މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ)އިން ތަރައްޤީކުރަން ނިންމާފައިވާ 230 އެނދުގެ ރިސޯޓުގެ މަސައްކަތް މިއަހަރު ފަށާނެކަމަށް އެކުންފުނިން ހާމަކޮށްފިއެވެ.
ދައުލަތުގެ މީޑިއާގައި ވާހަކަދައްކަވަމުން އެމްޓީޑީސީގެ މެނޭޖިންޑިރެކްޓަރ ތަޒްމީލް ޢަބްދުއްސަމަދު ވިދާޅުވީ މިއީ އެކުންފުނިން މިހާރު އެންމެ އިސްކަމެއްދޭ އެއް މަސައްކަތްކަމަށެވެ. މިހާރު ކުރިއަށްދަނީ ރިސޯޓުތައް ތަރައްޤީކުރާނެ ވަކި އަތޮޅެއް ކަނޑައެޅުމުގެ މަސައްކަތްކަމަށްވެސް އޭނާ ވިދާޅުވިއެވެ. އެކި ސަބަބަބުތަކާއި ހުރެ ތަރައްޤީނުކުރެވި ހުރި އެތައް ރަށެއް މެދު ރާއްޖެ ތެރޭގައި އެބަހުރިކަމަށާ، އޭގެތެރެއިން ހެޑް ހަންޓްކޮށްގެން މިސަރައްހައްދުން އެމްޓީޑީސީން ތަރައްޤީކުރެވޭނެ ރަށްތަކުގެ އޯނަރުންނާއި މަޝްވަރާކުރަމުން ދާކަމަށް ތަޒަމީލް ވިދާޅުވިއެވެ. އަދި މިހާރު ބަލަމުންދާ އަތޮޅުތަކުގެ ތެރޭގައި އދ. މ. ރ. އަދި މާލެ އަތޮޅުގެ ރަށްތައް ހިމެނޭކަމަށްވެސް ޕީއެސްއެމްގައި ވާހަކަދައްކަވަމުން ތަޒްމީލް ވިދާޅުވިއެވެ. އޭނާ ވިދާޅުވީ ވަރަށް އަވަހަށް އެރިސޯޓް ތަރައްޤީކުރުމުގެ އަމަލީ މަސައްކަތް ފެށޭނެކަމަށެވެ.
އެމްޓީޑީސީއަކީ 2006ވަނަ އަހަރު ސަރުކާރުން އުފެއްދި ކުންފުންޏެކެވެ.
