އެމްޑީޕީީގެ ރައީސް މުހައްމަދު ނަޝީދު އިސްކޮށް ހުންވައިގެން އުފައްދަވާފައިވާ "ފިކުރެއްގެ ދިރުން" ޕާލިމަންޓްރީ ގްރޫޕުން ޖުމްހޫރީޕާޓީގެ ޕާލިމަންޓްރީ ގްރޫޕާއިއެކު ޖޮއިންޓް ޕާލިމަންޓްރީ ގްރޫޕެއް އުފެއްދުމަށް މަސައްކަތް ފަށައިފިއެވެ.
މިރޭ ބޭއްވި ފިކުރެއްގެ ދިރުމުގެ ޕާލިމަންޓްރީ ގްރޫޕްގެ ބައްދަލުވުމުގައި މަޖިލީހުގެ ނައިބް ރައީސް އީވާ ވިދާޅުވީ މިއީ މަޖިލީހުގައި ތިބި އެމްޑީޕީ ޕީޖީ މެމްބަރުންގެ ތެރެއިން ފިކުރެއްގެ ދިރުމަށް ތާއީދުކުރާ މެމްބަރުންނާއި، ޖުމްހޫރީ ޕާޓީއާއިއެކު ޖޮއިންޓް ޕާލިމަންޓްރީ ގްރޫޕެއް ހަދަން އެންމެ ރަނގަޅު ދަނޑިވަޅުކަމަށެވެ.
އެގޮތުން ޖޮއިންޓް ޕާލިމަންޓްރީ ގްރޫޕެއް ހެދުމަށްޓަކައި ޖޭޕީއާއިއެކު މަޝްވަރާ ކުރުމަށް ވަނީ ނިންމާފައެވެ. އިވާ ވިދާޅުވީ މިއީ އެކީގައި މަސައްކަތް ކުރުމަށް ލިބިގެންދާނެ ރަނގަޅު ފުރުސަތެއްކަމަށެވެ.
ފިކުރެއެއްގެ ދިރުމުގެ ހަރަކާތުގައި 13 ވަރަކަށް މެމްބަރުން ތިބިއިރު، މަޖިލީހުގައި ޖުމްހޫރީ ޕާޓީ ތަމްސީލް ކުރާ ތިން މެމްބަރުން ތިއްބަވައެވެ. މީގެ އިތުރުން މިނިވަން ގިނަ މެމްބަރުންގެ ވިސްނުންވެސް ހުރީ ސަރުކާރާއި ދެކޮޅަށެވެ.
މަޖިލީހަށް ރައީސް ނަޝީދުގެ ފިކުރެއްގެ ދިރުމުން ސަރުކާރު ޖަވާބުދާރީ ކުރުމަށް ކުރާ މަސައްކަތް ރައީސް ޞާލިހުގެ ފެކްޝަނުން ދަނީ ފެއިލް ކޮށްލަމުންނެވެ. ނަމަވެސް ޖޭޕީއާއި، ރައީސް ނަޝީދުގެ ފެކްޝަނާއި އިދިކޮޅު ޕީޕީއެމްޕީއެންސީގެ މެމްބަރުން އެއްވިސްނުމެއްގައި މަސައްކަތް ކޮށްފިނަމަ ސަރުކާރަށް ބައެއް ނިންމުންތައް ނިންމުމުގައި މަޖިލިސް ތެރެއިން އުދަނގޫތަކެއް ކުރިމަތިވާނެއެވެ.
