ކުރީގެ ރައީސް އަދި އިދިކޮޅު ރިޔާސީ ކެންޑިޑޭޓު ޢަބްދުﷲ ޔާމީން ޢަބްދުލްޤައްޔޫމުގެ މައްޗަށް ދަޢުލަތުން ކުރި ޚިޔާނާތާއި ރިޝްވަތުގެ ތުހުމަތުގައި، 2 ދަޢުވާއެއް ސާބިތުވެ 11 އަހަރަށް ޖަލަށް ލާން އިއްޔެ ކުރިމިނަލް ކޯޓުންވަނީ ހުކުމް ކޮށްފައެވެ.

މިއީ އެމްއެމްޕީއާރުސީގެ ޚިޔާނާތުގެ ތުހުމަތުގައި ޔާމިންގެ މައްޗަށް ދަށު ކޯޓުން ހުކުމް ކުރި ދެވަނަ ފަހަރެވެ. ދައުލަތުގެ ފައިސާއަށް ޚިޔާނާތްތެރިވުމުގެ ކުށުގައި ޔާމިންގެމައްޗަށް އެންމެ ފުރަތަމަ ކުރިމިނަލް ކޯޓުން އިއްވި ހުކުމް ސުޕްރިމް ކޯޓުން ބާތިލް ކުރުމާއިގުޅިގެން ޖަލުން މިނިނަވްވިތާ އަހަރެއްހާ ދުވަސްފަހުން ވ. އާރަށް ކުއްޔަށް ދިނުމުގައި ރިޝްވަތު ގަބޫލު ކުރުމާއި މަނީ ލޯންޑަރ ކުރުމުގެ ކުށުގައި ކުރިމިނަލް ކޯޓުން މިފަހަރު ޔާމިންގެ މައްޗަށް އިއްވާފައިވަނީ 11 އަހަރަށް ޖަލަށް ލުމުގެ އިތުރުން، 5 މިލިއަން ޑޮލަރުން ޖޫރިމަނާކޮށް، އެފައިސާ މީރާއަށް ކުރިޔަށް އޮތް 6 މަސްދުވަހުގެ ތެރޭގައި ދައްކާ ޚަލާސް ކުރުމަށެވެ.

ޔާމިނުގެ މައްޗަށް ސާބިތުވި ޚިޔާނާތާއި މަނީ ލޯންޑަރ ކުރުމުގެ ކުށުގައި، ކުރިމިނަލް ކޯޓުން އިއްޔެ ކޮށްފައިވަނީ ދެ ހުކުމެކެވެ. އެއީ ރިޝްވަތު ގަބޫލުކުރުމާއި މަނީ ލޯންޑަރ ކުރުމުގެ ދައުވާ ސާބިތުވެ ކޮށްފައިވާ ދެ ހުކުމެވެ.

ފުރަތަމަ ދައުވާއަކީ ވ. އާރަށް ކުއްޔަ ދިނުމުގެ މުއާމަލާތުގައި ރިޝްވަތު ގަބޫލުކުރި ކަމުގެ ކުށުގެ ދައުވާއެވެ. މި ދައުވާ ސާބިތުވެ ކުރިމިނަލް ކޯޓުން ހުކުމް ކޮށްފައިވަނީ ޔާމިން 4 އަހަރަށް ޖަލަށް ލާށެވެ. މިހުކުމް އިއްވާފައިވަނީ އަސާސީ މިންގަޑަށްވުރެ އެއްދަރަޖަ މަތިކޮށްފައެވެ. އެއް ދަރަޖަ މަތިކުރި ސަބަބައެއް ކަމުގައި ހުކުމް އިއްވަމުން ގާޒީ ވިދާޅުވެފައިވަނީ، ޔާމިންއަކީ ދައުލަތުގެ ވެރިއެއްގެ ހައިސިއްޔަތުން ރައްޔިތުންނަށް ޖަވާބުދާރީ ވާންޖެހޭ ޒިންމާދާރު މަގާމެއްގައި ހުރި މީހަކަށް ވުމެވެ.

