މިޔަންމާއިން ބޭރު ކޮށްފައިވާ މުސްލިމުންނަށް ބަންގްލާޑޭޝްގެ ދެކުނުގައި ގާއިމް ކޮށްފައިވާ ރެފިއުޖީ ކޭމްޕްގައި އަލިފާނުގެ ބޮޑު ހާދިސާއެއް ހިނގާ، ރެފިއުޖީ ކޭމްޕްގައި ދިރިއުޅެމުންދާ އެތައް ހާސް ބަޔަކު އަނެއްކާވެސް ގެދޮރު ނެތިއްޖެއެވެ.
މި ހާދިސާ ހިނގާފައިވަނީ، ކޯޒް ބާޒާރު ސަރަހައްދުގައި ގާއިމް ކޮށްފައިވާ މި ރެފިއުޖީ ކޭމްޕްގެ 11 ވަނަ ކޭމްޕްގައި ކަމަށް އޮފިޝަލުން މައުލޫމާތު ދީފައި ވެއެވެ. މި ސަރަހައްދުގައި، މިޔަންމާގެ މުސްލިމުންނާއި ދެކޮޅަށް އެގައުމުގެ އަސްކަރިއްޔާއިން 2017ވަނަ އަހަރު ހިންގި ލާއިންސާނީ ޖަރީމާތަކުގައި އެގައުމުން ބޭރު ކޮށްފައިވާ މިލިއަނެއްހާ މުސްލިމުން ދިރިއުޅެމުން ދެއެވެ.
"މި ހަދިސާގައި ލިބުނު ގެއްލުންތައް އަދި މިހާތަނަށް ވަޒަން ކުރެވިފައެއް ނުވޭ. އެހެންނަމަވެސް މި ހާދިސާގައި މީހަކަށް އަނިޔާ ވެފައިވާކަމުގެ މައުލޫމާތު އަދި ލިބިފައެއް ނުވޭ،" ކޯޒް ބާޒާރުގެ އެޑިޝަނަލް ޕޮލިސް ސުޕްރިންޑެންޓެއް ކަމުގައިވާ ރަފީގުލް އިސްލާ އަލްޖަޒީރާއަށް މައުލޫމާތު ދެއްވަމުން ވިދާޅުވެފައި ވެއެވެ.
ރަފީގުލް އިސްލާމް ވިދާޅުވެފައިވާ ގޮތުގައި މި އަލިފާން މިހާރު ވަނީ ނިއްވާލެވިފައެވެ.
ބަންގްލާދޭޝްގެ ޔޫއެން ރެފިއުޖީ އޭޖެންސީ UNHCR އިން ކޮށްފައިވާ ޓުވީޓެއްގައި ބުނެފައިވަނީ، އެ އޭޖެންސީގެ އެހީތެރިކަމުގައި، ރޮހިންގޔާ ރެފިއުޖީ ވޮލެންޓިއަރުން މި އަލިފާނުގެ ހާދިސާއާއި ގުޅިގެން ހަރަކާތްތެރި ވަމުންދާ ކަމަށާއި، އެ އޭޖެންސީއާއި ގުޅުންހުރި ފަރާތްތަކުން އެހީތެރިކަން ފޯރުކޮށްދެމުންދާ ކަމުގައެވެ. އަދި މި އަލިފާނުގެ ހާދިސާގައި އެތައް ތަނަކާއި، ގެދޮރު ނެތިގެން ގޮސްފައިވާކަމަށްވެސް އެ އޭޖެންސީން ބުނެފައި ވެއެވެ.
ޔޫއެންގެ ރެފިއުޖީ އެޖެންސީ، UNHCRއާއި އަދި ސޭވް ދަ ޗިލްޑްރެންއިން ހާމަކޮށްފައިވާ ގޮތުގައި، މިޔަންމާރއިން ބޭރުކޮށްފައިވާ އެގައުމުގެ ރޮހިންގްޔާ ދަރިކޮޅުގެ މުސްލިމުން ދިރިއުޅޭ ބަންގްލަދޭޝްގެ، ތޮށްޖެހިފައިވާ ކޯޒެސް ބާޒާރުގައި 1.2 މިލިއަނަށްވުރެ ގިނަ ރެފިއުޖީން ދިރިއުޅެމުން ދެއެވެ.
2016 ވަނަ އަހަރާއި 2017ވަނަ އަހަރު، މިޔަންމާގެ އަސްކަރިއްޔާއިންވަނީ، އެގައުމުގައި ދިރިއުޅެމުންދިޔަ ބައިމަދު، ރޮހިންގޔާ ދަރިކޮޅުގެ މުސްލިމުންނާއި ދެކޮޅަށް އިންސާނިއްޔަތާއި ޚިލާފު އެތަކެއް ޖަރީމާތަކެއް ހިންގާ، 740،000 އަށްވުރެ ގިނަ މުސްލިމުން އެގައު ދޫކޮށް ދިއުމަށް މަޖުބޫރު ކޮށްފައެވެ. މި ހުރިހާ ރެފިއުޖީން ހިޖުރަ ކޮށްފައިވަނި އަވައްޓެރި ބަންގްލަދޭޝަށެވެ.
މި ޖަރީމާތަކާއި ގުޅިގެން އިންސާނިއްޔަތާ ޚިލާފް ޖަރީމާތައް ހިންގުމުގެ ދައުވާ އެގައުމުގެ ސަރުކާރާ ދެކޮޅަށް ބައިނަލް އަގުވާމީ ޖިނާޢީ ކޯޓުގައި ވަނީ އުފުލިފައެވެ. އަދި މި ދައުވާއިން އެގައުމުގެ އަސްކަރިއްޔާ ދިފާޢުކުރުމަށް، މިހާރު އަސްކަރީ ސަރުކާރުން ހައްޔަރުކޮށްފައިވާ އަންސަންގ ސޫކީ ބަައިނަލް އަގުވާމީ ކޯޓަށް ވަަޑައިގެން ވަކާލާތު ކޮށްފައި ވެއެވެ.
