ސައުދީ އަރަބިއާއިން އެގައުމުގެ، ގައުމީ އާ އެއަރލައިނެއް އުފައްދަން ނިންމާފައިވާކަން ސައުދީ ވަލީއަހުދު މުހައްމަދު ބިން ސަލްމާން ބިން އަބުދުލް އަޒީޒު އިއުލާން ކުރައްވައިފިއެވެ.
"ރިޔާދު އެއަރ"ގެ ނަމުގައި އާ އެއަރލައިނެއް އުފެއްދުމަށް ނިންމާފައިވަނީ ސައުދީގެ ޕަބްލިކް އިންވެސްޓްމަންޓް ފަންޑު (PIF)އިން ކަމުގައި އެގައުމުގެ ރަސްމީ މީޑިއާ ކަމުގައިވާ ސައުދީ ޕްރެސް އޭޖެންސީ (SPA)އިން ރިޕޯޓު ކޮށްފައިވެއެވެ. މި އެއަރލައިންގެ ވެރިފަރާތަކީވެސް މި ފަންޑުކަމުގައިވެސް ވަނީ ހަމަޖައްސާފައެވެ.
ސައުދީ ވަލީއަހުދު މުހައްމަދު ބިން ސަލްމާންއަކީ އެގައުމުގެ ބޮޑުވަޒީރުގެ އިތުރުން ޕަބްލިކް އިންވެސްޓްމަންޓް ފަންޑު (PIF)ގެ ޗެއަރމަންވެސްމެއެވެ.
ސައުދީ އަރަބިއާއިން މުޅިން އަލަށް އުފައްދާ މި ގައުމީ އެއަރލައިންގެ އެންމެ އިސް ފަރާތެއްކަމުގައި ހަމަޖައްސާފައިވަނީ PIFގެ ގަވަރުނަރު ޔާސިރު އަލް-ރުމައްޔަން އެވެ. ސައުދީ ޕްރެސް އޭޖެންސީން ރިޕޯޓު ކޮށްފައިވާ ގޮތުގައި މި އެއަރލައިންގެ ސީނިއަރ މެނޭޖްމަންޓުގައި އެގައުމުގެ ތަޖުރިބާކާރުންގެ އިތުރުން ބައިނަލްއަގުވާމީ ތަޖުރިބާކާރުންވެސް ހިމެނޭނެއެވެ.
މި އެއަރލައިންގެ ސީއީއޯއަކަށް ހަމަޖައްސާފައިވަނީ، ދަތުރުފަތުރާއި ލޮޖިސްޓިކްސް އިންޑަސްޓްރީގެ 40 އަހަރުދުވަހު ތަޖުރިބާހުރި ޓޯބީ ޑޮގުލަސްއެވެ. އޭނާވަނީ ޔުއޭއީގެ އިއްތިހާދު އެއަރލއިންގެ އެންމެ އިސްވެރިޔާގެ މަގާމް 2018ވަނަ އަހަރުގެ ޖެނުއަރީން 2022 ވަނަ އަަހަރު އޮކްޓޯބަރުމަހުގެ ނިޔަލަށް އަދާކޮށްފައެވެ.
މިއައަރލައިންގެ ހެޑުކުއާޓަރު ހުންނާނީ ސައުދީގެ ވެރިރަށް ރިޔާދުގައެވެ. އަދި 2030 އަންނަންވާއިރަށް ދުނިޔޭގެ 100 މަންޒިލަކަށް ދަތުރު ކުރުންވަނީ މިއެއަރލައިންގެ ލަނޑުދަޑިއަކަށް ހަދާފައެވެ.
ސައުދީ އަރަބިއާއިން ހާމަ ކޮށްފައިވާ ގޮތުގައި، މިއީ ދުނިޔޭގެ އެންމެ މަތީ ފެންވަރުގެ އެއަރލައިނަކަށް ވުމުގެ އިތުރުން ތެލުން ލިބޭ އާމްދަނީ ނުހިމަނާ ސައުދީގެ ޖީޑީޕީއަށް 20 ބިލިއަން އެމެރިކާ ޑޮލަރުގެ ބޮޑު ކުރިއެރުމެއް މި އިންވެސްޓްމަންޓުން ގެނެސްދޭނެއެވެ. އަދި ސީދާ ގޮތުން 200،000 އަށްވުރެ ގިނަވަޒިފާ އުފެއްދިގެން ދާނެއެވެ.