ދެވަނަ ދައުވާއަކީ އެ މުއާމަލާތުން ނުހައްގުން ހޯދި ފައިސާ ލޯންޑަރ ކުރުމުގެ ކުށުގެ ދައުވާއެވެ. މިކުށް ސާބިތުވެ، ކުރިމިނަލް ކޯޓުން ޔާމިންގެ މައްޗަށް އިއްވާފައިވަނީ 11 އަހަރުގެ ޖަލު ހުކުމެކެވެ. އޭގެ އިތުރުން 5 މިލިއަން ޑޮލަރުން ޖޫރިމާނާކޮށް، އެފައިސާ ކުރިޔަށް އޮތް 6 މަސްދުވަހުގެ ތެރޭގައި މީރާއަށް ދެއްކުމަށްވެސް ކުރިމިނަލް ކޯޓުން ޔާމިންގެ މައްޗަށް ހުކުމް ކޮށްފައިވެއެވެ.

ޔާމިން ޖަލަށް ލުމަށް ކުރިމިނަލް ކޯޓުން ހުކުމް ކުރުމާއި ގުޅިގެން ޖަލަށް ދިއުމަށް ޔާމިން މާލެއިން ފުރާފައިވަނީ ރޭ އިރާކޮޅު 7:45 ހާއިރުއެވެ. އެއަށްފަހު ކަރެކްޝަންސްއިން ކުރި ޓުވީޓެއްގައި ބުނެފައިވަނީ ރައީސް ޔާމީނަށް ކުރިމިނަލް ކޯޓުން ހުކުމް ކުރުމާއި ގުޅިގެން އެ ސާވިސްގެ ބެލުމުގެ ދަށަށް ގެނެވި މާފުށި ޖަލުގައި ބަންދު ކުރެވިފައި ކަމަށެވެ.

މިއަދު ކްރިމިނަލް ކޯޓުން ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމް އަށާއި ކުރީގެ މަޖްލިސް މެންބަރު ޔޫސުފް ނައީމް ގެ މައްޗަށް ޖަލު ހުކުމެއް ކުރުމާ ގުޅިގެން، މިހާރު ވަނީ މި ސަރވިސްގެ ބެލުމުގެ ދަށަށް ގެނެވި މާފުށީ ޖަލުގައި ބަންދުކުރެވިފައެވެ.

— Maldives Correctional Service (@CorrectionsMv) December 25, 2022

ދިގު މުއްދަތަކަށް ޖަލަށް! ކެނޑިޑަސީއަށް ވާނީ ކިހިނެއް!

ދައުލަތުގެ ފައިސާއަށް ޚިޔާނާތްތެރިވި ކަމުގެ ކުށުގައި ކުރިމިނަލް ކޯޓުން ޔާމިން 11 އަހަަރަށް ޖަލަށްލާން ހުކުމް ކުރިއިރު، ޔާމިން ގެންދެވީ ޕީޕީއެމްގެ ރިޔާސީ ކެނޑިޑޭޓުގެ ހައިސިއްޔަތުން ކުރިޔަށް އޮތް 2023ވަނަ އަހަރުގެ ރިޔާސީ އިންތިޚާބަށް ކެމްޕޭން ކުރައްވަމުންނެވެ.

އެއީ ފާއިތުވި ޖުލައިމަހު، ވާދަވެރި ޕްރައިމަރީއަކާ ނުލާ، ޔާމިންއަށް އިދިކޮޅު ޕީޕީއެމްގެ ރިޔާސީ ޓިކެޓް އެޕާޓީން ހަވާލު ކުރުމާއި ގުޅިގެންނެވެ. އަދި ޔާމިން ޖަލަށްލާން ކުރިމިނަލް ކޯޓުން ހުކުމް ކުރުމުގެ ކުރިންވެސް، ޖަލަށް ދާން ޖެހޭނެކަމަށް ބަލާ، ޕީޕީއެމްގެ އިސް ބައެއް ބޭފުޅުން ވިދާޅުވަމުން ގެންދަވާފައިވަނީ، ޖަލަށް ދާންޖެހުނު ނަމަވެސް، އެ ޕާޓީގެ ރިޔާސީ ކެނޑިޑޭޓަކީ ޔާމިން ކަމަށާއި، ކުރިޔަށް އޮތް ރިޔާސީ އިންތިޚާބުގެ ވޯޓު ކަރުދާސްކޮޅުގައި ޔާމިންގެ ނަން އޮންނާނޭ ކަމުގައެވެ.

