ޔޫއެން ހިއުމަން ރައިޓްސް ކައުންސިލްގެ ކުރިޔަށް އޮތް ދައުރުގެ އެއް ނާއިބު ރައީސަކަށް އދ. ގެ ދާއިމީ މިޝަންގެ ޖެނީވާ އޮފީހުގެ ދާއިމީ މަންދޫބަކަށް ރާއްޖެއިން ކަނޑައަޅުއްވާފައިވާ، ޑރ. އާސިމް އަހުމަދު މިއަދު އިންތިޚާބު ކޮށްފިއެވެ.

ފާއިތުވެދިޔަ އޮކްޓޯބަރުމަހު އިންތިޚާބުކޮށްފައިވާ، ކުރިޔަށް އޮތް، ހިއުމަން ރައިޓްސް ކައުންސިލްގެ ކުރިޔަށް އޮތް ދައުރުގެ ރައީސްކަމުގެ މަގާމަށް އިންތިޚާބު ކޮށްުފައިވަނީ ޗެކްރިޕަބްލިކްއިން ޖެނީވާއަށް ކަނޑައުޅުއްވާފައި ހުންނަވާ ދާއިމީ މަންދޫބު، އެމްބެސެޑަރ ވަލްލާވް ބަލެކްއެވެ. އޭގެ އިތުރުން އޭނާގެ ދަށުން މަސައްކަތް ކުރައްވާނެ 4 ނާއިބު ރައީސުން ވަނީ އިންތިޚާބު ކޮށްފައެވެ.

އެބޭފުޅުންނަކީ:

1. ބޮލީވިއާއިން ޖެނީވާއަށް ކަނޑައަޅުއްވާފައި ހުންނަވާ ދާއިމީ މަންދޫބު އެމްބެސެޑަރ މާއިރާ މަރީލާ މެކްޑޮނަލްޑް އަލްވަރޭޒް
2. ލަގްޒަމްބާގުން ޖެނީވާއަށް ކަނޑައަޅުއްވާފައި ހުންނަވާ ދާއިމީ މަންދޫބު އެމްބެސެޑަރ މާރލް ބިޗްލ
3. ގެމްބިއާއިން ޖެނީވާއަށް ކަނޑައަޅުއްވާފައި ހުންނަވާ ދާއިމީ މަންދޫބު އެމްބެސެޑަރ މުހައްމަދި އެމްއޯ ކާހު
4. އދ. ގެ ދާއިމީ މިޝަންގެ ޖެނީވާ އޮފީހުގެ ދާއިމީ މަންދޫބަކަށް ދިވެހިރާއްޖެއިން ކަނޑައަޅުއްވާފައި ހުންނަވާ ޑރ. އާސިމް އަހުމަދު

މި ހަތަރު ބޭފުޅުންގެ ތެރެއިން ގެމްބިއާގެ އެމްބެސެޑަރއަކީ ފާއިތުވެދިޔަ ދައުރުގައިވެސް ހިއުމަން ރައިޓްސް ކައުންސިލްގެ ނާއިބު ރައީސްކަން ކުރައްވާފައިވާ ބޭފުޅެކެވެ.

ޔޫއެން ހިއުމަން ރައިޓްސް ކައުންސިލްގެ ކުރިޔަށް އޮތް ދައުރު (2023-2025)ގެ ގޮނޑި ރާއްޖެއިން ކާމިޔާބު ކޮށްފައިވަނީ މިއަހަރުގެ އޮކްޓޯބަރުމަހުގެ 11 ވަނަ ދުވަހު އޮތް އިންތިޚާބުގައި، އޭޝިއާ ޕެސިފިކް ސަރަހައްދުން ވާދު ކުރިން 6 ގައުމުގެ ތެރެއިން އެކައުންސިލަށް އިންތިޚާބުކުރި 4 ގައުމުގެ ތެރެއިން ދެވަނައަށް އެންމެ ގިނައިން ވޯޓު ހޯދައިގެންނެވެ.

