އެތެރޭގެ ކޯޅުން ބޮޑުވެ ދެބައިވެފައިވާ، ވެރިކަންކުރާ މައި ޕާޓީ އެމްޑީޕީ، ޒަމާންތަކެއް ވަންދެން ރާއްޖޭގެ ވެރިކަމުގައި އަދިވެސް އޮންނާނެކަމަށް އެޕާޓީގެ ރައީސް، އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާ ދެކޮޅަށް، އެމްޑީޕީގެ ކުރިއަށް އޮތް ރިޔާސީ ޕްރައިމަރީގައި ވާދަކުރައްވާނެކަމަށް ވިދާޅުވެ، ގދ. ތިނަދޫގައި ކެމްޕެއިން ފަށްޓަވަމުން ނަޝީދުވަނީ އެމްޑީޕީ އަދިވެސް އެތައް ޒަމާނަކަށް ރާއްޖޭގެ ވެރިކަމުގައި އޮންނާނެކަމަށް ވިދާޅުވެ ވާހަކަފުޅުދައްކަވާފައެވެ. ނަޝީދު ކެމްޕެއިން އިއުލާންކުރައްވައި ތިނަދުއަށް ވަޑައިގަތުމުން އެރަށުން އެމަނިކުފާނަށް ހޫނު މަރުޙަބާކީ އެމްޑީޕީގެ ޢާންމު މެމްބަރުންނާއި ޢާންމުރައްޔިތުންނެވެ.
"އަޅުގަނޑުމެންނަށް މި މަސައްކަތުގައި ދެމި ތިބެވެންޖެހޭ އެންމެ މުހިންމު، ހަމައެކަނި ސަބަބަކީ ވެސް މި ޕާޓީގެ ސިޔާސަތުތައް ތަންފީޒުކޮށް ރައްޔިތުންގެ އާންމު ހާލަތު މިހާރަށް ވުރެ ރަނގަޅު ކުރުމަށް މަސައްކަތް ކުރުން" ނަޝީދު ވިދާޅުވިއެވެ.
ނަޝީދުގެ ވާހަކަތައް މިމޭރުމުން ހުރިނަމަވެސް މިހަރު ހިނގަމުންމިދާ އެމްޑީޕީގެ ވެރިކަމުގައި، ކޮރަޕްޝަނާއި ފަސާދަ އިންތިހާއަށް އޮތްކަމަށް ނަޝީދާއި ނަޝީދުގެ ފެކްޝަނުގެ މެމްބަރުން ބުނެއެވެ. އަދި ރައީސް ޞާލިޙަށް ދެވަނަ ދައުރެއް ދޭން ނުފެންނަ ސަބަބަކީވެސް މިއީކަމަށް ބުނެއެވެ.
އެމްޑީޕީގެ މިހާރު ހިނގަމުން މިދާ ވެރިކަމުގައި ރައްޔިތުންގެ މަޖިލީހުގެ ސުޕަރ މެޖޯރިޓީވެސް އެޕާޓީއަށް ލިބިފައި އޮވެ، ރައްޔިތުން ބޭނުންވާ އަސާސީ ކަންކަންވެސް ފުރިހަމަނުވެ، ޤައުމުގެ އިޤްތިޞާދު ބޮއްސުންލައި، ރައްޔިތުންނަށް ބޮޑު ތަކުލީފަކަށް ވެފައިވާކަމަށް އިދިކޮޅު ފަރާތްތަކުން ތުހުމަތުކުރެއެވެ. އަދި އެކި ނަންނަމުގައި ނަގާ ޓެކްސްއާއި ފީތައް އިންތިހާއަށް އިތުރުވެފައިވާއޮރު، އެކިކަންކަމުގައި ރައްޔިތުން ޖޫރިމަނާކުރުންވެސް ހަމައިން ނެއްޓިފައިވާކަމަށް އިދިކޮޅު ފަރާތްތަކުން ބުނެއެވެ.
ޤައުމުގެ އިޤްތިޞާދު މިޙާލަތުގައި އޮތްއިރު، ސިޔާސީ މަޤާމުތައް އިތުރުކޮށް ސަރުކާރުން އެކިއެކި ބޭކާރު ހޭދަކުރާކަމަށް ވެސް ތުހުމަތުކުރެއެވެ. މިހުރިހާ ސަބަބުތަކާހެދި ދެން އިތުރަސް ރައްޔިތުން އެމްޑީޕީއަށް ވެރިކަން ނުދޭނެކަމަށްވެސް އިދިކޮޅު ސިޔާސީ ފަރާތްތަކުން ބުނެއެވެ.
