ރާއްޖޭގެ ހުރިހާ ރަށަކުންވެސް އިވެމުންދަނީ އެއް އަޑެއް، ރައްޔިތުން ބޭނުމީ ތަރައްގީ: ރައީސް

ރާއްޖޭގެ ހުރިހާ ރަށަކުންވެސް އިވެމުންދަނީ އެއް އަޑެއް ކަމަށާއި، ވަޑައިގަންނަވާ ހުރިހާ ރަށަކުންވެސް ރައްޔިތުން ދައްކަމުން ދަނީ ތަރައްގީގެ ވާހަކަ ކަމުގައި ރައީސް ސާލިހު ވިދާޅުވެއްޖެއެވެ.

މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ކެމްޕޭން ނިންމުމަށްޓަކާ އައްޑޫ ސިޓީގެ ހިތަދޫގައި މިހާރު ބާއްވަމުންދާ ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ، މިސަރުކާރުން ގެނެސްދެމުންދާ ތަރައްގީގެ ވާހަކަ ދައްކަމުން ދަނީ އެމަނިކްފާނު ނޫން ކަމަށާއި، އަދި އެމަނިކްފާނާއެކީ ދަތުރު ކުރައްވަމުން ގެންދަވާ ބޭފުޅުންވެސް ނޫންކަމުއެވެ.

އޭގެ ބަދަލުގައި އެވާހަކަ ދައްކަމުން ދަނީ ރަށްރަށުގެ ރައްޔިތުން ކަމަށާއި، އައްޑޫ ސިޓީގެ ރައްޔިތުންވެސް ބުނަމުން ދަނީ ބޭނުމީ ތަރައްގީ ކަމަށް ކަމުގައެވެ.

ރައީސް ސާލިހު ވިދާޅު މުޅި ރާއްޖެއަށް ބަލާއިރު މިހާރުވެސް 83 ރަށެއްގައި ބަނދަރުގެ މަޝްރޫއު ކުރިޔަށްދާއިރު، މިހާތަނަށް 46 ބަނދަރު ނިންމާލެވިފައިވާ ކަމަށާއި، ފެނާއި ނަރުދަމާގެ 139 މަޝްރޫއު ކުރިޔަށް ދާކަމުގައެވެ. އަދި 36 ރަށެއްގައި މަގުހެދުމުގެ މަޝްރޫ ކުރިޔަށް ދާއިރު، މުޅި ރާއްޖޭގެ އެކި ކަންކޮޅުތަކުގައި 16،000 އަށްވުރެ ގިނަ ފްލެޓްއާއި ގޯތީގެ މަޝްރޫއު ކުރިޔަށްދާ ކަމުގައި ރައީސް ސާލިހު ވިދާޅުވިއެވެ. މީގެ ތެރޭގައި މާލެ ސަރަހައްދުގައި 7،000 ފްލެޓް މަޝްރޫޢު ކުރިޔަށް ދާއިރު 5،000 ގޯތި ދިނުމުގެ މަސައްކަތްވެސް ކުރިޔަށްދާކަމުގައި ރައީސް ސާލިހު ވިދާޅުވިއެވެ.

މިޖަލްސާގައި ވާހަކަ ދައްކަވަމުން ރައީސް ސާލިހުވަނީ މީގެ އިތުރުންވެސް، ރާއްޖޭގެ އެކި ކަންކޮޅުތަކުގައި ކުރިޔަށްދާ ތަރައްގީގެ ގިނަ މަޝްރުއުތަކާއި ގުޅޭ މައުލުމާތު ވިދާޅުވެ ދެއްވާފައެވެ.

އައްޑޫ ސިޓީގެ ހިތަދޫގައި ބޭއްވުނު މި ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވީ އައްޑޫ ސިޓިގައި 236 ހެކްޓަރުގެ ބިން ހިއްކާ، 5 ރިސޯޓު ގާއުމްކުުރުމުގެ މަސައްކަތުގެ އަމަލި މަސައްކަތް ކުރިޔަށްދާ ކަމުގައެވެ. އޭގެ އިތުރުން ހަންކެޑެ މަޝްރޫޢުގެ އެންމެ ފަހުގެ ޕްލޭންތައް ކުރެވި، ފައިސާ ހޯދު މަސައްކަތް އަމަލީގޮތުން ފެށުމުގެ ތައްޔާރީތައް ދަނީ ކުރިޔަށް ކަމުގައިވެސް ރައީސް ވިދާޅުވިއެވެ. ރައީސް ސާލިހު ވިދާޅުވީ ހަންކެޑޭގައި އަޅާ 1000 އެނދާއިއެކީ އައްޑޫ ސިޓީއަށް ވީ 8،000 އެނދުގެ ވައިދު ފެދެމުންދާތަން ފެންނަމުން ދާނެކަމުގައިވެސް ރައީސް ސާލިހު ވިދާޅުވިއެވެ.

އޭގެ އިތުރުން ރައީސް ސާލިހު ވިދާޅުވީ އައްޑޫގައި އޮތް ޝަންގްރިއްލާ ރިސޯޓުގެ ހިއްސާ ސަރުކާރުން ދޫކޮށްލުމަށް ކުރާންޖެހޭ ހުރިހާ މަސައްކަތެއް ސަރުކާރުން ނިންމާ އެ ރިސޯޓުގެ ވެރިންނަށް މިހާރު އެކަން އަންގާފައިވާ ކަމުގައެވެ. ރައީސް ސާލިހު ވިދާޅުވީ ކުރިޔަށް އޮތް އޮގަސްޓު ސެޕްޓެމްބަރުގައި އެތަން ހުޅުވޭ ވަރުވާނެކަމަށެވެ.

މި ޖަލްސާގައި ރައީސް ވިދާޅުވީ 2008، އަދި 2018ގަ ކަން ވެގެންދިޔަ ގޮތްވެސް ފެންނާން އެބައޮތް ކަމަށާއި، ޕްރައިމަރީގައި ކެނޑިޑޭޓަކު ނެގުނުނަމަވެސް ވެރިކަން ދެމެހެއްޓުމަށް އިތުރު މަރުހަލާއަކަށް ދާންޖެހޭ ކަމުގައެވެ. މިގޮތުން ފާއިދުވެދިޔަ އެތައް އަހަރެއްގައި ކުރަން ފެށި މަސައްކަތްތައް މިއަދު ގެއްލުވާލައިގެން ނުވާނެކަމަށް ވިދާޅުވަމުން، އައްޑޫގެ ރައްޔިތުން މި ޕްރައިމަރީގައި އެމްޑިޕީއާއެކު ކުރިޔަށް އަދި މުޅި ރާއްޖެއާއި އެކީ ކުރިޔަށް ދިއުމަށް ރާއްވަވާފައި ޕްލޭންތަކަށް ތާއިދުކޮށް ދެއްވުމަށްވެސް ރައީސް ވަނީ އެދިވަޑައިގެންފައެވެ.

އަދި އެމްޑީޕީގެ މެމްބަރުން މަގުމަތިވެގެން ނުދާނޭ ވިސްނުމަކުން ވޯޓު ދިނުމަށް އެމްޑިޕީގެ ހުރިހާ މެމްބަރުންގެ ކިބައިންވެސް ރައީސް ވަނީ އެދިވަޑައިގެންފައެވެ.