ކުރިޔަށް އޮތް އެމްޑީޕީގެ ރިޔާސީ ޕްރައިމަރީއަަށް އަމާޒުކޮށްގެން ކުރިޔަށްދާ އެޕާޓީގެ ޕްރައިމަރީ ކެމްޕޭންގައި ރޭ ވެގެން ދިޔައީ ޚާއްސަ ރެއަކަށެވެ.

އެމްޑީޕީގެ އެންމެ އިސް ދެ ބޭފުޅުން ކަމުގައިވާ، ޕާޓިގެ އިސް ލީޑަރާއި ޕާޓީގެ ރައީސާއި ދެބޭފުޅުންގެ މެދުގައި ކުރިޔަށްދާ ވާދަވެރި ކެމްޕޭންގައި، ތާއީދު އޮތީ ކޮންބޭފުޅަކަށްކަން ސާބިތު ކޮށްދިނުމަށް ސޯޝަލް މީޑިއާއާއި އަދި އެނޫންވެސް ވަސީލަތްތަކުގެ ބޭނުންކޮށްގެން ކުރެވެމުންދާ މަސައްކަތަތްކުގައި ރޭ ފާހަގަވަގެން ދިޔައީ ރައީސް ސާލިހަށް ތާއީދުކުރާ އެމްޑީޕީގެ މެމްބަރުން އާރޓިފިޝަލް ބީޗް ސަރަހައްދު ފުރާލި ރެއަކަށެވެ.

ރާއްޖޭގެ އެކި ރަށްތަަކަށް ފާއިތިވެދިޔަ ހަފްތާގައި ރައީސް ސާލިހު ކުރެއްވި ކެމްޕޭން ދަތުރުތަކަށްފަހު، އެމަނިކްފާނުގެ "އެމްޑީޕީ ކުރިއަށް" ކެމްޕޭނުން އިންތިޒާމް ކޮށްގެން ބީޗް ސަރަހައްދުގައި ރޭ ބޭއްވި ޖަލްސާއަށް އެމްޑީޕީގެ އެތައްހާސް ސަޕޯޓަރުން ޖަމާވެ، އަދަދަދުން ދެއްކި ހަގީގީ މަންޒަރަކީ، ފުރަ މާލޭގައިވެސް ނަޝީދަށް އޮތް ތާއީދަށްވުރެ އެތައް ގުނައެއް ބޮޑުކޮށް ރައީސް ސާލިހަށް ތާއީދު އޮތްކަމެވެ.

ވަކީން ޚާއްސަކޮށް، މީގެ އެއް ހަފްތާކުރިން، ޖެނުއަރީ މަހުގެ 12ވަނަ ދުވަހު، ޕްރައިމަރީގައި ވާދަ ކުރައްވަމުން ގެންދަވާ، އެމްޑީޕީގެ ރައީސް މުހައްމަދު ނަޝީދުގެ "ފިކުރެއްގެ ދިރުން" ކެމްޕޭންގެ ފަރާތުން ރާޅުގަނޑު ސަރަހައްދުގައި ބޭއްވި އެއްވުމަށް އެޕާޓީގެ ގިނަ އަދަދެއްގެ މެމްބަރުން ހާޒިރު ވެފައި ވަނިކޮށް، އެއީ ޕާޓީގެ އެތެރޭގައި ނަޝީދަށް ތާއީދު އޮތް މިންވަރު ރަމްޒު ކޮށްދިން ޖަލްސާއެއްގެ ގޮތުގައި ނަޝީދަށް ތާއީދުކުރާ ފަރާތްތަކުން އެ ޖަލްސާ ޕްރޮމޯޓު ކުރަމުން ދަނިކޮށް، ރޭ ރައީސް ސާލިހުގެ ކެމްޕޭނުން ބޭއްވި "ބޮޑު ޖަލްސާ"އިން، ޕާޓީގެ އެތެރޭގެ ތާއީދާއި، ހަގީގަތް އޮތީ ނަޝީދަށް ތާއީދުކުރާ ފަރާތްތަކުން މޭރުން ކުރަމުންދާ ގޮތަށް ނޫންކަން ސާފުކޮށް ފެނިގެން ހިގައްޖެކަމަށް ގިނަބަޔަކު މިހާރު ވަނީ ބުނާން ފަށާފައެވެ.