އެހެންނަމަވެސް، ސިޔާސީ ޖަޒްބާތުގައި، ނުވަތަ އާންމު ބައެއް މެމްބަރުންގެ ރުހުން ހޯދުމަށް އެޕާޓީގެ އިސް ބައެއް ބޭފުޅުން މިބީދައިން ވާހަކަ ދައްކަވަމުން ގެންދެވި ނަމަވެސް، މިއީ ޖަޒުބާތު ނުޖެހި، މިއަށްވުރެ ފުންކޮށް ވިސްނާލުމުން އަދި މުޅިން ތަފާތު މަންޒަރެއް ފެންނާން އޮތް މައްސަލައެއް ކަމުގައި ދަންނަވާން ޖެހެއެވެ.

އޭގެ އެއް ސަބަބަކީ، ދިގުމުއްދަތެއްގެ ހުކުމެއް ތަންފީޒުކުރައްވަން ޔާމިން ފެއްޓެވުމާއެކު، ރިޔާސީ އިންތިޚާބުގައި ވާދަ ކުރެއްވުމަށް ގާނޫނީގޮތުން ޔާމިނަށް ކުރިމަތުވެގެންދާނެ ހުރަސްތަކާއި، ކެނޑިޑޭޑެއްގެ ހައިސިއްޔަތުން އިންތިޚާބުގައި ވާދަކުރެއްވުމުގައި އޭގެ ސަބަބުން ކުރިމަތިލައްވަން ޖެހިވަޑައިގަންނަވާނެ ގޮންޖެހުންތަކެވެ.

މިގޮތުން، ކުރިމިނަލް ކޯޓުގެ ހުކުމަށްފަހު 11 އަހަރުގެ ޖަލުހުކުމެއް ތަންފީޒު ކުރައްވަން ފެއްޓެވުމާއެކު، ޕީޕީއެމްގެ ރިޔާސީ ކެނޑިޑޭޓެއްގެ ހައިސިއްޔަރުން ކުރިޔަށް އޮތް ރިޔާސީ އިންތިޚާބުގައި ވާދަ ކުރެއްވުމުގެ ގާނޫނީ ޝަރުތެއް، ޔާމިންގެ ކިބައިން ވަނީ އުނިވެގެން ގޮސްފައެވެ.

ގާނޫނު ގާނޫނުއަސާސީގެ 109 ވަނަ މާއްދާގެ ޅ.ނގައި ބުނެފައިވަނީ ޖިނާއީ ކުށެއް ކުރިކަން ސާބިތުވެގެން އެއް އަހަރަށް ވުރެން ދިގު މުއްދަތެއްގެ ހުކުމެއް ކޮށްފައިވާ މީހަކު ނަމަ، އެ ހުކުމް ތަންފީޒުކޮށް ނިމުނުތާ ނުވަތަ އެ ހުކުމުން ކަނޑައެޅުނު އަދަބު މާފު ކުރެވުނުތާ ތިން އަހަރު ވާން ޖެހޭނެ ކަމަށެވެ.

އެހެންކަމުން ގާނޫނު އަސާސީގައި ބަޔާން ކުރާގޮތުން، ރިޔާސީ އިންތިޚާބަށް ކުރިމަތިލާ މީހެއްގެ ކިބައިގައި ހުންނާންޖެހޭ ޝަރުތުތަކުގެ ތެރެއިން ޝަރުތެއް އުނިވެފައިވާއިރު، ޔާމިން ޖަލުހުކުމް ތަންފީޒު ކުރައްވަން ފެއްޓެވިއިރު ކުރިޔަށް އޮތް ރިޔާސީ އިންތިޚާބާ ދެމެދު ދެން އޮތީ އެންމެ 9 މަސްދުވަހެވެ.

