އދ.މަންދޫއަށް ދިމާވެފައިވާ ލަފާފުރުމުގެ ދަތިތަކަށް ހައްލު ގެނައުމަށް އެރަށުގެ ބަނދަރު ތަރައްޤީ ކުރުމަށް ކުރަމުންދާ މަސައްކަތް ނިމުމަކާއި ގާތަށް ހިނގައްޖެއެވެ.
އދ މަންދޫއަކީ މީގެ ކުރިން ބަނދަރެއް ނެތް ރަށެކެވެ. އެރަށު މީހުން ބަނދަރެއްގެ ގޮތުގައި ބޭނުން ކުރަނީ ގުދުރަތީގޮތުން ހެދިފައި އޮންނަ ބަނދަރެކެވެ. އަދި އެބަނދަރަށް އުޅަނދުތައް ކައިރިކޮށް މީހުން ފޭބުމަށް އޮންނަނީ ފާލަމެކެވެ. އެވެސް އާންމު ފަރާތަކުން އެރަށުގައި ހަދާފައި އޮންނަ ފާލަމެކެވެ.
މަންދޫގައި ސަރުކާރުން ތަަރައްޤީ ކުރަނީ 700 ފޫޓް ދިގު 300 ފުޅާ ބަނދަރެކެވެ. މި ބަނދަރުގެ މަސައްކަތް ކުރަމުންދަނީ އެމްޓީސީސީންނެވެ. އެކުންފުނިން ބުނީ މަންދޫ ބަނދަރު ތަރައްޤީ ކުރުމުގެ މަޝްރޫޢުގެ 73 އިންސައްތަ ނިމިފައިވާކަމަށެވެ. އެގޮތުން، އެއްގަމުތޮށި ލުމުގެ މަސައްކަތް މިހާރު ވަނީ ނިމިފައެވެ. އަދި، ހާބަރ ޕޭވްމެންޓް ހެދުމުގެ މަސައްކަތުގެ 44 އިންސައްތަ މިހާރު ވަނީ ނިންމާލާފައެވެ.
Work on design and build of Adh. Mandhoo Harbor Development Project is currently underway with overall 73% project progress. Quay wall construction work has been completed, and harbor pavement installation work is currently ongoing at the site.#MTCCProjects #RayyithungeKunfuni pic.twitter.com/nqD1bHxDuI
— MTCC Plc (@MTCCPlc) February 20, 2023
މަންދޫ ބަނދަރު ތަރައްޤީ ކުރުމުގެ މިމަޝްރޫޢުގެ މަސައްކަތުގެ ތެރޭގައި 65,854 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 236 މީޓަރުގެ ސަރަޙައްދެއްގައި އެއްގަމުތޮށި ލުމާއި، 319 މީޓަރުގެ ސަރަޙައްދެއްގައި ބޭރުތޮށި ލުމާއި، 71 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، 50 މީޓަރުގެ ސަރަޙައްދެއްގައި ގްރޮއިން ޖެހުމުގެ މަސައްކަތް ހިމެނޭ. އަދި ބަނދަރު ބައްތި އާއި ނެރު ބައްތި ހަރުކުރުމާއި، 1180 އަކަ މީޓަރުގެ ސަރަޙައްދެއްގައި ޕޭވްމަންޓް ހެދުމުގެ މަސައްކަތްވެސް ހިމެނެއެވެ.
ބަނދަރެއް ނެތް މަންދޫ ރައްޔިތުން މިހާރު ކުރާ އެންމެ ބޮޑު އުންމީދަކީ ސަރުކާރުން އެރަށުގައި ތަރައްޤީ ކުރާ ބަނދަރުނިމި އެއުފާ ރައްޔިތުނަށް ލިބުމެވެ. އެރަށުގައި ތަރައްޤީ ކުރާ ބަނދަރު ހަދަނީ އެރަށުގެ ރީތި ހިތްގައިމު ގޮނދުޑޮށް ނުގެއްލޭނެހެންނެވެ. މިމަޝްރޫއުގެ އަގަކީ 31.08 މިލިއަން ރުފިޔާއެވެ.
ކޮމެންޓު ފޮނުވާ