މިގޮތުން، އާރޓިފިޝަލް ބީޗް ސަރަހައްދުގައި ރޭ ބޭއްވިގެންދިޔަ ރައީސް ސާލިހުގެ "އެމްޑީޕީ ކުރިއަށް" ކެމްޕޭންއިން އިންތިޒާމް ކޮށްގެން ކުރިޔަށް ގެންދިޔަ ޖަލްސާއަށް އެތައް ހާސްބަޔަކު ވަނީ ހާޒިރުވެފައެވެ. އަދި މި ޖަލްސާއަށް ހާޒުރުވީ މީހުން އަދަދު ސީދާ ނަންބަރުން އެގެން ނެތް ނަމަވެސް، ޖަލްސާއަށް ބީޗް ސަރަހައްދުގައި އަތުރާފައި ހުރި ހުރިހާ ގޮނޑިއެއް ފުރި، ކައިރީގައި އޮތް ބޮޑުތަކުރުފާނު މަގުގައިވެސް، ޖަލްސާއަށް ހާޒިރުވި ގިނަ އަދަދެއްގެ ބަޔަކު ކޮޅަށް ތިބެން ޖެހުނުކަން ފާހަގަ ކޮށްލާން ޖެހެއެވެ.

ނަޝީދަށް ޔާމިންގެ ސިޔާސަތު ރަގަޅުވުމުން ބޮޑު ފާޑިކިއުމެއް!

ފުރަ މާލޭގައިވެސް ނަޝީދަށްވުރެ ބޮޑު ތާއީދެއް ރައީސް ސާލިހަށް އޮތްކަން "ނަމްބަރުން" ސާބިތު ކޮށްދީ، "އެމްޑީޕީ ކުރިއަށް" ކެމްޕޭންގެ ފަރާތުން ރޭ އާރޓިފިޝަލް ބީޗްގައި ބޭއްވި ޖަލްސާގައި އެންމެ ބޮޑު ފާޑުކިއުމެއް އަމާޒު ވެގެން ދިޔައީ، ރައީސް ޔާމިންއަކީ ވިޝަނަރީ ލީޑަރެއްކަމަށް ސިފަ ކޮށްދީ ފާއިތުވެދިޔަ ހަފްތާގައި ނަޝީދު ދައްކަވާފައިވާ ވާހަކަފުޅު ތަކަށެވެ.

ފާއިތުވެދިޔަ ހަފްތާގައި ބޭއްވެވި ނޫސްވެރިންގެ ބައްދަލުވުމުގެ ނަޝީދު ވިދާޅުވެފައިވަނީ، އެމަނިކްފާނާއި ޔާމިންއާދެމެދު މިހާރު އޮތް ހަމައެކަނި ޚިޔާލު ތަފާތުވުވުމަކީ އިންޑިއާ އައުޓުގެ މައްސަލަ އެކަނި ކަމުގައެވެ. އަދި، މިހާރު ޖަލަށް ލާފައިވާ ޔާމިންއަކީ ވަރަށް ވިޝަނަރީ ލީޑަރެއްކަމަށް މޭރުން ކުރައްވާ މި ޕްރެސްގައި ނަޝީދުވަނީ ޔާމިންއަށް ތައުރީފްކޮށް ވާހަކަވެސް ދައްކަވާފައެވެ.

ނަޝީދު ޔާމިންއަށް ތައުރީފު ކުރެއްވި ކުރެއްވުމަށް ފާޑު ވިދާޅުވަމުން ރައީސް ސާލިހު ވިދާޅުވީ ވެތުވެދިޔަ ތަނުގައި ކުރި އަނިޔާއާއި ދެއްކި ބިރާއި, އޭގެ ފަހަތުގައި ތިބި މީހުންނަށް އޯކޭއެއް ނޫން ކަމަށާއި، އެއަނިޔާތަކުގެ ފަހަތުގައި ތިބި މީހުންނާއެކީ ކުރާނެ އެއްވެސް ސިޔާސީ މަސައްކަތެއްވެސް ނޯންނާނެ ކަމުގައެވެ.

