އިޓަލީގެ ކްރޫޒްލައިނާއެއްކަމަށްވާ "ކޮސްޓަރ ޑެލިޒިއޯސާ" މާލެއަށް ބަނދަރުކޮށްފިއެވެ.
މި ކްރޫޒްލައިން މާލެއަށް ބަނދަރުކޮށްފައިވަނީ މިއަދުގެ ހެނދުނުގެ ވަގުތެއްގައިއެވެ. ކޮސްޓަރ ޑެލިޒިއޯސާގައި 1620 ފަތުރުވެރިން މާލެއަށް އައިސްފައިވާއިރު، އެ މީހުންނާއެކު 800 ކްރޫ ނުވަތަ ފަޅުވެރިންވެސް މިކްރޫޒްލައިނާއިން ރާއްޖެއައިސްފައިވެއެވެ.
ކޮސްޓަރ ޑެލިޒިއޯސާ އަކީ އެކުންފުނީގެ 5 ވަނައަށް އެންމެ ބޮޑު އުޅަނދެވެ. މިއީ 92720 ޓަނުގެ ކްރޫޒްލައިނާއެކެވެ. ދިގުމިނުގައި 294 މީޓަރު ހުރެއެވެ. އަދި މިއީ ގާތްގަނޑަކަށް 670 މިލިއަން ޑޮލަރުގެ އަގުހުރި ކްރޫޒްލައިނާއެކެވެ. މިކްރޫޒްލައިނާއަކީ 3000 މީހުންގެ ޖާގައިގެ ބޯޓެކެވެ.
މިކްރޫޒްލައިނާ ރާއްޖެ އައިސްފައިވަނީ އެލައަންސް މެނޭޖްމަންޓް ސަރވިސަސް ކޮމްޕެނިީ، އޭ.އެމް.އެސް.ސީގެ އެޖެންޓުކަމުގެ ދަށުންކަމަށް މަޢުލޫމާތުލިބިފައިވެއެވެ.
1620 ފަތުރުވެރިންނާއެކު މިކްރޫޒްލައިނާ ރާއްޖެ އައިސްފައިވަނީ އިންޑިއާއިންނެވެ. އަދި އޭގެ ތެރޭގައި އެކި ޤައުމުތަކުގެ ފަތުރުވެރިން ހިމެނޭކަމަށް މަޢުލޫމާތުލިބިފައިވެއެވެ.
މި ކްރޫޒްލައިނާއިން އައި ގިނަ އަދަދެއްގެ ފަތުރުވެރިން ރިސޯޓްތަކަށް ގޮސްފައިވާއިރު، ބައެއް ފަތުރުވެރިން މާލޭގެ އެކި ތަންތަން ބަލާލުމަށް ވަނީ ޒިޔާރަތްކޮށްފައެވެ. މިކްރޫޒްލައިނާ މާލޭގައި މަޑުކުރުމަށް ހަމަޖެހިފައިވަނީ 2 ދުވަހުއެވެ.
1620 ފަތުރުވެރިންނާއިއެކު ބޮޑު ކްރޫޒްލައިނާއެއް ރާއްޖެ އައިސްފައިވާއިިރު މިދިޔަ މަހުވެސް ވަނީ 1000 އަށްވުރެ ގިނަ ފަތުރުވެރިންނާއިއެކު ކްރޫޒްލައިނާއެއް މާލެއަށް ބަނދަރުކޮށްފައިއެވެ. މިއީ ޖަރުމަނުގެ ކްރޫޒް ލައިނާއެއް ކަމަށްވާ "އެމްއެސް އާރްޓާނިއާ" އެވެ. މިކްރޫޒްލައިނާ ވަނީ އައްޑޫ ސިޓީއަށްވެސް ދަތުރުކޮށްފައިއެވެ.
މަޢުލޫމާތު ލިބޭ ގޮތުގައި މިއަހަރުގެ ތެރޭގައި 9 ކްރޫޒްލައިނާއަކުން ރާއްޖެއަށް ދަތުރުކުރުމަށް ވަނީ ހަމަޖެހިފައެވެ.
މިފަހަރު އައިސްފައިވާ ކްރޫޒްލައިނާތަކަކީ މިދިޔަ އަހަރު ރާއްޖެއައި ކްރޫޒްލައިނާތަކަށް ވުރެ ބޮޑު ކްރޫޒްލައިނާތަކެއްކަން ފާހަގަކޮށްލެވެއެވެ. އެގޮތުން، 2826 މީހުންގެ ޖާގައިގެ ކްރޫޒްލައިނާއަކާއި 2050 މީހުންގެ ޖާގައިގެ ކްރޫޒްލައިނާއެއް ރާއްޖެއަށް އައުމަށް ވަނީ ހަމަޖެހިފައިއެވެ. އަދި 1000 އާއި 1500 މީހުންގެ ޖާގައިގެ 4 ކްރޫޒްލައިނާއެއްގެ އިތުރުން، 300 އާއި 700 މީހުންގެ ޖާގައިގެ 3 ކްރޫޒްލައިނާވެސް ރާއްޖެއަށް ދަތުރުކުރުމަށް ހަމަޖެހިފައިވެއެވެ.
މިދުވަސްވަރަކީ ގިނަ އަދަދެއްގެ ފަތުރުވެރިން ކަނޑުގެ މަގުންނާއި ވައިގެ މަގުން ރާއްޖެއަށް ޒިޔާރަތްކުރާ ދުވަސްވަރެކެވެ. ޓުރިޒަމް މިނިސްޓްރީގެ ތަފާސްހިސާބުތަކުން ދައްކާގޮތުގައި މި ނިމުނު ޖަނަވަރީމަހު ރާއްޖެއަށް 172535 (އެއް ލައްކަ ހަތްދިހަ ދެ ހާސް ފަސް ސަތޭކަ ތިރީސް ފަހެއް) ފަތުރުވެރިންވަނީ ޒިޔާރަތްކޮށްފައެވެ.
މި ޢަދަދަކީ މިދިޔަ އަހަރު އަހަރުގެ ޖެނުއަރީމަހު ރާއްޖެއަށް ޒިޔާރަތްކޮށްފައިވާ 131762 (އެއް ލައްކަ ތިރީސް އެއް ހާސް ހަތް ސަތޭކަ ފަސްދޮޅަސް ދޭއް) ފަތުރުވެރިންނާއި އަޅާ ބަލާއިރު، 30.9 އިންސައްތަ އިތުރު އަދަދެކެވެ.
