ޖާރމަނީގައި ކުރިޔަށްދިޔަ އައިޓީބީ ބާލިން 2023 ޓްރޭޑް ޝޯވގައި ދިވެހިރާއްޖެއިން ހުށަހަޅައިދިން ސަގާފީ ނެށުމަކަށް ގިނަ ބައެއްގެ ފާޑުކިއުން އަމާޒުވެއްޖެއެވެ.
ރައީސް ސާލިހިވެސް ޒިޔާރަތް ކުރެއްވި، މި މަހުގެ ހަތަކުން ނުވައަކަށް ޖަރުމަނުގެ ވެރިރަށުގައި ކުރިޔަށްދިޔަ، ފަތުރުވެރިކަން އިސްތިހާރު ކުރުމަށް ބޭއްވޭ ދުނިޔޭގެ އެންމެ ބޮޑު މި ފެއަރގައި ރާއްޖޭގެ ފަތުރުވެރިކަން އިސްތިހާރު ކުރުމަށް، އެމްއެމްޕީއާރުސީގެ އިތުރުން ރާއްޖޭގެ ފަތުރުވެރިކަމުގެ އިންޑަސްޓްރީގެ އިސް ގިނަ ވިޔަފާރަވެރިންވަނީ ބައިވެރި ވެފައެވެ.
މި ފެއަރގައި ގިނަ ބައެއްގެ ފާޑުކިޔުން އަމާޒުވެފައިވަމީ، ދިވެހި ދިގުހެދުން ލައިގެންނާއި އަދި ފޭލި އަދެގެން، ރާއްޖޭގެ ގުރޫޕަކުން ހުށަހަޅާދިން ނެށުމަކަށެވެ. މި ނެށުމުގައި ދިވެހި ލަވައަކަށް ނެށި ދިވެހި ނެށުންތެރިން ދައްކުވައި ދީފައިވަނީ، އާމުކޮށް ދިވެހި ނެށުންތަކުން ފެންނަ ހަރަކާތްތަކާއި ޚިލާފު، ދިވެހި އާރޓިސްޓުން ފަހަކަށް އައިސް ތައާރަފް ކޮށްފައިވާ ބާވަތުގެ ހަރަކާތްތަކެއްކަން ފާހަގަ ކޮށްލެވެއެވެ.
އަދި ނެށުމުގެ ވަކި ހިސާބަކުން ނަށާ ގުރޫޕުގެ ފިރިހެން ކުއްޖަކު، ދިވެހި އަންހެން ކުއްޖަކު އެކޮޅުކޮޅުން ނަގާ ކޮނޑަށް ލާތަންވެސް ފެނެއެވެ.
Hello @yumna_maumoon next time Plxx try Zumbā … https://t.co/7GXsa9nb1C
— 𝟒𝟐𝐧𝟑𝟑𝐦 𝟒𝟖𝐝𝐮 𝐑𝟒𝟓𝐡𝟑𝟑𝐝 (@42n33m) March 9, 2023
މި ނެށުމަށް ސޯޝަލް މީޑިއާގައި ފާޑު ކީ ބައެއް ފަރާތްތަކުން ފާހަގަ ކޮށްފައިވާ ގޮތުގައި މިއީ ދިވެހި ސަގާފަތާއި ގުޅުންނެތް، ދިވެހި ވަންތަކަން އެއްވެސް ފެންނާން ނެތް ނެށުމެކެވެ. އަދި ރާއްޖޭގެ ފަތުރުވެރިކަން އިސްތިހާރު ކުރުމަށް، މިފަދަ ފެއަރއެއްގައި ބައިވެރިވާ ދިވެހި ކޮންޓިންޖެންޓުން ދިވެހި ސަގާފަތާއި ބީރައްޓެހި ނެށުމެއް ހުށަހެޅުމަކީ، ރާއްޖޭގެ ސަގާފަތަށް "އެރުވި ހުތުރެއް"ގެ ގޮތުގައިވެސް ބައެއް ފަރާތްތަކުން މި ނެށުން ސިފަ ކޮށްފައި ވެއެވެ.
މި އަހަރުގެ އައިޓީބީ ބާލިން 2023ގަައި އެމްއެމްޕީއާރްސީގެ ވިޒިޓް މޯލްޑިވްސްގެ ސްޓޯލްގައި ފަތުރުވެރިކަމާއި ބެހޭ 82 ކުންފުންޏަކުން 200 އަށް ވުރެ ގިނަ މީހުން ބައިވެރިވެއެވެ.
މި ފެއާގައި ހުރި ރާއްޖޭގެ ސޮޓޯލްގައި ސަގާފީ ގްރޫޕުގެ ނެށުންތެރިން އެކި ދިވެހި ލަވަތަކައް ނެށުންތައް ތަމްސީލު ކޮށްފައި ވެއެވެ. އަދި ދިވެހި ޝެފުންގެ ޓީމުން ވަނީ ފެއަރއަށް ޒިޔާރަތްކުރާ އެކި ފަރާތްތަކަށް ދިވެހި ކާބޯތަކެތި ތައްޔާރު ކުރާ ގޮތް ލައިވް ސްޓޭޝަންގައި ދައްކުވައި ދީފައެވެ.
މި ފެއާގައި ތަމްސީލުކުރި ކުންފުނިތަކުގެ ތެރޭގައި ދުނިޔޭގެ އެކިކަންކޮޅުތަކުގެ ހޮޓާތަކާއި، ޓޫރިސްޓް ބޯޑުތަކާއި އަދި ޓުއާ އޮޕަރޭޓަރުން ހިމެނެއެވެ.
ކޮމެންޓު ފޮނުވާ