ރާއްޖެ ހިމެނޭ އޭޝިއާ ޕެސިފިކް ސަރަހައްދުން ވާދަކުރި 6 ގައުމުގެ ތެރެއިން އެންމެ ގިނައިން ވޯޓު ހޯދާފައިވަނީ ބަންގްލަދޭޝްއިންނެވެ. ވޯޓުލީ 190 ގައުމުގެ ތެރެއިން އެގައުމަށް ލިބިފައިވަނީ 160 ވޯޓެވެ. ދެވަނައަށް އެންމެ ގިނައިން ވޯޓު ލިބުނީ ރާއްޖެއަށެވެ. މިގޮތުން ރާއްޖެއަށް ލިބިފައިވަނީ 154 ވޯޓެވެ. މި ގުރޫފުން ދެން އިންތިޚާބުވި ދެ ގައުމަކީ ވިއެޓްނާމްއާއި ކިރިގިސްތާންއެވެ. ވިއެޓްނާމަށް 145 ވޯޓު ލިބުނުއިރު ކިރިގިސްތާނަށް ލިބުނީ 126 ވޯޓެވެ. މި ސަރަހައްދުން ވާދަކުރި 6 ގައުމުގެ ތެރެއިން 5 ވަނައަށް އެންމެ ގިނަ ވޯޓު ހޯދި ސައުތު ކޮރެއާއަށް 123 ވޯޓު ލިބުނުއިރު އެންމެ ފުލަށް ދިޔަ އަފްއާނިސްތާނަށް ލިބިފައިވަނީ 12 ވޯޓެވެ. ބަހުރެއިން ނަން އަބުރާ ގެންގޮސްފައިވި ނަމަވެސް އެގައުމަށް 1 ވޯޓު ލިބިފައި ވެއެވެ.

މިއިންތިޚާބުގައި، ކައުންސިލްގެ މެމްބަރު ގައުމުތަކުގެ ތެރެއިން މިއަހަރުގެ ޑިސެމްބަރުމަހުގެ ނިޔަލަށް ދައުރު ހަމަވާ 14 ގޮނޑިއަށް މެމްބަރުން އިންތިޚާބު ކޮށްފައި ވެއެވެ.

ޔޫއެން ހިއުމަންރައިޓްސް ކައުންސިލްގެ ކުރިޔަށް އޮތް ދައުރަށް އިންތިޚާބު ކުރި އޭޝިއާ ޕެސިފިކް ސަރަހައްދުގެ 4 ގޮނޑިއަށް ވާދަ ކޮށްފައިވަނީ، ރާއްޖޭގެ އިތުރުން، އަފްއާނިސްތާންއާއި ވިއެޓްނާމްއާއި ސައުތު ކޮރެއާއި، ކިރިގިސްތާންއާި ބަންގްލަދޭޝްއެވެ. މި ކައުންސިލަށް އޭޝިއާ ޕެސިފިކް ސަރަހައްދުން، އެންމެ ފުރަތަމަ ބަހުރެއިންއިން ވާދަ ކުރަމުން އައިނަމަވެސް، އެގައުމުން ވަނީ އެންމެ ފަހުވަގުތު ނަން އަބުރާ ގެންގޮސްފައެވެ. ބަހުރެއިންއިން ނަން އަބުރާ ގެންދިއުމުން، އެގައުމަށް ތާއީދުކުރި ގިނަ ގައުމުތަކެއްގެ ވޯޓު ވަނީ ރާއްޖެއަށް ލިބިގެން ގޮސްފައެވެ.

2015-2023 ގެ ޔޫއެން ހިއުމަން ރައިސްޓް ކައުސިލްގެ ގޮނޑިއަށް ރާއްޖެ އިންތިޚާބު ވެގެން ގޮސްފައިވާއިރު، މީގެ ކުރިންވެސް ދެ ފަހަރެއްގެމަތިން ރާއްޖެވަނީ މި ކައުންސިލްގެ މެމްބަރުކަން ކޮށްފައެވެ. އެއީ އެންމެ ފުރަތަމަ 2011 އިން 2013 އަށެވެ. ދެވަނަ ފަހަރަށް ރާއްޖެއިން މިކައުންސިލްގެ މެމްބަރުކަން ކޮށްފައިވަނީ 2014 އިން 2016 އަހަރަށެވެ.

އަދި 2013 ވަނަ އަހަރުވެސް ރާއްޖެވަނީ އޭޝިއާ ޕެސިފިކް ގުރޫޕުގެ ފަރާތުން މި ކައުންސިލް ނާއިބު ރައީސްކަންވެސް އަދާ ކޮށްފައެވެ.