ޕާކިސްތާންގެ މަޝްހޫރު އެކްޓަރު އަދި ބޮލީވުޑްގެ ވެސް ބައެއް ފިލްމް ތަކުން ފެނިގެން ގޮސްފައިވާ ފަވާދް ހާންގެ ފިލްމް "ދަ ލެޖެންޑް އޮފް މައުލާ ޖެޓް" އިންޑިއާގައި ރިލީޒްކުރުން ފަސްކޮށްފި އެވެ. މިއީ 10 އަހަރަށް ވުރެ ދިގު މުއްދަތެއްގެ ތެރޭ އިންޑިއާގައި އަޅުވަން އޮތް ޕާކިސްތާނުގެ ފުރަތަމަ ފިލްމެވެ.
ދުނިޔޭގެ އެކި ކަންކޮޅުތަކުން ބޮޑު މަގުބޫލު ކަމެއް ހޯދި ފިލްމް އިންޑިއާގެ މަލްޓިޕްލެކްސް ޗެއިންއެއް ކަމަށްވާ އައިނޮކްސް ލެޝާ އިން މިދިޔަ މަހުގެ 26 ވަނަ ދުވަހު ބުނެފައިވާ ގޮތުގައި އިންޑިއާގެ އުތުރުގެ ސްޓޭޓެއް ކަމަށްވާ ޕަންޖާބުގެ އިތުރުން ވެރިރަށް ނިއު ދިއްލީގެ ހޮވާލެވޭ ސިނަމާތަކުގައި ވެސް ފިލްމު ދެއްކުމަށް އޮތީ ހަމަޖެހިފަ އެވެ. ނަމަވެސް އިނޮކްސް އިން ޕްރެސް ޓްރަސްޓް އޮފް އިންޑިއާ (ޕީޓީއައި) ނިއުސް އެޖެންސީއަށް ކަށަވަރުކޮށްދިން ގޮތުގައި ފިލްމު ރިލީޒްކުރުން ލަސްވެފައިވާކަން ޑިސްޓްރިބިއުޓަރުން ވަނީ އަންގައިފަ އެވެ.
ބިލާލް ލަޝާރީ ޑައިރެކްޓްކޮށް އަންނަ މަހުގެ 13 ގައި ރިލީޒްކުރާ ޕާކިސްތާނުގެ އެކްޝަން ފިލްމު، "ދަ ލިޖެންޑް އޮފް މައުލާ ޖެޓް" ގައި ފަވާދު ފެންނާނީ "ފައިޓާ" އެއްގެ ރޯލުންނެވެ. މިހާތަނަށް 10 މިލިއަން ޑޮލަރަށް ވުރެ ބޮޑު އާމްދަނީއެއް ހޯދާފައިވާ އެ ފިލްމް އަކީ މިހާތަނަށް އެންމެ ބޮޑު އާމްދަނީއެއް ހޯދި ޕާކިސްތާނު ފިލްމެވެ.
ފިލްމު ރިލީޒްކުރުން ލަސްވި ސަބަބާ ބެހޭ ގޮތުން އިންޑިއާގެ ސެންސަރުޝިޕް ބޯޑުން އަދި ރަސްމީކޮށް އެއްޗެއް ބުނެފައެއް ނުވެ އެވެ. މިއީ ފާއިތުވި 11 އަހަރުގެ ތެރޭގައި އިންޑިއާގައި ރިލީޒްކުރަން އޮތް ޕާކިސްތާނުގެ ފުރަތަމަ ފިލްމެވެ.
މި ފިލްމް އަކީ ފިލްމަކީ ޕާކިސްތާނުގެ އެންމެ އަގު ބޮޑު އެއް ފިލްމު ކަމަށްވެ އެވެ. ފިލްމުގައި ފަވާދުގެ އިތުރުން ބޮލީވުޑްގައި ކުރިން މަސައްކަތްކުރި މާހިރާ ޚާނާއި ޕާކިސްތާނުގެ ތަރިން ކަމަށްވާ ހަމްޒާ އަލީ އާއި ހުމައިމާ މާލިކް އަދި ފާރިސް ޝާފީ ކަހަލަ ތަރިން ފެންނާނެ އެވެ.