އެހެންނަމަވެސް ފާހަގަކޮށްލާން ޖެހޭ އަނެއް ނުކުތާއަކީ، ޔާމިންގެ މައްޗަށް ކުރިމިނަލް ކޯޓުން އިއްވި ހުކުމް ނިހާއީ ހުކުމަކަށް ބަދަލުވެގެންދާނީ ޝަރީޢަތުގެ އެންމެ ފަހުގެ މަރުހަލާއާއި ހަމައިންކަމެވެ. އެއީ ސުޕްރީމް ކޯޓުން މިމައްސަލަގާއި އެންމެ ފަހުބަސް އިއްވުމާއި ހަމައިންނެވެ.

މިގޮތުން ގާނޫނު އަސާސީގެ 113 ވަނަ މާއްދާގައިވާ ގޮތުން ރިޔާސީ ކެންޑިޑޭޓެއްގެ ޝަރުތާ މެދު ހިލާފު އުފެދިއްޖެ ނަމަ، ގޮތް ނިންމުމުގެ ބާރު ވެސް އޮތީ ހަމައެކަނި ސްޕްރީމް ކޯޓަށެވެ.

އެހެންކަމުން ޔާމިނަށް ތާއީދުކުރާ ބައެއް ފަރާތްތަކުން ދެކޭ ގޮތުގައި، ގާނޫނު އަސާސީގެ 109ވަނަ މާއްދާގައި ވާގޮތުގެ މަތިން، އިލެކްޝަންސް ކޮމިޝަނުން ޔާމިންގެ ކެނޑިޑަސީ ބަލައިނުގަތުމަށް ނިންމައިފިނަމަ، ދެން އެމައްސަލާގައި ޕީޕީއެމްއަށް ދާންޖެހޭނީ ސުޕްރީމް ކޯޓަށެވެ. އެއީ ގާނޫނު އަސާސީގެ 109ވަނަ މާއްދާގައިވާ ގޮތުގެމަތިން ރިޔާސީ ކެނޑިޑޭޓެއްގެ ޝަރުތާމެދު ޚިލާފް އުފެދިއްޖެނަމަ ގޮތް ނިންމުމުގެ ބާރު އެ ގާނޫނު އަސާސީން ސުޕްރީމް ކޯޓަށް ދީފައިވާތީއެވެ.

އެހެންނަމަވެސް ގަބޫލުކުރާން ޖެހިފައިވާ އެއް ހަގީގަތަކީ، މިހާރުގެ ހާތަކަށް ބަލާއިރު، ޔާމީން ޖަލު ހުކުމް ތަންފީޒު ކުރަމުންދާހާ ހިނދަކު، އިންތިޚާބުގައި ވާދަކުރުމާމެދު ގާނޫނީގޮތުން ގިރާ ކުރާންޖެހިފައިވާ ބޮޑެތި ހުރަސްތަކެއް ހުރިކަމެވެ. އަދި ސިޔާސީ މަސްރަހު އެބުރެމުންދާ ގޮތުގެ މައްޗަށް ރަގަޅަށް ރިއާޔަތްކުރާއިރު، ޖަލުހުކުމް ތަންފީޒުކުރަމުން، ސުޕްރީމް ކޯޓުގެ ނިންމުމަކައެކު ރިޔާސީ އިންތިޚާބުގައި ވާދަކުރުމަށް އެންމެ ފަހު ވަގުތާއި ހަމައަށް މަޑުކޮށް ބަލަން ތިބުމަކީ އިދިކޮޅު ފަރާތްތަކަށް ހޯދިދާނެ ހައްލެއް ކަމުގައިވެސް ގަބޫލެއް ނުކުރެވެއެވެ.

