ސާރކް ކަރަންސީ ސްވޮޕް ފްރޭމްވާކްގެ ދަށުން، ރާއްޖޭގެ މަރުކަޒީ ބޭންކު، އެމްއެމްއޭއިން ރިޒާވް ބޭންކު އޮފް އިންޑިއާ (RBI) އާއެކު 200 މިލިއަން އެމެރިކާ ޑޮލަރުގެ ކަރަންސީ ސްވޮޕް އެގްރީމަންޓެއްގައި މިއަދު ސޮއި ކޮށްފިއެވެ.
އެމްއެމްއޭއިން ހާމަ ކޮށްފައިވާ ގޮތުގައި މި ސްވޮޕް ފެސިލިޓީއިން، 200 މިލިއަން އެމެރިކާ ޑޮލަރާއި ހަމައަށް އިންޑިއާގެ ރިސާވް ބޭންކުން ޑްރޯވަލްސް ހެދުމުގެ ފުރުސަތު ފަހިވެގެން ދާނެކަމުގައެވެ. އަދި އެމްއެމްއޭއިން ބުނެފައިވަނީ މިއީ، ރާއްޖޭގެ ފޮރިންގ އެކްސްޗޭންޖް ލިކުއިޓީއަށް ލިބިގެންދާނެ ވަގުތީ ހައްލަކަށް ވެގެން ދާނެކަމުގައެވެ.
އިންޑިއާއެކު ކަރަންސީ ސްވޮޕް އެއްބަސް ވުމެއްގައި ސޮއި ކޮށްފައިވަނީ ކިހާ މުއްދަތެއްގައި ފައިސާ ދައްކާ ގޮތަށް ކަމެއް އަދި ޔަގީން ކުރެވިފައެއް ނުވެއެވެ. އެހެންނަމަވެސް މި އުސޫލުން ހަދާ ކަރަންސީ ސްވޮޕްތަކުގައި ފައިސާ ދެއްކުމަށް އާންމު ގޮތެއްގައި އެއްބަސްވަނީ އެހާ ދިގު މުއްދަތަކަށް ނޫންކަން ފާހަގަ ކޮށްލެވެއެވެ. އަދި ކަރަންސީ ސްވޮޕް ހަދަނީ، އެއްބަސްވުމުގައި ބަޔާން ކުރާ އަދަދަށް ދިވެހި ރުފިޔާ އިންޑިއާގެ ބޭންކުގައި ބަހައްޓައިގެންނެވެ. އެއީ އެފައިސާ އަބުރާ ދައްކާނެކަމުގެ އިތުބާރެއްގެ ގޮތުންނެވެ.
ރާއްޖެއިންވަނީ 2019ވަނަ އަހަރުވެސް އިންޑިއާއެކު 400 މިލިއަން ޑޮލަރުގެ ކަންރެންސީ ސްވޮޕެއް ހަދާފައެވެ. އެފައިސާ ރާއްޖެއިން އަދާކޮށް ޚަލާސް ކޮށްފައިވަނީ ފާއިތުވެދިޔަ އަހަރުއެވެ.
ފާއިތުވި ނޮވެމްބަރުމަހު އިންޑިއާއިންވަނީ ރާއްޖެއަށް 100 މިލިއަން ޑޮލަރުގެ ލޯނު އެހީއެއްވެސް ދީފައެވެ. މިއީވެސް ރާއްޖެއަށް ކުރިމަތިވެފައިވާ އިގްތިސާދީ ގޮންޖެހުންތަކުން އަރައިގަތުމަށް އިންޑިއާއިން ވެދީފައިވާ މާލީ އެހީތެރިކަމެކެވެ.
ރައީސް އިބުރާހިމް މުހައްމަދު ސާލިހު ވެރިކަމަށް ވަޑައިގެންނެވުމަށްފަހު އިންޑިއާއިން ދަނީ ރާއްޖެއަށް އެކި ދާއިރާތަކުގައި މާލީ ގިނަ އެހީތަކެއް ފޮރުކޮށް ދެމުންނެވެ.
