންނަ ސަރަޙައްދަށް މޮޓޯކެޑް އައުމާއެކު އިދިކޮޅު އެކްޓިވިސްޓުންވަނީ މުޒާހަރާކޮށް ރައީސް ޔާމީން މިނިވަންކުރަން ގޮވާލައި އަޑުގަދަކޮށްފައެވެ. އަދި ރައީސް ޞާލިޙުގެ އިސްތިއުފާއަށް ގޮވާ މޮޓޯކޭޑު ހުއްޓުވާފައިވެއެވެ.

ރޭގެ މުޒާހަރާގައިވެސް ނިސްބަތުން ތިބީ މަދު ބައެކެވެ. އެހެންނަމަވެސް އެމީހުން ކޮންޓްރޯލްކޮށް އެމަގުން ރައީސްގެ މޮޓޯކޭޑަށް ދެވޭގޮތެއް ނުވިއެވެ. މޮޓޯކޭޑާއެކު ދަތުރުކުރާއިރު ހަތިޔާރު އެޅި ސިފައިންވެސް ތިއްބެވެ. އެހެންނަމަވެސް މުޒާހިރާގެ ބައިވެރިން ރައީސަށް ހުރަސްއެޅުމާއެކު ރައީސްގެ މޮޓޯކޭޑުވަނީ އައިކޮޅަށް އަނބުރާލާފައެވެ.

ރައީސް ޔާމީން މިނިވަންކުރަން ގޮވާލާ ރޭ ކުރިމުޒާހަރާ އިން 20 މީހަކު ހައްޔަރު ކުރިކަމަށް ޕިޕީއެމްއިން ބުނެއެވެ.