މިހާރު ކުރިޔަށްދާ އެމްޑިޕީގެ ރިޔާސީ ޕްރައިމަރީގެ، ރައީސް ސާލިހުގެ އެންމެ ފަހުގެ މާލޭގެ ކެމްޕޭން އިވެންޓު ހުޅުމާލޭ ރުއްގަޑު ސަރަހައްދުގައި ބައްވާގޮތަށް ހަމަޖައްސައިފިއެވެ.
"އެމްޑީޕީ ކުރިއަށް" ކެމްޕޭންގެ ފަރާތުން ހާމަ ކޮށްފައިވާ ގޮތުގައި، ރައީސް ސާލިހުގެ މާލޭގެ ކެމްޕޭން ނިންމުން ހުޅުމާލޭ ރުއްގަޑު ސަރަހައްދު 1 ގައި ބޭއްވުމަށް ހަމަޖެހިފައިވާއިރު، ރާއްޖޭގެ ހުރިހާ ރަށެއްގައާއި އަދި ސިޓީތަކުގައިވެސް މިއަދު ހަވީރު 4:30 ގައި ކެމްޕޭންގެ ނިންމުން ފާހަގަ ކުރާނެއެވެ.
ހުޅުމާލޭގައި މިއަދު 16:30 ބޭއްވުމަށް ހަމަޖެހިފައިވާ ކެމްޕޭން ހަރަކާތުގައި ރައީސް ސާލިހު ބައިވެރިވެވަޑައިގަންނަވާކަމެއް އަދި ޔަގީން ކުރެވިފައެއް ނުވެއެވެ.
މާދަމާ ބޭއްވުމަށް ހަމަޖެހިފައިވާ އެމްޑީޕީގެ ރިޔާސީ ޕްރައިމަރީގެ ކެމްޕޭން ދެފަރާތުންވެސް ވަރަށް ވާދަވެރިކޮށް ކޮށްފައި ވާއިރު، ރޭ ދެ ޓީމުންވެސް ވަނީ ކެމްޕޭންގެ ބޮޑު ދެ ޖަލްސާ ބާއްވާފައެވެ.
މިގޮތުން ރައީސް ސާލިހުގެ ކެމްޕޭން ޖަލްސާ އައްޑު އަތޮޅު ހިތަދޫގައި ބާއްވާފައިވާއިރު ނަޝީދުގެ ކެމްޕޭން ޖަލްސާ ބާއްވާފައިވަނީ މާލޭގެ އާރޓިފިޝަލް ބީޗުގައެވެ. މި ދެ ޖަލްސާއަށްވެސް ގިނަ އަދަދެއްގެ ސަޕޯޓަރުން ހާޒިރުވެފައިވާކަން ފާހަގަ ކޮށްލެވެއެވެ. އަދި ރައީސް ޞާލިހުވެސް ރައީސް ނަޝީދުވެސް ވިދާޅުވަމުންދަނީ މިއިންތިޚާބު ބޮޑު ތަފާތަކުން ކާމިޔާބު ކުރްއްވަނެ ކަމުގައެވެ.
އެމްޑީޕީން ބުނެފައިވަނީ މި އިންތިޚާބުގައި 200އަށް ވުރެ ގިނަ ވޯޓު ފޮށި ބެހެއްޓުމަށް ނިންމާފައިވާކަމަށެވެ. އެގޮތުން މާލެ ސަރަހައްދުގައި ޖުމްލަ 49 ވޯޓު ފޮށި ބަހައްޓާއިރު، އަތޮޅުތެރޭގައި 194 ވޯޓު ފޮށި ބަހައްޓަން އެޕާޓިން ނިންމާފައިވެއެވެ.މި އިންތިޚާބުގައި ވޯޓުލުން ކުރިއަށްދާނީ މާދަމާ ހެނދުނު 9:00 އިން ހަވީރު 5:00 އަށެވެ.
މި އިންތިޚާބުގައި މޮނީޓަރުންގެ މީޑިއާތަކުންވެސް ހަރަކާތްތެރި ވާނެއެވެ. މިގޮތުން ކޮންމެ ވޯޓު ފޮއްޓެއްކައިރި އެއްވަގުތެއްގައި ހަރަކާތްތެރިވެވޭނީ ކޮންމެ ޕްރިންޓް އަދި އޮންލައިން މީޑިއާ އަކުން އެއްބޭފުޅަކަށާއި އަދި ކޮންމެ ޓީވީ ސްޓޭޝަނަކުން 2 މީހަކަށް ކަމަށް އެމްޑޕީން ވަނީ ބުނެފައެވެ.
މިއިންތިޚާބުގައި ވޯޓުލާ އެމްޑީޕީގެ ވޯޓާސް ހިމެނެނީ އެޕާޓީގެ 57،257 މެމްބަރުންނެވެ.
ކޮމެންޓު ފޮނުވާ