ސިޔާސީ ގޮތުން އެތައް ހުރަހެއް! ކެނޑިޑަސީއަށް ޕީޕީއެމް އެތެރޭގަ އޮތް ޝައުގުވެރިކަން!

ކުރިޔަށްދާ ޔާމިންގެ ޝަރީއަތްތަކާއެކު، އަދި ރާއްޖޭގެ އެހެނިހެން ސިޔާސީ ލީޑަރުންނާއި ސިޔާސީ ޕާޓީތަކުގެ މައްޗަށް ޔާމިން ފާއިތުވެދިޔަ ތަނުގައިވެސް ދައްކަވަމުން ގެންދަވާފައިވާ ދެކޮޅުވެރި ކަމާއި، ޒާތީ ހަސަދައާއެކު، ގިނި ކަންޏާ ނިކުމެ ވަޑައިގެން ކުރިޔަށް އޮތް ރިޔާސީ އިންތިޚާބު އިދިކޮޅު ޕާޓީއަށް ކާމިޔާބު ނުކުރެވޭނެކަމަށް ދެކޭ އެތައް ބޭފުޅުންނެއް ޚުދު ޕީޕީއެމްގެ ލީޑަރޝިޕްގައިވެސް އެބަ ތިއްބެވިއެވެ.

އޭގެ އެންމެ ބޮޑު އެއް ސަބަބަކީ ޔާމިންގެ ލީޑަރޝިޕްގައި އެޕާޓީއާއެކު ކޯލިޝަން ހަދާ، ރިޔާސީ އިންތިޚާބަށް ވަރުގަދަ އިއްތިހާދެއް އެކުލަވާލުމުގެ ފުރުސަތު އިދިކޮޅު ޕީޕީއެމްއަށް އެކީ ކަހަލަ ގޮތަކަށް ގެއްލިގެން ގޮސްފައި ވުމެވެ. އޭގެ ނަތީޖާއެއްގެ ގޮތުން، ޔާމިނު މިނިވަންވެ ހުންނަވާ، ޔާމީނާއެކީ އިދިކޮޅު ޕީޕީއެމްއަށް ރިޔާސީ އިންތިޚާބާ ކުރިމަތިލާން ޖެހޭނީ ގިނިކަންޏާކަން އޮތީ ވަރަށްވެސް ބޮޑަށް ކަށަވަރުވެ ޔަގީން ކުރެވިގައެވެ.

އެހެންކަމުން، އެޕާޓީގެ އެތެރޭގައި ޔާމީންގެ ނުފޫޒާއި ބާރު އޮތް މިންވަރަށް ބަލާ، މި ވިސްނުން އާންމުކުރަން ފަސްޖެހިފައި ތިބި ނަމަވެސް، ޕީޕީއެމްގެ ލީޑަރޝިޕްގައި ތިއްބެވި އެތައް ބައެއްގެ ވިސްނުން މިބީދައިން ހުރިކަން އެއީ ވަންހަނާ ވެފަ އޮތްކަމެއް ނޫނެވެ.

ހަމަ އެފަަދައިން، ޔާމިންގެ މައްޗަށް ޖަލު ހުކުމެއް އަންނާނެކަމަށް ގިނަބަޔަކު ދެކެމުން އައުމައެކު، އޭގެ އިތުރުން ޝަރީއަތް ކުރިޔަށް ދިޔަ ގޮތަށް ބަލާ، ޔާމީނަށް ޝަރީއަތް ކާމިޔާބު ކުރުމުގެ ފުރުސަތު ނެތްކަމަށް ދެކި، އަދި ޔާމީން ދިގު މުއްދަތަކަށް ޖަލަަށް ދާން ޖެހި، ކެނޑިޑަސީ އާ ބޭފުޅަކަށް ދޭން ޖެހިއްޖެ ހާލަތެއްގައި އެފަދަ ފުރުސަތަކަށް ޕީޕީއެމްގެ އެތެރޭގައި އޮތް ޝައުގުވެރިކަމަކީވެސް "އެންމެ ދަންނަ ބޮޑު ސިއްރެއްގެ" ގޮތުގައި އޮތް ކަމެއްކަމުގައިވެސް ދަންނަވާން ޖެހެއެވެ.

