މި ސަރުކާރުން ކުޅުދުއްފުށީގައި ތަރައްގީކުރާ 400 ހައުސިންގ ޔުނިޓުގެ މަސައްކަތުގެ އަމަލީ މަސައްކަތް އަންނަ އަހަރުގެ ފެބްރުއަރީމަހުގެ ތެރޭގައި ފެށުމަށް ހަމަޖެހިފައިވާ ކަމުގައި ހައުންސިންގ މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
ބުރާސްފަތިދުވަހު ރޭ ބޭއްވި، ކުޅުދުއްފުށީގައި އިމާރާތްކުރި 165 ރޯހައުސް ސިޓީ ކައުންސިލާ ރަސްމީކޮށް ހަވާލުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން، މިނިސްޓަރު އަސްލަމު ވިދާޅުވީ، މިހާރު ކުރިޔަށް ދަނީ 400 ޔުނިޓުގެ ޑިޒައިން ކުރުމުގެ މަސައްކަތް ކަމަށާއި، ޑިޒައިންގެ މަސައްކަތް ނިންމާ އަންނަ އަހަރުގެ ފެބުރުއަރީމަހު މަޝްރޫއުގެ އަމަލީ މަސައްކަތް ފެށުމަށް ހަމަޖެހިފައިވާ ކަމުގައެވެ.
ދޮންބޭޒް ޕްރައިވެޓް ލިމިޓެޑް ކިޔާ ކުންފުންނަކާއި މިމަސައްކަތް ސަރުކާރުން ހަވާލު ކޮށްފައިވަނީ ޑިޒައިން އެންޑް ބިލް އުސޫލުންނެވެ.
މި ރަސްމިއްޔާތުގައި ވާހަކަ ދައްކަވަމުން ހައުސިންގ މިނިސްޓަރ ވިދާޅުވީ ބޯހިޔާވަހިކަމަށް ބޭނުންވެފައިތިބި 1،200 މީހުން މިވަގުތު ކުޅުދުއްފުށިގައި ތިބި ކަމަށެވެ.
ޑިޒައިން އެންޑް ބިލްޑް އުސޫލުން ކުޅުދުއްފުށީހައި އަޅާ 400 ހައުސިންގ ޔުނިޓް އެޅުމުގެ ކޮންޓްރެކްޓް ހަވާލުކޮށްފައިވަނީ، މަސައްކަތް 18 މަސްދުވަހުގެ ތެރޭގައި ނިންމާގޮތަށެވެ. މި މަޝްރޫއަށް ގާތްގަނޑަކަށް 443.9 މިލިއަނަށްވުރެ ގިނަ ރުފިޔާ ހަރަދުވާނެ އެވެ.
One Response
އަސްލަމު އަލަށް ކުރެވުނީ ކޮންކަމެއްކަން ސާފުކޮށްދީބަލަ؟ ހަމައެއްކަމެއްވެސް އަލަށް ކުރެވު މި ސަރުކާރުގެ މިމުއްދަތުގައި އަސްލަމަށް ނެތް ނިންމާލެވިފައެއް! މާލޭ ރައްޔިތުންނަށް ކޮށްދެވުނީ ކޮންކަމެއްތޯ؟ ކޮބާތޯ ދޭންބުނި ފުލެޓްތައް، ބްރިޖް، ޕިކްނިކް އައިލެންޑް، މާލޭ މަގުތައް، ކޮބާތޯ ފުލެޓަށް ހުށަހެޅި ފޯމްތައް؟ ޕްރޮޖެކްޓް ހަވާލުކުރުން އެކަނިތޯ މަނިކުފާނަށް އޮންނަނީ؟ އެއްވެސްކަމެއް އަދިއެއްނެތް ކޮޅެއްގަޖެހިފައެއް! ކުރިންވެސް ތިޔަ މިނިސްޓްރީގައި ހުރެ ކަމެއްނުވުމުން ސިޔާސީގޮތުންވެސް މަނިކުފާނަކީ ރައްޔިތުންގެ މަޤްބޫލު ބޭފުޅެއްނޫން!