ރައީސުލްޖުމްހޫރިއްޔާ އިބުރާހިމް މުހައްމަދު ސާލިހުގެ ޚާއްސަ ވަފުދެއް، ޖުމުހޫރީ ޕާޓީގެ ލީޑަރ ގާސިމް އިބުރާހިމްއާއި ބައްދަލު ކުރައްވައިފިއެވެ.
ރޭގެ ވަގުތެއްގައި ސަން އައިލެންްޑް ރިސޯޓުގައި، ރައީސް ސާލިހުގެ ފަރާތުން ގާސިމް އިބުރާހިމްއާއި ބައްދަލު ކުރައްވާފައިވަނީ، އެމްޑީޕީގެ ޕާލަމެންޓްރީ ގުރޫޕުގެ ލީޑަރު، އައްޑޫ ހިތަދޫ އުތުރު ދާއިރާގެ މެންބަރު މުހައްމަދު އަސްލަމްއާއި ހުޅުމާލެ ދާއިރާގެ މެމްބަރު އަލީ ނިޔާޒުއެވެ.
މި ބައްދަލު ކުރެއްވުމުގައި މަޝްވަރާ ކުރެވުނީ، ކުރިޔަށް އޮތް ރިޔާސީ އިންތިޚާބުގައި ރައީސް ސާލިހުއާއި ޖުމްހޫރީ ޕާޓީން ކޯލިޝަން ހެދުމާއި ގުޅޭގޮތުން ކަމަށް މައުލޫމާތު ލިބިފައިވެއެވެ. އެހެންނަމަވެސް އެއްވެސް ކަމަކާއި ގުޅޭގޮތުން މި ބައްދަލުވުމުގައި އެއްބަސްވެފައިވާކަމުގެ މައުލޫމާތެއް އަދި މިހާތަނަށް ލިބިފައެއް ނުވެއެވެ.
ރައީސް ސާލިހުގެ ވަފުދަލުން ގާސިމްއާއި ބައްދަލު ކޮށްފައިވާއިރު، ފާއިތުވެދިޔަ ހަފްތާފައި އެމްޑީޕީގެ ގައުމީ މަޖިލިހުންވަނީ ކުރިޔަށް އޮތް ރިޔާސީ އިންތިޚާބަށް އަމާޒުކޮށް ކޯލިޝަން ހެދުމަށް ކުރިޔަށް ގެންދާންޖެހޭ މަޝްވަރާތައް ކުރިޔަށް ގެންދިއުމުގެ ހުރިހާ ބާރެއް ރައީސް ސާލިހަށް ދީފައެވެ.
އަދި ރައީސް ސާލިހު ވިދާޅުވަމުން ގެންދަވަނީ 2023ގެ ރިޔާސީ އިންތިޚާބުގައިވެސް ވާދަކުރައްވާނީ ކޯލިޝަންއާކަމަށާއި، އެއްވެސް ސިޔާސީ ލީޑަރަކަށް އެ އިންތިޚާބު ގިނިކަންޏާ ކާމިޔާބު ނުކުރެއްވޭނެ ކަމުގައެވެ.
އެހެންނަމަވެސް ރާއްޖޭގެ ސިޔާސީ މަސްރަހުގެ އެއްވެސް ޕާޓީއަކުން އަދި މިހާތަނަށް ރައީސް ސާލިހާއެކީ ކޯލިޝަން ހަދާނޭކަމަށް އަދި ބުނެފައެއް ނުވެއެވެ.
ކޮމެންޓު ފޮނުވާ