އަދި ރައީސް ސާލިހު ވިދާޅުވީ، ރައީސް ޔާމިނާއެކީ އެއްވެސް ސިޔާސީ މަސައްކަތެއް ދުވަހަކުވެސް ނުކުރައްވާނެކަމުގައެވެ.

މިއަދު ނަޝީދަށް ޔާމިންގެ ސިޔާސަތުތައް މުޅިން ރަގަޅުވެއްޖެކަމަށް ވިދާޅުވަމުން، ރޭގެ ޖަލްސާގައި ވާހަކަ ދެއްކެވި ޑިފެންސް މިނިސްޓަރު މާރިޔާ ދީދީ ވިދާޅުވީ މިހާރު އެންމެ ބޮޑަށް ކަންބޮޑުވަނީ ނަޝީދު ޔާމިންއާއި ކޯލިޝަން ހައްދަވާފާނެތީ ކަމުއެވެ. މާރިޔާ އިތުރަށް ވިދާޅުވީ ރައީސް ނަޝީދު ރަށްރަށަށް ވަޑައިގަންނަވާއިރު އިދިކޮޅު ޕީޕީއެމްގެ އެކްޓިވިސްޓުން ނަޝީދަށް މަރުހަބާ ދެންނެވުމަށް ގިޑިގެ ހެދުމާއި އަދި މަރުހަބާ ދެންނެވުމަށް ތިބޭތަން ފެންނަމުންދާ ކަމުގައެވެ.

މާރިޔާ ވިދާޅުވީ އެހެންނަމަވެސް ޔާމިން ރާއްޖޭގައި ކުރެއްވީ އަނިޔާވެރި ވެރިކަމެއް ކަމަށާއި، އެ ވެރިކަމުގައި އިދިކޮޅު ސިޔާސީ ހުރިހާ ވެރިން ނުހައްގުން ޖަލަށް ލެއްވި ކަމަށެވެ. އޭގެ އިތުރުން މުވައްސަސާތައް މުށުތެރެއަށް ލައްވާ، ސުޕްރީމް ކޯޓުގެ ފަނޑިޔާރުންނާއި، ޔާމީނާއި ޚިޔާލުތާފާތުވި މެމްބަރުން ޖަލަށްލާ، ޔާމިނު ތަންފީޒު ކުރި އަނިޔާވެރިވެރިކަމުގެ މަތިން ދިވެހިރައްޔިތުން ހަދާން ނުނެތޭނެ ކަމުގައިވެސް މާރިއާ ވިދާޅުވިއެވެ.

އިތުރަށް ވާހަކަ ދައްކަވަމުން މާރިޔާ ވިދާޅުވީ، ޔާމިން ވިޝަނަރީ ލީޑަރެއް ކަމަށް ދެކޭ ކެނޑިޑޭޓަކަށް އެމްޑީޕީގެ މެމްރުން ވޯޓު ދީގެން ނުވާނެކަމަށާއި، ނަޝީދަށް ތާއީދުކޮށްގެން ތިބި އެމްޑީޕީގެ ހުރިހާ މެމްބަރުންވެސް ރައީސް ސާލިހަށް ވޯޓު ދިނުމަށް މާރިޔާ ގޮވާލެއްވިއެވެ.

"މިކަން ނިމިއްޖެ"!

ކުރިޔަށް އޮތް ރިޔާސީ ޕްރައިމަރީގެ ކެމްޕޭންގައި ވޯޓުލާން އެންމެ ހަފްތާއަކަށް ވެފައި ވަނިކޮށް، ރައީސް ސާލިހުގެ "އެމްޑީޕީ ކުރިއަށް" ކެމްޕޭންގެ ފަރާތުން އިންތިޒާމް ކޮށްގެން ބޭއްވި ބޮޑު ޖަލްސާގައި ރައްޔިތުންގެ މަޖިލިހުގެ ގިނަ އަދަދެއްގެ މެމްބަރުންގެ އިތުރުން، ވަޒީރުންނާއި އަދި ރައީސްގެ ފެކްޝަނަށް ތާއީދުކުރާ ގިނަ އަދަދެއްގެ އެމްޑީޕީ މެމްބަރުން މިޖަލްސާއިން ދެއްވި މެސެޖަކީ "މިކަން ނިމިއްޖެ" ކަމުގެ މެސެޖެވެ. އެއީ މި ދައުރުގައި ނިމިފައިވަނީ ހަމައެކަނި ތަރައްގީގެ މަޝްރޫއުތައް އެކަނި ނޫންކަމާއި، ކުރިޔަށްދާ ޕްރައިމަރީވެސް ރައީސް ސާލިހަށް ކާމިޔާބުވެ "ނިމިއްޖެ" ކަމުގެ މެސެޖެވެ.

