އަފްއާނިސްތާންގެ ވެރިރަށް ކާބުލްގައި ހުންނަ އެގައުމުގެ ފޮރިންގ މިނިސްޓްރީގެ ބޭރުގައި ބޮމެއް ގޮއްވާލައިފިއެވެ. އަފްއާނިސްތާނުގެ ސީނިއަރ ފުލުހުންންގެ އޮފިސަރުންނާއި ހަވާލާދީ ބައިނަލްއަގުވާމީ މީޑީއާތަކުން ރިޕޯޓު ކޮށްފައިވާ ގޮތުގައި މި ބޮމުގެ ހަމަލާގައި ބައެއް މީހުން މަރުވެ އަދި އަނިޔާވެފައި ވެއެވެ.
މި ބޮން ގޮއްވާލާފައިވަނީ އަފްއާނިސްތާންގެ ގަޑިން ހަވީރު 4 ޖަހާކަން ހާއިރުއެވެ. އަފްއާނިސްތާންގެ ފުލުހުންގެ ތަރުޖަމާން ޚާލިދު ޒަދުރާން ވިދާޅުވެފައިވާ ގޮތުގައި ސެކިއުރިޓީ ޓީމްތައް މިހާރުވަނީ މި ސަރަހައްދަށް ގޮސްފައެވެ.
މި ހަމަލާއާއި ގުޅިގެން އަފްއާނިސްތާންގެ ފޮރިންގ މިނިސްޓްރީންނާއި އަދި އިންޓީރިއަރ މިނިސްޓްރީން އެއްވެސް ކޮމެންޓެއް ކޮށްފައެއް ނުވެއެވެ.
ބައެއް މީޑިއާ ރިޕޯޓުތައް ބުނާ ގޮތުގައި ޖާނުންފިދާވެގެން ދިން މި ހަމަލާގައި 20 މީހުންވަނީ މަރުވެފައެވެ. ކާބުލްގައި ޖާނުންފިދާވުމުގެ މި ހަމަލާ ދީފައިމިވަނީ ކާބުލްގައި ހުންނަ އަސްކަރީ އެއަރޕޯޓުގައި ހިނގި ވަރުގަދަ ގޮވުމުގެ ހާދިސާއެއްގައި 10 މީހަކު މަރުވިތާ 3 ދުވަސް ފަހުންނެވެ.
އަދި މި ހަމަލާ ދީފައި މިވަނީ، 2021ވަނަ އަހަރު ވެރިކަމަށް އައުމަށްފަހު އެގައުމުގެ ސެކިއުރިޓީގެ ހާލަތު ރަގަޅު ކުރުމަށް މަސައްކަތް ކުރަމުންދާކަމަށް އެގައުމުގައި އޮތް ތާލިބާން ސަރުކާރުން ބުނެފައިވަނިކޮށެވެ.
