ރައްޔިތުންގެ މަޖިލިހުގެ ތުޅާދޫ ދާއިރާގެ މެމްބަރު ހިސާން ހުސެއިން ތުޅާދޫއަށް ވަޑައިގަތުމުން މިއަދު ގިނަބަޔަކު ނިކުމެ އޭނާއާއި ދެކޮޅަށް މިޒާހިރާ ކޮށްފިއެވެ.
ތުޅާދޫއިން ޚަބަރު އޮންލައިނަށް މައުލޫމާތު ދިން ބައެއް ފަރާތްތަކުން މައުލޫމާތު ދީފައިވާ ގޮތުގައި، ހިސާންއާއި ދެކޮޅަށް ތުޅާދޫގައި މުޒާހިރާ ކުރި ފަރާތްތަކުގެ ތެރޭގައި އިދިކޮޅު ޕީޕީއެންމެ މީހުން ހިމެނޭއިރު، އަޑު އުފުލާފައިވާ މީހުންގެ ތެރޭގައި އެމްޑީޕީގެ ރައީސް ނަޝީދަށް ތާއީދުކުރާ ފަރާތްތައްވެސް ހިމެނެއެވެ.
މިގޮތުން ހެނދުނު 8:30 ގައި ހިސާން ބަނދަރުމައްޗަށް ފޭބުމަށްފަހު ގެސްޓް ހައުސްއަކަށް ހިސާން ވަޑައިގަންނަވަން ޖެހުނީ ފުލުހުންގެ އެހީތެރިކަމާއެކުވެ. މުޒާހިރާ ކުރަމުން ދިޔަ މީހުން އަޑު އުފުލަމުން ދިއުމާއި ގުޅިގެން ގެސްޓު ހައުސްއިން ނުނިކުމެވި ގެސްޓު ހައުސްގައި ބަންދުވެފައިވެސް ހިސާނަށް ހުންނަވަން ޖެހެނު ކަމުގައިވެސް މައުލޫމާތު ދީފައި ވެއެވެ.
ހިސާން އާއި ދެކޮޅަށް އަޑު އުފުލަމުންދިޔަ ފަރާތްތަކުން ރައީސް ޔާމިންގެ ހުކުމާއި ދެކޮޅަށް އަޑުއުފުލާފައި ވާއިރު، ބައެއް މީހުންވަނީ، ހިސާން ދެ ވަޒީފާ "ކާލާފައި" ވާކަމަށް ބުނެވެސް އަޑު އުފުލާފައެވެ. އަދި އަޑުއުފުލު އަނެއްބަޔަކު ވަނީ ނަޝީދަށް ނިސްބަތްކޮށް ހިސާން ދައްކަވާފައިވާ ވާހަކަތަކާއި ގުޅޭގޮތުންވެސް ހިންހަމަ ނުޖެހުން ފާޅު ކޮށްފައެވެ.
ތުޅާދޫއަށް ވަޑައިގެން ފުލުހުންގެ އެހީގައި ގެސްޓް ހައުސްއެއްގައި ހުންނެވުމަށްފަހު ގެސްޓު ހައުސްއިން ނުކުންނަވާ އާއިލީ ބޭފުޅެއްގެ ގެއަށްވެސް ވަޑައިގަންނަވަން ޖެހުނީ ފުލުހުންގެ އެހީތެރިކަމާއެކުއެވެ.
މައުލޫމާތު ލިބިފައިވާގޮތުގައި މިއަދު ތުޅާދޫގައި ހިސާން އުޅުއްވީ ފުލުހުންގެ ހިމާޔަތުގައެވެ. ހިސާން ތުޅާދޫއަށް މިއަދު ވަޑައިގަންނަވާތީ ފުލުހުންގެ އެޑްވާންސް ޓީމެއްވެސް ވަނީ އެރަށް ގޮސްފައެވެ.