އަދި މި ވާދަވެރިކަމުގައި ޕީޕީއެމްގެ އެތެރޭގައި ދެފެކްޝަނެއް އުފަންވެ، ދެފެކްޝަންގެ މެދުގައި އޮތް ވާދަވެރިކަން މީޑިއާތަކާއި ހަމައަށް ފާއިތުވެދިޔަ ތަނުގައި ތިލަވެގެން ގޮސްފައިވާކަންވެސް މި ފުރުސަތުގައި ފާހަގަށް ކޮށްލާން ޖެހެއެވެ.

މިގޮތުން، ޔާމިން ޖަލަށް ލާނޭކަމަށް ބަލާއި، އަދި އެއަށްފަހު ރިޔާސީ އާ ކެނޑިޑޭޓަކު އައްޔަން ކުރުމަށްޓަކާ ރިޔާސީ ޕްރައިމަރީއަކަށް ދާންޖެހިދާނެކަމަށް ބަލާ، ޕީޕީއެމްގެ ލީޑަރޝިޕްގެ ބައެއް ބޭފުޅުން އެޕާޓީގެ އެކްޓިވިސްޓުން އޮންބޯޑުކޮށް، މިފަދަ ހާލަތަކަށް މާކުރިއްސުރެ މަސައްކަތް ފަށާފައިވާކަންވެސް މިއީ ސާފުކޮށް ފެންނާން އޮތް ވަރަށްވެސް ބޮޑު ހަގީގަތެއްވެސް މެއެވެ.

ޔާމިންގެ ކެނޑިޑެސީއާއެކު ޕީޕީއެމްއަށް ކުރިޔަށް ދެވިދާނެތަ؟

ރާއްޖޭގެ ސިޔާސީ މަސްރަހުގެ ކުރު މާޒީއަށް ބަލާއިރު، ފާއިތުވެދިޔަ ކޮންމެ އިންތިޚާބަކީވެސް، އެވަގުތެއްގެ އިދިކޮޅު ކެނޑިޑޭޓަކަށް އިންތިޚާބުގައި ވާދަކުރުމަށް ގިނަގުނަ ހުރަސްތަކަކާއި ގޮންޖެހުންތަކާއި ކުރިމަތިލާންޖެހުނު އިންތިޚާބުތަކެއް ކަމުގައި ދަންނަވާން ޖެހެއެވެ. މިގޮތުން އެންމެ ޚާއްސަ ގޮތެއްގައި ފާހަގަ ވާން އޮތީ 2018 ވަނަ އަހަރުގެ ރިޔާސީ އިންތިޚާބެވެ.

މިގޮތުން، އޭރު ދިގު މުއްދަތެއްގެ ޖަލު ހުކުމެއްގައި ހުންނެވި، އިދިކޮޅު ޕާޓީގެ ރައީސް މުހައްމަދު ނަޝީދަކީ އެމްޑީޕީގެ ރިޔާސީ ކެނޑިޑޭޓު ކަމުގައި އެޕާޓީން 2018ގެ ރިޔާސީ އިންތިޚާބުގެ ކުރިން ނިންމިއެވެ. އަދި އެންމެ ފަހުވަގުތާއި ހަމައަށްވެސް ނަޝީދަށް ރިޔާސީ އިންތިޚާބުގައި ވާދަކުރެވެންވާނެކަމަށް އެޕާޓީން ވަކާލާތު ކޮށްފައި ވެއެވެ. ރިޔާސީ އިންތިޚާބުގެ ވޯޓު ކަރުދާސްކޮޅުގައި ނަޝީދުގެ ނަން އޮންނާނޭކަމަށް ހަމަ މި ބީދައިން ގެންދިޔައީ ބުނަމުންނެވެ.

