މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ކެމްޕޭގައި، މިއަދު ކ. އަތޮޅުގެ ކާށިދޫއާއި ގުރައިދުއަށް ވަޑައިގަތުމަށްދަހު ރައީސް ސާލިހު އއ. ތޮއްޑޫއަށް ވަޑައިގެންފިއެވެ.

ރައީސް ސާލިހު އއ. ތޮއްޑޫއަށް ވަޑައިގަތުމުން އެރަށުން ވަނީ ރައީސަށް ހޫނު ބަރުހަބާއެއް ދަންނަވާފައެވެ. އއ. ތޮއްޑޫގައި ރައީސް ސާލިހުވަނީ އެރަށުގެ އެމްޑީޕީގެ މެމްބަރުންނާ ބައްދަލުކޮށް ވާހަކަ ދައްކަވާފައެވެ.

ރައީސް ސާލިހު މިއަދު ކ. އަތޮޅާއި އއ. އަތޮޅުގެ ބައެއް ރަށްތަކަށް ދަތުރު ކުރައްވަމުން ގެންދަވާއިރު، ރައީސް ސާލިހާއި ޕްރައިމަރީގައި ވާދަ ކުރައްވަމުން ގެންދަވާ އެމްޑީޕީގެ ރައީސް މުހައްމަދު ނަޝީދުވަނީ މިއަދުވަނީ އައްޑުއަށް ވަޑައިގެންފައެވެ. އަދި އައްޑޫއަކީ ނަޝީދުގެ ކެމްޕޭންގެ އެންމެ ފަހު މަންޒިލް ކަމުގައިވަނީ މައުލޫމާތު ލިބިގައެވެ.

މިގޮތުން ޕްރައިމަރީއަށް ފޯމު ހުށަހެޅެއްވުމަށްފަހު ފެއްޓެވި ކެމްޕޭން ދަތުރުތަކުގައި ނަޝީދު ރާއްޖޭގެ 70އަށްވުރެ ގިނަ ރަށަށް ވަޑައިގެންފައިވާއިރު، ކެމްޕޭން ޓީމުން މައުލޫމާތު ލިބިފައިވާ ގޮތުގައި މި ކެމްޕޭންގައި ނަޝީދު މިހާރުވަނީ ރާއްޖޭގެ ހުރިހާ އަތޮޅަކަށް ވަޑައިގެންފައެވެ.

އޭގެ އިތުރަށް "ފިކުރެއްގެ ދިރުން" ކެމްޕޭންގެ 3 ޓީމަކުން ރާއްޖޭގެ 3 ސަރަހައްދެއްގައި ކެމްޕޭން ކުރަމުންދާއިރު، މިހާތަނަށް ނަޝީދުގެ ކެމްޕޭނުން ރާއްޖޭގެ ހުރިހާ ރަށެއް ކަވަރުކޮށް ނިންމާފައިވާ ކަމަށްވެސް މައުލޫމާތު ދީފައި ވެއެވެ.

ރައީސް ސާލިހުގެ "އެމްޑީޕީ ކުރިއަށް" ކެމްޕޭނުން ހާމަ ކޮށްފައިވާ ގޮތުގައި އެމަނިކްފާނުގެ ޕްރައިމަރީ ކެމްޕޭން ނިންމުމުގެ ޖަލްސާ ބޭއްވުމަށް ހަމަޖެހިފައިވަނީ އައްޑޫ ސިޓީގެ ހިތަދޫގައި މިމަހުގެ 26 ވަނަ ދުވަހުގެ ރޭ 8:30 ގައެވެ.

އެމްޑީޕީގެ ޕްރައިމަރީގެ ވޯޓުލުން ބޭއްވުމަށް ހަަމަޖެހިފައިވަނީ އަންނަ ހޮނިހިރު ދުވަހުއެވެ.