އެމްޑީޕީގެ މިހާރު ކުރިޔަށްދާ ޕްރައިމަރީ ކެމްޕޭންގައީ، ރައީސް ސާލިހު ވެރިކަމުން ބާލާނެކަމަށް ވިދާޅުވެ ނަޝީދު ދެއްކެވި ވާހަކަފުޅަށް ރައީސް ސާލިހު ރައްދު ދެއްވައިފިއެވެ.
ހުޅުމާލޭގައި ދިރިއުޅުއްވާ އެމްޑީޕީގެ މެމްބަރުންނާއި ބައްދަލު ކުރެއްވުމަށް ރޭ “އެމްޑީޕީ ކުރިޔަށް“ ކެމްޕޭއިން އިންތިޒާމްކޮށްގެން ބޭއްވި ބައްދަލުވުމުގައި ވާހަކަ ދައްކަވަމުން ރައީސް ސާލިހު ވިދާޅުވީ ތިން ދައުރުގަ ވެރިކަމުގަ ހުރުމަށްޓަކާ ގާނޫނު އަސާސީއަށް ބަދަލު ގެނެސްގެންވެސް އެކަން ކުރާނެ ވާހަކަ ނަޝީދު ވިދާޅުވަމުން ގެންދަވާ ކަމުގައެވެ. އަދި މިއީ ވަރަށް ފުންކޮށް ވިސްނާލަންޖެހޭ މައްސަލައެއް ކަމުގައި ރައީސް ސާލިހު ވިދާޅުވިއެވެ.
ކާކުތޯ ގާނޫނު އަސާސީ ބަދަލުކޮށްގެން ވެރިކަމަށް އަންނަން އުޅެނީ. ވެރިކަން ވެރިކަން، ވެރިކަން ނޫން އެެއްޗެއް ނެތް. ނިޒާމު ބަދަލު ކޮށްގެންވެސް، ގާނޫނުއަސާސީއަށް ބަދަލު ގެނެސްގެންވެސް ވެރިކަމަށް އަންނަން އުޅެނީ ކޮން ބޭފުޅެއްކަން ކާކުކަން ތި ހުރިހާ ބޭފުޅުންނަށް އެނގިވަޑައިގަންނަވާނެ.
ނަޝީދު ބޭނުންފުޅުވަނީ ގާނޫނު އަސާސީ ބަދަލު ކޮށްގެންވެސް ހަމައެކަނި ވެރިކަން ކަމުގައި މޭރުން ކުރައްވަމުން ރައީސް ސާލިހު ވިދާޅުވިއެވެ.
އަދި ރައީސް އެެދިވަޑައިގަތީ މި ކެމްޕޭންގައި ވޯޓު ދެއްވާއިރު އެމްޑީޕީގެ މެމްބަރުން މި ހުރިހާ ކަމަކަށްވެސްް ވިސްނުމަށެވެ. ރައީސް އިތުރަށް ވިދާޅުވީ ރިޔާސީ ނިޒާމެއްގައި އޮންނަނީ ދެދައުރު ކަމަށާއި ދެދައުރަށްވުރެ އިތުރަށް ވެރިކަމަށް ކުރިމަތިވެސް ނުލައްވާނެ ކަމުގައެވެ.
ހުޅުމާލޭގައި ދިރިއުޅުއްވާ އެމްޑީޕީގެ ގިނަ އަދަދެއްގެ މަމްބަރުން ބައިވެރިވި މި ބައްދަލުވުމުގައި ވާހަކަ ދައްކަވަމުން ރައީސް ސާލިހު ވިދާޅުވީ އެމަނިކުފާނަކީ ރިޔާސީ ނިޒާމަށް ތާއީދުކުރާ މީހެއް ކަމަށާއި، ރިޔާސީ އިންތިޚާބެއްގައި ކުރިމަތި ލައްވައިގެން މިހުންނެވީ އެހެންވެގެން ކަމަށެވެ.
ބަރުލަމާނީ ނިޒާމަށް އަޅުގަޑު ތާއީދު ކުރާނަމަ، ރިޔާސީ އިންތިޚާބަކަށް ކުރިމައްޗެއް ނުލީސް.
ރައީސް ސާލިހު ވިދާޅުވިއެވެ.
އިތުރަށް މި ޖަލްސާގައި ވާހަކަ ދައްކަވަމުން ރައީސް ވިދާޅުވީ ރިޔާސީ ނިޒާމެއްގައި އޮންނަނީ ދެދައުރު ކަމަށާއި ދެދައުރަށްވުރެ އިތުރަށް ވެރިކަމުގައި ނުވެސް ހުންނަވާނެ ކަމަށާއި އެއަށްވުރެ އިތުރަށް އިންތިޚާބަކަށް ކުރިމަތިވެސް ނުލައްވާނެ ކަމަށެވެ. އަދި ވިދާޅުވީ ބަރުލަމާނީ ނިޒާމެއްގައިވެސް ވެރިކަމުގެ ތެރޭގައި އެމަނިކްފާނު ދެމި ނުހުންނަވާނެ ކަމުގައެވެ.
ރިޔާސީ ނިޒާމެއްގައި އޮންނަނީ ދެ ދައުރު. އަޅުގަޑު ނެތިން ދެ ދައުރަށްވުރެ އިތުރަކަށް އިންތިޚާބަކަށް ކުރިމަތި ލާކަށްވެސް، އަޅުގަޑު ނެތިން ބަރުލަމާނީ ނިޒާމެއްގަވެސް ވެރިކަމުގެ ތެރޭގަ ދެމިހުންނާކަށް.
ދެދައުރަށްވުރެ އިތުރަށް ބަރުލަމާނީ ނިޒާމެއްގަވެސް ވެރިކަން ކުރައްވަން ބޭނުންފުޅު ނުވާކަމަށް ވިދާޅުވަމުން މި ޖަލްސާގައި ރައީސް ސާލިހު ވިދާޅުވިއެވެ.
