އޮޅުވާލައިގެން ފައިސާ ހޯދާ މީހުން ހޯދުމަށް ފުލުހުން ކުރާ މަސައްކަތްތަކުގެ މައުލޫމާތު ރައްޔިތުންގެ މަޖިލީހުގެ އެސްއޯއީ ކޮމެޓީއާއި ހިއްސާކޮށްފިއެވެ.
ރައްޔިތުންގެ މަޖިލީހުގެ އެސްއޯއީ ކޮމެޓީއަށް ފުލުހުން ފޮނުވި ރިޕޯޓުގައިވާގޮތުން އެކަކުގެ ނަމުގައި 800 ސިމް ކާޑު ނަގާފައިވާއިރު، އޭގެ އިތުރުން 2 ބިދޭސީއެއްގެ ނަމުގައި 24000 ސިމް ކާޑު، 12 ބިދޭސީއެއްގެ ނަމުގައި 38000 ސިމް ކާޑު ނަގާފައިވާކަންވެސް ފުލުހުންގެ ރިޕޯޓުގައިވެއެވެ. މިޢާއެކު ޖުމްލަ 14 ބިދޭސީއެއްގެ ނަމުގައި 62000 ސިމް ކާޑު ނަގާފައިވާކަމަށް ފުލުހުންގެ ރިޕޯޓުގައި ބުނެފައި ވެއެވެ.
ފުލުހުންގެ ރިޕޯޓުގައިވާގޮތުން އޮޅުވާލައިގެން ފައިސާ ހޯދާ މައްސަލަތަކުގެ ތެރެއިން 305 ނަންބަރަކީ މާފުށީ ޖަލުގައި ތިބި ގައިދީން ބޭނުންކޮށްފައިވާ ނަންބަރުތަކެވެ. އަދި މިނަންބަރުތައް ބްލޮކް ކުރަން ފޮނުވާފައިވާކަމަށްވެސް ފުލުހުން ކޮމެޓީއަށް ފޮނުވި ރިޕޯޓުގައި ވަނީ ބުނެފައެވެ.
ރައްޔިތުންގެ މަޖިލީހުގެ އެސްއޯއީ ކޮމެޓީއަށް މޯލްޑިވްސް މަނިޓަރީ އޮޓޯރިޓީ، އެމްއެމްއޭއިންވެސް ވަނީ ރިޕޯޓެއް ހުށައަޅާފައެވެ. އެގޮތުން 2021 ވަނަ އަހަރު އޮޅުވާލައިގެން ފައިސާ ހޯދާ 686 މައްސަލަ ހުށައަޅާފައިވާކަމަށް އެރިޕޯޓުގައިވެއެވެ. އަދި 2022 ވަނަ އަހަރު 1459 މައްސަލަ، މިއަހަރުގެ މިހާތަނަށް 238 މައްސަލަ ހުށައަޅާފައިވާކަމަށްވެސް އެމްއެމްއޭގެ ރިޕޯޓުގައިވެއެވެ.
ކޮމެންޓު ފޮނުވާ