އެއްވެސް އަދަބެއް އަޚްލާޤެއް ނެތި، ހިންގާ ސިޔާސީ ޙަރަކާތްތައް ހިންގަން ސްކޫލް މަދަރުސާތައް ދޫކުރާއިރު، ދީނީ ހޭލުންތެރިކަން އިތުރުކުރުމަށް ހިންގާ ދީނީ ޙަރަކާތްތައް ހިންގަން އެފަދަ ޖަމްޢިއްޔާތަކަށް ސްކޫލް މަދަރުސާތައް ދޫނުކުރެވޭ ސަބަބަބެއް ނުވިސްނޭކަމަށް ވިދާޅުވެ، ދީނީ ޢިލްމުވެރިޔާ ޝައިޚް ޒަމްޒަމް ފާރިޝް ކަންބޮޑުވުން ފާޅުކުރައްވައިފިއެވެ.
އޭނާ އެއިޝާރާތްކުރައްވަނީ އިއްޔެ ނިމިގެންދިޔަ އެމްޑީޕީގެ ރިޔާސީ ޕްރައިމެރީއަށްކަމަށް ބެލެވެއެވެ. އިއްޔެ ޕްރައިމެރީގެ ވޯޓުލުން ކުރިއަށްދިޔައިރު ބައެއް ސަރަޙައްދުތަކުގައި ހަމަނުޖެހުން ހިނގިއެވެ. މާރާމާރީ ހިންގައި ވޯޓުފޮށިތައް ފަޅާލައި ބައެއް ފޮށިތަކުން ވޮޓުކަރުދާސް ނަގައި ވީދައި ހަދާފައިވެއެވެ. އަދި ޢާންމުވެފައިވާ ބައެއް ވީޑިއޯތަކުގައި ރައްޔިތުންގެ މަޖިލީޫހުގެ ބައެއް ޢިއްޒަތްތެރި މެމްބަރުންނާއި ސަރިުކާރުގެ އިސް މަޤާމުތަކުގައި ތިއްބެވި ބޭފުޅުންގެވެސް ޙާޒިރުގައި ހަޑިހުތުރުބަބުން ޒުވާބުކޮށް އައުގުރާނަ ގޮވައި ހަދާފައިވާ މަންޒަފރު ފެނިފައިވެއެވެ.
މިކަންކަމަކީ ދަރިވަރުންނަށް ތަޢުލީމާއި ތަރުބިއްޔަތާއި ރީތި އަޚްލާޤު ދަސްކޮށްދިނުމަށް ބިނާކޮށްފައިވާ ސްކޫލް މަދަރުސާތަކާ އެއްގޮތަކަށްވެސް އެކަށީގެންވާ ކަންކަން ނޫންކަން ފާހަގަކޮށް ބައެއް ބޭފުޅުން ވަނީ ކަންބޮޑުވުން ފާޅުކޮށްފައެވެ.
ޝައިޚް ޒަމްޒަމް ފާރިޝް ކުރެއްވި ޓްވިޓެއްގައިވަނީ މިފަދަ އަދަބެއް އަޚްލާޤެއް ނެތި މާރާމާރީއައި ޖަދަލު ޒުވާބާއެކު ސިޔާސީ ޙަރަކާތްތައް ހިންގަން ޕާޓީތަކަށް ސްކޫލް މަދަރުސާތައް ލިބޭފަދައިން އަދަބު އަޚްލާޤާއި އަމަން އަމާންކަން ގެނުވާފަދަ ދީނީ ޙަރަކާތްތައް ހިންގަން ދީނީ ޖަމްޢިއްޔާތަކަށް ސްކޫލް މަދަރުސާތައް ނުލިބޭންވީ ސަބަބެއް ވިސްނާވިސްނާ ނޭނގުނުކަމަށެވެ.
އަދަބެއް އަޚްލާޤެއް ނެތި މާރާމާރީއާއި ޖަދަލު ޒުވާބާ އެކު ސިޔާސީ ޙަރަކާތްތައް ހިންގަން ޕާޓީތަކަށް ސްކޫލު މަދަރުސާތައް ލިބޭ ފަދައިން،
އަދަބު އަޚްލާޤާއި އަމަންއަމާންކަން ގެނުވާ ފަދަ ދީނީ ޙަރަކާތްތައް ހިންގަން ދީނީ ޖަމްޢިއްޔާތަކަށް ސްކޫލު މަދަރުސާތައް ނުލިބޭންވީ ސަބަބެއް ވިސްނާ 👇🏼— ZamzamFarish – ޒަމްޒަމް ފާރިޝް (@ZamzamFarish) January 28, 2023
މީގެކުރިންވެސް ސިޔަސީ ޕާޓީތަކުން ސްކޫލް މަދަރުސާތަކުގައި ހިންގާފައިވާ ބައެއް ސިޔާސީ ޙަރަކާތްތަކުގައި ހަމަނުޖެހުމާއި އަޚްލާޤީގޮތުން ދަށް ބައެއްކަންކަން ހިނގާފައިވެއެވެ. އެގޮތުން ޑީއާރުޕީ ދެބައިވެ ޒެޑް ޑީއާރުޕީ އުފެދުނު ދުވަސްވަރު ޣިޔާސުއްދީން ސްކޫލުގައި އޮތް ޖަލްސާއެއްގައި ބޮޑު ހަމަނުޖެހުމެއް ހިނގާފައިވާކަން ފާހަގަކޮށްކލެވެއެވެ. އެޖަލްސާގައި ހުރި ބިއްލޫރި މޭޒެއް ތަޅާލައި ބައެއް މީހުންނަށް އަނިޔާވެފައިވެއެވެ. އޭގެފަހުންވެސް މިފަދަ ބައެއް ކަންކަން ހިނގާފައިވެއެވެ.
