ރައީސް ޞާލިހުގެ ފަރާތްޕުޅުން ޖުުމްހޫރީ ޕާޓީގެ ލީޑަރު ޤާސިމް އިބްރާހިމް އަނބިކަނބަލުން އަދި ޓްރާސްޕޯޓް މިނިސްޓަރ އައިޝަތު ނަހުލާއާއި ބައްދަލުކޮށްފިއެވެ.
މިނިސްޓަރ ނަހުލާއާއި ބައްދަލު ކުރެއްވި ދެ މަންދޫބުންނަކީ މިހަފްތާގެ ކުރީކޮޅު ޖޭޕީގެ ލީޑަރު ޤާސިމް އިބްރާހިމްއާއި ވެސް ބައްދަލު ކުރެއްވި އެމްޑީޕީގެ ޕީޖީ ލީޑަރު މުހައްމަދު އަސްލަމާއި، ރައީސްގެ ކޮއްކޮ ހުޅުމާލެ ދާއިރާގެ މެމްބަރު އަލީ ނިޔާޒެވެ. ޤާސިމާއި އެކު ބޭއްވި ބައްދަލުވުމަށްފަހު އަސްލަމް ވިދާޅުވީ އެއީ ވަރަށް ކާމިޔާބު އަދި އުންމީދީ ބައްދަލުވުމެއްކަމަށެވެ.
މިބައްދަލުވުން އޮތީ މީގެ ކުޑައިރުކޮޅެއް ކުރިން މ.ކުނޫޒުގައެވެ. މިބައްދަލުވުމުގައި ދެކެވުނު ވާހަތަކެއް އަދި މީޑިއާއާއި ހިއްސާކޮށްފައި ނުވެއެވެ. ޖުމްހޫރީ ޕާޓީގެ އެހީތެރިކަން ރިޔާސީ އިންތިޚާބުގައި ހޯދުމަށް އެމްޑީޕީގެ ރައީސް ޞާލިހަށް ތާއީދު ކުރައްވާ ބޭފުޅުން ކުރައްވަމުންދާއިރު، މިހާތަނަށް އަދި ޖުމްހޫރީ ޕާޓީން ނިންމާނެ ގޮތެއް ހާމަކޮށްފައި ނުވެއެވެ.
އެމްޑީޕީއާ އެކު އެއްބުރުން ރިޔާސީ އިންތިހާބު ކާމިޔާބުކުރުމުގެ މަޝްވަރާ އަށް އެދިވަޑައިގެން ސިޔާސީ ޕާޓީތަކަށް ރައީސް ފޮނުއްވި ސިޓީފުޅާ މެދު މަޝްވަރާ ކުރުމަށް، މި ސަރުކާރުގެ ކޯލިޝަންގައި މިހާރު ވެސް ހިމެނޭ އަދާލަތު ޕާޓީގެ ބައްދަލުވުމެއް އިއްޔެ ވަނީ ބާއްވައިފައެވެ.
ރައީސްގެ ސިޓީފުޅު، އަދާލަތު ޕާޓީގެ އިތުރުން، ޖުމްހޫރީ ޕާޓީ އާއި ކުރީގެ ރައީސް މައުމޫން އަބްދުލްގައްޔޫމްގެ އެމްއާރުއެމަށް ވެސް ވަނީ ފޮނުއްވައިފައެވެ. ނަމަވެސް، އެ ޕާޓީތަކުން އަދި ވަކި ގޮތެއް ނުނިންމައެވެ. އެކަމަކު، ޖުމްހޫރީ ޕާޓީން އަންނަ ހުކުރާއި ހޮނިހިރު ދުވަހު ބާއްވާ އެ ޕާޓީގެ ކޮންގްރެސް ގައި އިންތިހާބާ ގުޅޭ މުހިއްމު ނިންމުންތައް ނިންމާނެ ކަމަށް ބެލެވެއެވެ.
