ޚިޔާތު ތަފާތުވެ ދެބައިވެފައިވާ އެމްޑީޕީގެ ރައީސް މުޙައްމަދު ނަޝީދު ޕާޓީގެ ރައީސްކަމުގެ މަޤާމުން އިސްތިއުފާދެއްވުމަށް ރައްޔިތުންގެ މަޖިލީހުގެ ދުވާފަރު ދާއިރާގެ މެމްބަރު އިސމާޢީލް އަޙްމަދު ގޮވާލައްވައިފިއެވެ.

އިސްމާޢީލަކީ ފަހަކަށްއައިސް ނަޝީދަށް ވަރަށްބޮޑަށް ފާޑުވިދާޅުވާ އެމްޑީޕީގެ މެމްބަރެކެވެ. އިސްމާޢީލް ނިސްބަތްވަނީ އެމްޑީޕީގެ އިސްލިޑަރު އަދި ރިޔާސީ ކެންޑިޑޭޓު ރައީސް ޞާލިޙުގެ ފެކްޝަނަށެވެ. އޭނާ މިހެން ވިދާޅުވީ އެމްޑީޕީގެ ރިޔާސީ ޕްރައިމެރީގެ ދުވަސްވަރު، ޕްރައިމެރީން ބަލިވެއްޖެނަމަ ހައްދަވާނީ ކިހިނެއްތޯ މީޑިއާއިން ސުވާލުކުރުމުން ބަލިވެއްޖެނަމަ އޮންނާނީ ގޭގައިކަަމަށް ނަޝީދު ވިދަޅުވި ވާހައާ ގުޅޭގޮތުން އޮންލައިން ނޫހެއްގައި ލިޔެފައިވާ ޚަބަރެއް ޝެއަރކުރެއްވުމަށްފަހުއެވެ.

މިދިޔަ މަހުގެ 28ވަނަ ދުވަހު އޮތް އެމްޑީޕީގެ ރިޔާސީ ޕްރައިމެރީން ލިބިވަޑައިގެންނެވި ނާކާމިޔާބީއަށްފަހު ނަޝީދު އެމްޑީޕީގެ މައި ޙަރަކާތްތަކުން ނުފެނެއެވެ. އެހެންނަމަވެސް "ފިކުރެއްގެ ދިރުން"ގެ ނަމުގައި ވަކި ގޮތްޕެއް ހަދަން ހިންގާ ހަރަކާތުން ފެނެއެވެ. "ފިކުރެއްގެ ދިރުން" ސްލޯގަން އަކީ ޕްރައިމެރީގައި ނަޝީދު ބޭނުންކުރެއްވި ސްލޯގަންއެވެ. އޭނާގެ އަމާޒަކީ އެފިކުރަށް ހަދާ ގޮތްޕަށް ފަންސާސް ހާސް މެމްބަރުން ހަމަކުރުމެވެ.

ރައީސް ޞާލިޙަށް ރިޔާސީ ޓިކެޓު ޙަވާލުކުރަން ކާނިވާ ސަރަޙައްދުގައި ބޭއްވި ބޮޑު ޖަލްސާއަށްވެސް ނަޝީދު ވަޑައެއް ނުގަންނަވައެވެ. އަދި ނަޝީދު ފެކްޝަނުގެ މެމްބަރުންވެސް ނުދެއެވެ. މިކަމާ ގުޅިގެން މެމްބަރު އިސްމާޢީލް ވިދާޅުވީ އަސާސީގަވާއިދު ލާޒިމްކުރާ ނިންމުމެއް އާއްމު މެމްބަރުން ނިކުމެ ވަކިގޮތަކަށް ނިންމައި އެނިންމުމާއި ގުޅިގެން ޕާޓީން އިންތިޒާމްކުރާ ހަރަކާތްތަކުގައި ބައިވެރިނުވެ، ބޮޑާހާކާ މީހުން ޕާޓީގެ އިސްމަގާމުތަކުގައި ތިބުމަކީ ލަދުވެތިކަމެއްކަމަށެވެ. އެހެންކަމުން ރީތި ގޮތަކީ އަވަހަށް އަމިއްލައަށް އެއްފަރާތްވުންކަމަށެވެ. 

އަސާސީގަވާއިދު ލާޒިމްކުރާ ނިންމުމެއް އާއްމު މެމްބަރުން ނިކުމެ ވަކިގޮތަކަށް ނިންމާ، އެނިންމުމާއި ގުޅިގެން ޕާޓީން އިންތިޒާމްކުރާ ހަރަކާތްތަކުގައި ބައިވެރިނުވެ، ބޮޑާހާކާ މީހުން ޕާޓީގެ އިސްމަގާމުތަކުގައި ތިބުމަކީ ލަދުވެތިކަމެއް🤦‍♂️
ރީތި ގޮތަކީ އަވަހަށް އަމިއްލައަށް އެއްފަރާތްވުން! pic.twitter.com/zyuEZQOGwy

— Ismail Ahmed (@N4Isse11) February 18, 2023

އިސްމާޢީލްގެ ޓްވީޓަށް ރައްދުދެއްވައި އެސްޓީއޯގެ މެނޭޖިން ޑިރެކްޓަރ ޙުސައިން އަމްރު ވަނީ ޓްވީޓެއް ކުރައްވާފައެވެ. އަމްރު ވަނީ މިމޭރުމުން ވާހަަކަތައް ހުންނަނަމަ ވޯޓު އިތުރުކުރާނީ ކިހިނެއްތޯ ސުވަލުކުރައްވާފައެވެ.

މި ގޮތަށް ވާހަކަތައް ހުންނަކަމަށް ވާނަމަ ވޯޓް އިތުރުކުރާނީ ކިހިނެއްތޯ؟ https://t.co/mbGPZFUJ1R

— Amr 🎈 (@HusenAmr) February 18, 2023

ރިޔާސީ ޕްރައިމެރީގައި ރައީސް ނަޝީދަށް ވޯޓުދިން މީހުންނާއި އިތުރު އެތައްބައެއްގެ ވޯޓާ ނުލައި ކުރިއަށް އޮތް ރިޔާސީ އިންތިޚާބު ރައީސް ޞާލިޙަށް ކާމިޔާބު ނުވާނެކަމަށް ނަޝީދުގެ ފެކްޝަނުން ބުނެއެވެ.

ރައީސް ޞާލިޙުވަނީ ޚިޔާލުތަފާތުވުންތައް އެއްފަރާތްކޮށް އަލުން މުޅި އެމްޑީޕީ އެކުގައި މަސައްކަތް ކުރަން ގޮވާލައްވާފައެވެ. އަދި ނަޝީދަށް ދަޢުވަތުވެސް ދެއްވާފައެވެ. ރައީސް ޞާލިޙުގެ ކެމްޕެއިނުން ބުނެފައިވަނީ ޕްރައިމެރީއަށްވުރެ މާ ފަސޭހަކަމާއެކު އެއް ބުރުން ރިޔާސީ އިންތިޚާބު ކާމިޔާބުކުރެވޭނެކަމަށެވެ.