އެމްޑީޕީގެ ތާރީޚުގައިވެސް މި ޖެނުއަރީ 28ގައި ވޯޓުލާ ޕްރައިމަރީގައި ތަފާތެއް އެބަވޭ. ދެވަނަ ދައުރަކަށް އެމްޑީޕީ ދިއުމަށް ލިބޭ ފުރަތަމަ ފުރުސަތަކީ މިއީ. ތިޔަ ބޭފުޅުން އަޅުގަޑާއެކު މިފުރުސަތުގެ ބޭނުން ހިތްޕަވާ. އަޅުގަޑު މިހުރީ ތައްޔާރަށް. ތަފާތު ބޮޑު ތާއީދާއެކު މި ޕްރައިމަރީ އަޅުގަޑު އިރާދަ ކުރެއްވިއްޔާ ކާމިޔާބު ކުރާނަން. އޭގަ އެއްވެސް ޝައްކެއް ނެތް. އެއްވެސް ޝައްކެއް ނެތް. މިތަނުން މިއަދު މިއޮތީ އެކަން ނިންމާފަ. ނިމިއްޖެ. ނިމިއްޖެ. ނިމިއްޖެ. ނިމިއްޖެ.

އެމްޑީޕީގެ އެތައް ސަތޭކަ މެމްބަރުން ހާޒިރުވި ރޭގެ ބޮޑު ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވިއެވެ.

މިމޭރުމުން ޖަލްސާގައި ވާހަކަ ދައްކަވަމުން ރައީސް ސާލިހު ވަނީ އެމަނިކްފާނުގެ ދައުރުގައި ނިންމާފައިވާ ތަރައްގީގެ މަޝްރޫއުތަކުގެ ތަފްސީލްތައްވެސް ހިސާބު އަދަދުން ދައްކަވާފައެވެ.

ރައީސްގެ ވާހަކަ ފުޅުގައި ވިދާޅުވީ މިސަރުކާރުން 65،529 ދަރިވަރުން ހިލޭ ޑިގްރީ ސްކީމުން ކިޔަވާ ނިމިއްޖެކަމަށާއި، 10 ހާހަށްވުރެ ގިނަ މުދައްރިސުންގެ މުސާރަ ބޮޑު ކުރެވިއްޖެ ކަމަށާއި، 5 ސަރަހައްދުގައި ސީޓީ ސްކޭންގެ ޚިދުމަތް ތައާރަފް ކުރެއްވިއްޖެ ކަމުގައެވެ.

އޭގެ އިތުރަށް 137 ރަށަކަށް އެމްބިއުލާންސް ފޯރުކޮށް ދެވިއްޖެ ކަމަށާއި، 13،000 އަށްވިރެ ގިނަ ފަތުރުވެރި މުވައްޒަފުންނަށް މިނިމަމް ވޭޖްގެ ފައިދާ ލިބިއްޖެ ކަމަށާއި، 16 ހާހަށްވުރެ ގިނަ ފްލެޓް މަޝްރޫއުތައްވެސް ރާއްޖޭގެ އެކި ކަންކޮޅުތަކުގައި ކުރިޔަށްދާ ކަމުގައިވެސް ރައީސް ވިދާޅުވިއެވެ. އޭގެ އިތުރުން މާލޭ ސަރަހައްދުގައި އެކަނިވެސް 7،590 ހައުސިން ޔުނިޓް ތަރައްގީ ވަމުންދާ ކަމުގައިވެސް ރައީސް ސާލިހު ވިދާޅުވިއެވެ.

