ސްވިޑްންގައި ކީރިތި ޤުރުއާން އަންދާލި މައްސަލަ ޖުމުހުރީ ޕާޓީގެ ލީޑަރު ގާސިމް އިބުރާހިމް ކުށްވެރި ކުރައްވައިފިއެވެ.
ގާސިމް އިބުރާހިމް ކުރެއްވި ޓުވީޓެއްގައި ވިދާޅުވީ ސްވިޑްންގެ ސްޓޮކްހޮމްގައި ހުންނަ ތުރުކީގެ އެމްބަސީގެ ބޭރުގައި، ސުވިޑްން ސަރުކާރުގެ ހުއްދަ ލިބިގެން ގުރުއާން އެންދުމަށް ބޭއްވި ހަރަކާތް ކުށްވެރި ކުރައްވާ ކަމުގައެވެ.
ގާސިމް ވިދާޅުވީ މިއީ ދުނިޔޭގެ އެކި ކަންކޮޅުތަކުގައި ދިރިއުޅެމުންދާ 1 ބިލިއަނަށްވުރެ ގިނަ މުސްލިމުން ރުޅިއަރުވަން ހިންގާފައިވާ ދަށުދަރަޖައިގެ އަމަލެއް ކަމުގައެވެ.
I strongly condemn the burning of Holy Quran by the Danish politician outside the Turkish Embassy in Stockholm with the permission of Swedish gov’t. Undoubtedly this heinous act of incitement is a serious provocation to the feelings of more than a billion Muslims in the world. pic.twitter.com/wAtysyoayb
— Qasim Ibrahim (@qasimibrahim) January 23, 2023
ސްވިޑެންގައި ކީރިތި ޤުރުއާން އަންދާލި މައްސަލަ މީގެ ކުރިން ދިވެހި ސަރުކާރުންވެސް ކުށްވެރިކޮށްފިއެވެ.
ދިވެހި ސަރުކާރުން މިކަން ކުށްވެރިކޮށްފައިވަނީ ސްވިޑަންގައި ކީރިތި ޤުރުއާން ރޯކޮށްލި ހާދިސާ ކުށްވެރިކޮށް ނެރުނު ބަޔާނެއްގައެވެ.
ފޮރިން މިނިސްޓްރީން ނެރުނު ކުރު ބަޔާނުގައި ވަނީ 2023ވަނަ އަހަރުގެ ޖެނުއަރީ މަހުގެ 21ވަނަ ދުވަހު ސްވިޑެންގެ ހަރުކަށި ފިކުރުގެ ސިޔާސީ ޕާޓީ ސްޓްރެމް ކުރުސްގެ ލީޑަރު ރަސްމުސް ޕަލޫދާން ސްވިޑަންގައި ކީރިތި ޤުރުއާނަށް ފުރައްސާރަކޮށް ހިންގި ނާތަހުޒީބު އަމަލު ދިވެހި ސަރުކާރުން ހަރުކަށި އިބާރާތުން ކުށްވެރިކުރާކަމަށެވެ.
ވިސްނުމާއި އިޖުތިމާއީ އެއްބައިވަންތަކަމުގެ ކުރިއެރުންތަކެއް ހޯދިފައިވީ ނަމަވެސް، މިފަދަ އަމަލުތަކުގެ ސަބަބުން ކެތްތެރިކަމާއި އެއްބައިވަންތަކަމުގެ އަސާސްތައް ދަމަހައްޓަން ކުރާ ހުރިހާ މަސައްކަތަކަށް ބުރޫ އަރާކަމަށް ދިވެހި ސަރުކާރުން ވިދާޅުވެފައިވެއެވެ.
ސުވިޑްންގެ ސްޓޮކްހޯމްގައި ހުންނަ ތުރުކީގެ އެމްބަސީގެ ބޭރުގައި، ސުވިޑްންގެ ކަނާތުފިޔައިގެ ހައްދުފަހަނަ އެޅި ސިޔާސީ މީހަކު ޤުރުއާން އަދާލުމަށް ސުވިޑްންގެ އިދާރާތަކުން ފުރުސަތު ދީފައިވާތީ ސައުދީ އަރަބިއާގެ ފޮރިންގ މިނިސްޓްރީގެ އިތުރުން ތުރުކީއާއި އަދި ދުނިޔޭގެ އެހެން ގިނަ އިސްލާމީ ގައުމުތަކުންވެސް ވަނީ ކުށްވެރި ކޮށްފައެވެ.
ސްވިޑްންގައި ޤުރުއާން އަންދާލާފައިވަނީ ކަނާތު ފިޔައިގެ ހަރުކަށި ޑެނިޝް ސިޔާސީ ޕާޓީއެއްގެ ލީޑަރު ރަސްމުސް ޕަލުދާންއެވެ. ސުވިޑްންގެ ރައްޔިތުކަން އޮންނަ ޕަލުދާން ވަނީ މީގެ ކުރިންވެސް އެތައް އެއްވުމެއް ބާއްވާ މީގެ ކުރިންވެސް ޤުރުއާން އަންދާލާފައެވެ.
ސުވިޑްންގެ ފުލުހުންގެ ފަރާތުން އޭނާއަށް ވަނީ އިސްލާމް ދީނާއި ދެކޮޅަށް މުޒާހިރާ ކުރުމަށް ހުއްދަ ދީފައެވެ. އަދި އޭނާ މުޒާހިރާ ކޮށްފައިވަނީ، ސުވިޑްގައި އޮންނަ ޚިޔާލު ފާޅުކުރުމުގެ މިނިވަންކަމަށް ނުފޫޒު ފޯރުވުމަށް ތުރުކީގެ ރައީސް ރެސެޕް ތައްޔިޕް އެރެދޮގާން މަސައްކަތް ކުރާކަމަށް ބުނެ އެކަމާއި ދެކޮޅަށެވެ.