އެހެންނަމަވެސް، ރިޔާސީ އިންތިޚާބުގައި ވާދަކުރުމަށް ނަޝީދު އޭރު ކުރައްވަމުން ގެންދެވި މަސައްކަތްތަކުގެ އެންމެ ބޮޑު ހުރަހަކަށް ވެގެން ދިޔައީ، އެމަސައްކަތުގައި ދެމި ތިއްބަވާ، އިންތިޚާބުގައި ވާދަކުރުމުގެ ފުރުސަތު އެކީ ގެއްލިގެން ހިގައިދާނެކަމަށް، އޭރު އުފެދިފައިއޮތް އިދިކޮޅު ކޯލިޝަނަށް ގަބޫލުރެވިގެން ދިޔަދިއުމެވެ.

އަދި އޭގެ ނަތީޖާއެއްގެ ގޮތުން، ޖަލު ހުކުމުގައި އޭރު ތިއްބެވި ސިޔާސީ ފަރާތްތައް މިނިވަން ވުމަށް އޮތް ފުރުސަތު ގެއްލިގެން ދިއުމާއެކު، ކޮށްފައިވާ ހުކުމްތަކަށް ގޮންޖަހާ ރިޔާސީ އިންތިޚާބަށް އެނޫންގޮތެއް ނުހޯދާ އެގޮތުގައި ދެމި ތިބުމުގެ ގެއްލުމާއި ހަލާކު އިންތިހާއަށް ބޮޑުވެގެން ދާނެކަމަށް އޭރު އޮތް ކޯލިޝަނަށް ގަބޫލު ކުރެވުނެވެ. އާޚިރު ނަތީޖާއަކަށް ވެގެން ދިޔައީ، އޭރު އުފެދިފައިއޮތް މުޅި ކޯލިޝަން ރުހޭ ކެނޑިޑޭޓެއްގެ ގޮތުގައި މިހާރުގެ ރައީސް އިބުރާހިމް މުހައްމަދު ސާލިހު ރިޔާސީ އިންތިޚާބަށް ނިކުމެވަޑައިގެންނެވުމެވެ.

އެހެންކަމުން، ޔާމިން ދިގު މުއްދަތަކަށް ޖަލަށް ލުމާއެކު، އޭގެ ޖަޒްބާތުގައި އިދިކޮޅު ރިޔާސީ ކެނޑިޑޭޓަކީ ޔާމިންކަމުގައި އިދިކޮޅު ފަރާތްތަކުން ބުނަމުން ދިޔަނަމަވެސް، އާޚިރު ނަތީޖާއަކަށް ވެގެންދާނެ ސިޔާސީ ފޯމިއުލާއަކީ، ޔާމީންވެސް ޖަލުން މިނިވަންވާނެ، އަދި ރިޔާސީ އިންތިޚާބަށް މިހާރަށްވުރެ "މޮޅު އެހެން ގޮތެއް" ހޯދުން ނޫން އެހެންގޮތެއް އިދިކޮޅު ފަރާތްތަކަށް ނެތުންކަމުގައި މިއަދު ގަބޫލު ކުރާންޖެހެއެވެ.

އެހެންނަމަވެސް، މިހާރުގެ ހާލަތަށް ބަލާއިރު، މިފަދަ ފޯމިއުލާއެއް ނެރުމުގައި ޔާމީނަށް އޮތް އެންމެ ބޮޑު ނުރައްލަކަކީ، މިފަދަ އާ ފޯމިއުލާއަކަށް ވާސިލްވުމުގައި، އިދިކޮޅު ޕާޓީގެ ލީޑަރޝިޕްގައި މިހާރު ތިއްބެވި ވަކިވަކި ސިޔާސީ ފަރުދުން ހައްދަވާފާނެ، އެބޭފުޅުންނަށް ފައިދާކުރަނިވި ސިޔާސީ ޑީލްތައް ކަމުގައި ގިނަބަޔަކު ދަނީ ބުނަމުންނެވެ.