މީގެ އިތުރުންވެސް މި ސަރުކާރުން ކުރިޔަށް ގެންގޮސްފައިވާ އެތަކެއް މަޝްރޫއުތަކެއް މިހާރު ނިންމާފައިވާކަން ފާހަގަ ކުރައްވާ، ރައީސް ސާލިހުވަނީ ކުރިޔަށް ރޭވިފައިހުރި ބިޔަ ބައެއް ބޮޑެތި ޕްރޮޖެކްތްތަކުގެ ތަފްސީލުތައްވެސް އަދަދުން ހިސާބު ޖައްސަފާ ހާމަ ކޮށްދެއްވާފައެވެ.

އެއަށްފަހު ރައީސް ސާލިހު އެދިވަޑައިގަތީ، މިދައުރުގައި ނުނިމި ހުރި މަޝްރޫޢުތައް ފުރިހަމަ ކުރުމަށް، މިމަހުގެ 28ވަނަ ދުވަހު އެމްޑީޕީގެ ހުރިހާ މެމްބަރުން ކެނޑީޑޭޓް ނަމްބަރު 2 އަށް ވޯޓު ދެއްވުމަށެވެ. އަދި ވިދާޅުވީ މި އިންތިޚާބުގައި އެމްޑީޕީގެ މެމްބަރުން ދޭ ވޯޓު ވެގެންދާނީ ރާއްޖޭގެ މަސްލަހަތު ހިފެހެއްޓުމަށް ދޭވޭ ވޯޓަކަށް ކަމުގައެވެ.

އޭގެ އިތުރުންވެސް، ޖަލްސާގައި ވާހަކަ ދެއްކެވި އެހެން ބޭފުޅުންވެސް ވަނީ ޖަލްސާއަށް ހާޒިރުވީ ފަރާތްތަކުން އަދަދުންވެސް ޕްރައިމަރީ ރައީސް ސާލިހަށް ކާމިޔާބުވެ "ނިމިއްޖެ"ކަން ވަރަށްވެސް ރަގަޅަށް މޭރުން ކޮށްދީފި ކަމަށް ވިދާޅުވެ، 28 ވަނަ ދުވަހު ލާ ވޯޓު ބޭކާރު ކޮށް ނުލުމަށް މެމްބަރުންނަށް އިލްތިމާސް ކުރައްވާފައެވެ.

ކޮންމެއަކަސް ރޭ ބީޗް ސަރަހައްދު ފުރާލާ، ރައީސް ސާލިހުގެ "އެމްޑީޕީ ކުރިޔަށް" ކެމްޕޭނުން ސާބިތުކޮށްދިން އެއް ހަގީގަތަކީ، ރާޅުގަޑު ސަރަހައްދުގައި ނަޝީދުގެ ކެމްޕޭނުން ބޭއްވި ޖަލްސާއިން ފެނިގެންދިޔައީ އަދި ހަގީގީ މަންޒަރު ނޫންކަމެވެ. އަދި އެއީ ފުރަމާލޭގައިވެސް މި ކެމްޕޭންގައި ތާއީދު ބެހިގެން ގޮސްފައި އޮތް ގޮތްވެސް ނުމެ ނޫންކަމެވެ.

މި ޖަލްސާއަށްފަހު، ރައީސް ސާލިހު ވިދާޅުވަމުން ގެންދަވާ ފަދައިން މި ޕްރައިމަރީ އެމަނިކުފާނު "ބޮޑުތަނުން" ކާމިޔާބު ކުރައްވާނެކަމަށް ގިނަބަޔަކު މިހާރުވަނީ ދެކެން ފަށާފައެވެ. އަދި ރޭގެ ޖަލްސާއިން ސާބިތުކޮށްދިން އެއްހަގީގަތަކީ މިއިންތިޚާބު ރައީސް ސާލިހަށް ކާމިޔާބުވެ، "މިކަން ނިމިއްޖެ" ކަންކަމުގައިވެސް ގިނަބަޔަކު މިހާރުވަނީ ގަބޫލުކުރާން ފަށާފައެވެ.