ހުޅުމާލޭ ދެވަނަ ފޭސްގައި ހަދާފައިވާ ހިޔާ ފްލެޓްގައި ހުޅުމާލޭ ހޮސްޕިޓަލުން ޚާއްސަ ކުލިނިކެއް ހުޅުވާ މާދަމާ ޚިދުމަތްދޭން ފެށުމަށް ނިންމައިފިއެވެ.
"ޖީޕީ ކްލިނިކް"ގެ ނަމުގައި ހުޅުވާ މި ކުލިނިކް ހުޅުމާލޭ ހޮސްޕިޓަލުން ހަދާފައިވަނީ ހިޔާ ފްލެޓްގެ 16ވަނަ ޓަވަރުގައެވެ.
ހުޅުމާލޭ ހޮސްޕިޓަލުން ހާމަ ކޮށްފައިވާ ގޮތުގައި ޖީޕީ ކްލިނިކް ހުޅުވައި އެ ކުލިނިކްގައި ޖެނަރަލް ކޮންސަލްޓޭޝަންގެ ހިދުމަތްތައް ދޭން ފެށުމުގެ މަގްސަދަކީ ހުޅުމާލޭ ހޮސްޕިޓަލަށް ބާރު ބޮޑުވެފައި ވުމާއެކު، އެ ހޮސްޕިޓަލަށް ބާރު ކުޑަކޮށް އަދި ހުޅުމާލޭގެ ދެވަނަ ފިޔަވަހީގައި ދިއިރުޅެ އާންމު ރައްޔިތުންނަށް ލުއި ފަސޭހަކަން ހޯދާ ދިނުމެވެ.
އަދި ހޮސްޕިޓަލުން ހާމަ ކޮށްފައިވާ ގޮތުގައި މިވަގުތު އެ ކުލިނިކުން ލިބޭނީ އާންމު ބަލިތަކާބެހޭ ޑޮކްޓަރަށް ދެއްކުމުގެ ޚިދުމަތް އެކަންޏެވެ. ކުލިނިކް ހުޅުވާފައި ހުންނާނީ ސަރުކާރު ބަންދު ނޫން ދުވަސްތަލުގެ ހެނދުނު 10:00 އިން ހަވީރު 5:00 އަށެވެ.
"ޖީޕީ ކްލިނިކް"އާއި ހަވާލާދީ ބައެއް މީޑިއާތަކުން ރިޕޯޓު ކޮށްފައިވާ ގޮތުގައި، ކުރިޔަށް އޮތް ތަނުގައި ކުޑަކުދިންނަށް ވެކްސިން ޖެހުމާއި ކުދިކުދި އޮޕްރޭޝަންތަކުގެ އިތުރުން އެހެން ބައެއް ޚިދުމަތްތައްވެސް އެ ކުލިނިކްގައި ދޭން ފަށާނެއެވެ.
