ރިޔާސީ ޕްރައިމަރީގައި ރައީސް ސާލިހު ވޯޓު ލައްވައިފި

ކުރިޔަށްދާ އެމްޑީޕީގެ ރިޔާސީ ޕްރައިމަރީގައި، ރައީސް ސާލިހު ވޯޓު ލައްވައިފިއެވެ.

ރައީސް ސާލިހު ވޯޓު ލައްވާފައިވަނީ އިސްކަންދަރު ސޫކޫލުގައި ބެހެއްޓިފައިވާ ޅ. ހިންވަރު ވޯޓު ފޮއްޓަށެވެ. މިއަދު ކުރިޔަށްދާ އިންތިޚާބުގައި ރައީސް ވޯޓު ލައްވާފައިވާއިރު، އިދިކޮޅުން ވާދަ ކުރައްވަމުން ގެންދަވާ، އެމްޑީޕީގެ ރައީސް މުހައްމަދު ނަޝީދުވެސް ވަނީ ޕްރައިމަރީގައި ވޯޓު ލައްވާފައެވެ.

ނަޝީދު ވޯޓު ލައްވާފައިވަނީ ޖަމާލުއްދީން ސްކޫލުގައި ބެހެއްޓިފައިވާ ވޯޓު ފޮއްޓަށެވެ.

އިއްޔެ ހަވީރު ޕާޓީގެ ދެ ފެކްޝަނުންވެސް ފޯރިގަދަ ކެމްޕޭން ނިންމާލާފައިވާއިރު، ޕްރައިމަރީގެ ކެމްޕޭންގައި ރައީސް ޞާލިހުވެސް ރައީސް ނަޝީދުވެސް ވިދާޅުވަމުންދަވާފައިވަނީ މިއިންތިޚާބު ބޮޑު ތަފާތަކުން ކާމިޔާބު ކުރްއްވަނެ ކަމުގައެވެ.

އެމްޑީޕީން ބުނެފައިވަނީ މިއަދު ކުރިޔަށްދާ އެމްޑީޕީގެ ރިޔާސީ ޕްރައިމަރީގައި 200އަށް ވުރެ ގިނަ ވޯޓު ފޮށި ބެހެއްޓިފައި ވާކަމުގައެވެ. އެގޮތުން މާލެ ސަރަހައްދުގައި ޖުމްލަ 49 ވޯޓު ފޮށި ބަހައްޓާފައި ވާއިރު، އަތޮޅުތެރޭގައި 194 ވޯޓު ފޮށި ބަހައްޓާފައި ވެއެވެ. މި އިންތިޚާބުގައި ވޯޓުލުން ކުރިއަށްދާނީ މިއަދު ހެނދުނު 9:00 އިން ހަވީރު 5:00 އަށެވެ.

މި އިންތިޚާބުގައި މޮނީޓަރުންގެ މީޑިއާތަކުންވެސް ހަރަކާތްތެރި ވާނެއެވެ. މިގޮތުން ކޮންމެ ވޯޓު ފޮއްޓެއްކައިރި އެއްވަގުތެއްގައި ހަރަކާތްތެރިވެވޭނީ ކޮންމެ ޕްރިންޓް އަދި އޮންލައިން މީޑިއާ އަކުން އެއްބޭފުޅަކަށާއި އަދި ކޮންމެ ޓީވީ ސްޓޭޝަނަކުން 2 މީހަކަށް ކަމަށް އެމްޑޕީން ވަނީ ބުނެފައެވެ.

މިއިންތިޚާބުގައި ވޯޓުލާ އެމްޑީޕީގެ ވޯޓާސް ހިމެނެނީ އެޕާޓީގެ 57،257 މެމްބަރުންނެވެ.