ޕާޓީގެ ވިޕްލައިނާ އެއްގޮތަށް ޢަމަލުކުރުމަކީ އަބަދުވެސް ޤަބޫލުކުރާ އުސޫލުކަމަށް ވިދާޅުވެ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއީލް ނަސީމް، އޭނާއަށް ކުރެވޭ ތުހުމަތުތަކަށް ރައްދުދެއްވައިފިއެވެ.
މީކާއިން މިހެން ވިދާޅުވީ، ރައްޔިތުންގެ މަޖިލީހުގައި ފަހަކަށް އައިސް އޭނާ ވޯޓުދެއްވުމާއި ޢަމަލުކުރެއްވުމުގައި ރައީސް އިބްރާހީމް މުޙައްމަދު ޞާލިޙަށް ތާޢީދުކުރާ މެމްބަރުންނާ އެއްގޮތަށް ޢަމަލުކުރައްވާތީ، ރައީސް ނަޝީދުގެ ފެކްޝަނުގެ މެމްބަރުންނާއި ރައީސް ނަޝީދަށް ތާޢީދުކުރާ މީހުން ކުރަމުންދާ ތުހުމަތުތަކަށް ރައްދުދެއްވަމުން ކުރެއްވި ޓްވީޓެއްގައެވެ. މީކާއިލަކީ ކުރިން ވަރަށްބޮޑަށް، ރައީސް ނަޝީދަށް ތާޢީދުކުރައްވައި ވާހަކަފުޅުދެއްކެވި ބޭފުޅެކެވެ. މަޖިލީހުގެ އޭނާގެ ވާހަކަތައް ބައްޓަންވެފައި ކުރިން އޮންނަނީވެސް ނަޝީދުގެ ވިސްނުންފުޅާ އެއްގޮތަށެވެ. އަދި މިހާރުގެ ސަރުކާރުން ކޮރަޕްޝަނާއި ފަސާދައިގެ މައްސަލަތަކުގައި ޢަމަލުކުރާ ބައެއް ގޮތްތަކާމެދު މީކާއީލް ކުރިން މަޖިލީހުގައި ވަރަށްބޮޑަށް ފާޑުވެސް ވިދާޅުވެފައިވެއެވެ.

އެހެންނަމަވެސް ކުއްލިއަކަށް މީކާއީލްގެ ބަސްމަގު ބަދަލުވެ ސަރުކާރުން ކުރާ އެއްވެސް ގޯސަކަމެއް ނުފެނި، ހުންނަވަން ޖެހުނީ ޢާއިލީ ބޭފުޅަކަށް ރައީސް އޮފީހުން މަޤާމެއް ދެއްވުމުންކަމަށް އެމްޑީޕީގެ ބައެއް މެމްބަރުން ތުހުމަތުކުރެއެވެ. އަދި ފިނޭންސް މިނިސްޓްރީގެ ކުރީގެ ޑިރެކްޓެއްކަމަށްވާ އިސްމާޢީލް ޒަރިޔަންދު ވަނީ މިސުވާލު މީކާއީލާކޮށް ޓްވިޓުކޮށްފައެވެ.

ޒަރިޔަންދުގެ ޓްވީޓަށް ޖަވާބުދެއްވަމުން މީކާއީލް ވިދާޅުވީ އެއީ ވަރަށް ޒިންމާދާރުކަން ކުޑަ ތުހުމަތެއްކަމަށެވެ. އަދި އޭނާގެ ޢާއިލާގެ އެއްވެސް މީހަކަށް އޭނާ އެދިގެން ހޯދި އެއްވެސް ވަޒީފާއެއް ނޯންނާނެކަމަށެވެ. އަދި ޕާޓީ ވިޕްލައިނާ އެއްގޮތަށް ޢަމަލުކުރުމަކީ އަބަދުވެސް ޤަބޫލުކުރައްވާ އުސޫލުކަމަށެވެ.

ވަރަށް ޒިންމާދާރުކަން ކުޑަ ތުހުމަތެއް. މިއަދާ ހަމައަށް އާއިލާގެ އެއްވެސް މީހަކަށް އަޅުގަނޑު އެދިގެން ހޯދި އެއްވެސް ސިޔާސީ/އެނޫންވެސް ވަޒީފާއެއް ނޯންނާނެކަން ވަރަށް ކެރިގެން ބުނަން. ޕާޓީގެ ވިޕްލައިނާއި އެއްގޮތަށް އަމަލުކުރުމަކީ އަބަދުވެސް ގަބޫލުކުރާ އުސޫލު. https://t.co/xKDFI6DtlG

— Meekail Naseem 🎈 (@MickailNaseem) November 29, 2022

މީކައީލްގެ ބަސްމަގު ބަދަލުވެ ސަރުކާރުން ކުރަށް ވިކިފައިވާކަމަށްބުނެ، ނަޝީދަށް ތާޢީދުކުރާ މީހުން އަންނަނީ ޓްވީޓާގައި ވާހަކަދައްކަމުންނެވެ. އަދި ސަރުކާރުގެ ބައެއްކަންކަމަށް މީކާއީލް ފާޑުކިޔާފައިވާ ކުރީގެ ވީޑިއޯކްލިޕްތައް ޢާންމުކޮށް އޭނާއަށް ފާޑުކިއުން އަމަޒުކުރަމުން ދެއެވެ.