މިއަހަރު ބާއްވާ ރިޔާސީ އިންތިޚާބުގައި ސަރުކާރު ހިންގާ ކޯލިޝަންގައި ހިމެނޭ ޖުމްހޫރީ ޕާޓީއާއި، އެމްއާރުއެމްއިން ކޯލިޝަން ހެދުމާއި ގުޅޭގޮތުން މުހިންމު މަޝްވަރާ ބައްދަލުވުމެއް މިއަދު ބޭއްވުމަށް ހަމަޖެހިއްޖެއެވެ.

މިބައްދަލުވުން އޮތީ މިއަދު 12 ޖަހާއިރު ރައީސް މައުމޫންގެ އޮފީހުގައެވެ. މިބައްދަލުވުމުގައި އެމްއާރުއެމްގެ ޒައީމް މައުމޫނާއި، ރައީސް ފާރިސް މައުމޫންގެ އިތުރުން އެމްއާރުއެމްގެ އިސްބޭފުޅުން ބައިވެރިވުމަށް ވަނީ ހަމަޖެހިފައެވެ. އަދި ޖޭޕީގގެ ފަރާތުން ލީޑަރު ޤާސިމް އިބްރާހިމާއި، އެޕާޓީގެ އިސްބޭފުޅުންވެސް ބައިވެރިވުމަށް ވަނީ ހަމަޖެހިފައެވެ.

އެމްއާރުއެމްއިން ޖޭޕީއާއި މިއަދު މަޝްވަރާ ކުރާއިރު ރިޔާސީ އިންތިޚާބުގައި އެމްޑީޕީގެ ޓިކެޓުގައި ވާދަކުރައްވާ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު މޯލްޑިވްސް ރިފޯމް މޫވްމަންޓް، އެމް.އާރް.އެމްގެ އިސްބޭފުޅުންނާއި ބައްދަލުކުރައްވައި ކޯލިޝަން ހެދުމުގެ މަޝްވަރާތައް އިއްޔެ ވަނީ ކުރައްވާފައެވެ.

މިބައްދަލުވުމާއި ގުޅޭގޮތުން އެމް.އާރް.އެމްއިން ބުނީ ބައްދަލުވުމުގައި ކޯލިޝަން ހެދުމާއި މެދު ވަކި ގޮތެއް ނިންމިފައި ނުވާކަމަށެވެ. އެމްޑީޕީގެ ފަރާތުން އެޕާޓީގެ ޗެއާރޕާސަން ފައްޔާޒު އިސްމާއިލާއި، ޕާޓީގެ އެންމެ އިސްލީޑަރު ރައީސް އިބްރާހިމް މުޙައްމަދު ޞާލިޙު ބައިވެރިވެ ވަޑައިގެންނެވި މިބައްދަލުވުމުގައި ދެކެވުނު ވާހަތަކަށްފަހު އިތުރަށް މަޝްވަރާ ކުރުމަށް ވަނީ އެއްބަސްވެފައެވެ. ނަމަވެސް އިތުރު ބައްދަލުވުމެއް ބާއްވާނެ ވަކި ތާރީޚެއް ހާމަކޮށްފައި ނުވެއެވެ.

ސަރުކާރު ހިންގާ ކޯލިޝަންގައި ހިމެނޭ ޕާޓީތަކުގެ ތެރެއިން އަދާލަތު ޕާޓީން ވަނީ އެމް.ޑީ.ޕީއާއި ކޯލިޝަން ހަދަން ނިންމާފައެވެ. ޖުމްހޫރީ ޕާޓީން ނިންމާފައިވަނީ އެޕާޓީން ރިޔާސީ އިންތިޚާބުގައި ކެނޑިޑޭޓަކު ނެރޭގޮތަށެވެ.