ވޯޓާ ދިމާކޮށް ވޯޓު ގަތުމަށް ބައެއް ފަރާތްތަކުން ފައިސާ ދޭނެކަމަށާ، އެފައިސާގައި ހިފުމަށް އެދޭކަމަށް އެމްޑީޕީގެ ރައީސް އަދި އެޕާޓީގެ ރިޔާސީ ޕްރައިމެރީގެ އެއް ކެންޑިޑޭޓު މުޙައްމަދު ނަޝީދު ވިދާޅުވެއްޖެއެވެ.
ނަޝީދު ތުހުމަތުކުރެއްވީ ޕްރައިމެރީގައި ވާދަކުރައްވާ، ރައީސުލްޖުމްހޫރިއްޔާ އިބްރާހީމް މުޙައމްދު ޞާލިޙުގެ ކެމްޕެއިން ޓީމުން އެމްޑީޕީގެ ޢާންމު މެމްބަރުންނަށް ރިޝްވަތުގ ގޮތުގައި ވޯޓު ގަންނަން ފައިސާ ދޭނެކަމަށެވެ. އެގޮތަށް ރިޝްވަތު ދީފިނަމަ އޭގައި ހިފުމަށް ނަޝީދުވަނީ ގޮވާލައްވާފައެވެ.
އެމްޑީޕީގެ ރިޔާސީ ޕްރައިމެރީގެ ވޯޓުލުން އޮންނާނީ އަންނަ ހޮނިހިރު ދުވަހުއެވެ. މިހާރު މި އިންތިޚާބުގެ ކެމްޕެއިންގެ ފޯރި ވަރަށްގަދަވެފައިވާއިރު، ނަޝީދު މިމޭރުމުން ވާހަކަފުޅުދެއްކެވީ އައްޑޫސިޓީ މަރަދޫފޭދޫގެ އެމްޑީޕީ ޖަގަހައިގައި ވާހަކަފުޅުދައްކަވަމުންނެވެ.
ނަޝީދުވަނީ ރައީސް ޞާލިޙްގެ ކެމްޕެއިން ޓީމުން ފައިސާ ދީފިނަމަ އެއިން ދެބައިކުޅަ އެއްބައިގައި ނަމަވެސް ހިފުމަށް އެދޭކަމަށް ވިދާޅުވެފައެވެ. އެހެން ވިދާޅުވީ އެއްވެސް މީހެއްގެ ރިޒުޤުގައި އަތްލަން އެމަނިކުފާނު ބޭނުންފުޅު ނުވާތީމަމަށްވެސް ނަޝީދު ވިދާޅުވިއެވެ.
ނަޝީދަކީ މީގެ ކުރިންވެސް އެކިއެކި މުނާސަބަތުތަކުގައި އިސްލާމްދީނާ ޚިލާފު މިފަދަ ވާހަކަތައް ދައްކަވާފައިވާ ބޭފުޅެކެވެ.
