މިއަހަރު ރިލީޒް ކުރި ފިލްމު "ސަމްރާޓް ޕްރިތްވީރާޖް" އިން ރަސްކަލެއްގެ ގޮތުގައި ފެނިގެންދިއަ އެކްޓަރު އަކްޝޭ ކުމާރު އަނެއްކާވެސް ރަސްކަލެއްގެ ރޯލެއް ކުޅެން ފަށައިފިއެވެ.
ބުދަ ދުވަހު ވަނީ އޭނާ އައު ފިލްމްއެއްގެ ޝޫޓިން ފެށިކަން އިއުލާން ކޮށް ފިލްމުގައި އޭނާ ފެނިގެންދާނެ ގޮތްވެސް ބެލުންތެރިނަށް ދައްކާލައިފައެވެ. މިފަހަރުގެ ފިލްމަކީ ވެސް ކުރީގެ ރަސްކަލެއްގެ ބަޔޮޕިކެކެވެ.
އަކްޝޭ ކުރި ޕޯސްޓުގައި އޭނާ ފެނިގެންދަނީ ކުރީގެ ރަސްކަލެއް ކަމަށްވާ ޗަތުރަޕަތީ ޝިވާޖީ މަހާރާޖްގެ ގޮތުގައެވެ. މި ބަޔޮގްރަފިކަލް ޑްރާމާއަށް ދީފައިވާ ނަމަކީ " ވެދަތު މަރާތެ ވީރް ދައުދަލޭ ސާތު" އެވެ. ޗަތުރަޕަތީ ޝިވާޖީ އަކީ 16 ވަނަ ގަރުނުގައި އިންޑިއާގެ މަރާޓާގެ ރަސްކަންކުރެއްވި ވަރުގަދަ ޝަހުސިއްތަކެވެ. އަދި އޭނަ އަކީ މަރާޓާ ރަސްކަމުގެ ފެށުން ވެސް މެއެވެ.
"ވެދަތު މަރާތެ ވީރް ދައުދަލޭ ސާތު" ގެ ޑައިރެކްޓަރަކީ މިދިޔަ އަހަރު ރިލީޒްކުރި ސަލްމާން ޚާންގެ "އަންތިމް: ދަ ފައިނަލް ޓުރުތު" ޑައިރެކްޓްކުރި އެކްޓަރު މަހޭޝް މަންޖްރޭކަރެވެ. މިއީ އަކްޝޭގެ ފުތަރަމަ މަރާޓީ ފިލްމެވެ.
ކޮމެންޓު ފޮނުވާ