ބައިނަލް އަޤްވާމީ އެއްވެސް ފޯރަމެއްގައި، ކުރީގެ ރައީސް ޑރ.މުޙައްމަދު ވަޙީދު ޙަސަން އެމަނިކުފާނުގެ ދައުރު، މިހާތަނަށްވެސް އަދި ކުރިއަށް އޮތް ތަނުގައިވެސް އޮޅުވާ ނުލައްވާނެކަމަށާ، އެމަނިކުފާނު އަބަދުވެސް މަސައްކަތް ކުރައްވަނީ ދިވެހި ރައްޔިތުންގެ ދިފާޢުގައިކަމަށް ރައީސް ވަޙީދުގެ އޮފީހުން ވިދާޅުވެއްޖެއެވެ.
އެއޮފީހުން މިހެން ވިދާޅުވީ "ރީޖަނަލް ފޯރަމް އޮން ދެވެލޮޕްމަންޓް ކޯޕަރޭޝަން"ގައި ރައީސް ޑރ.މުޙައްމަދު ވަޙީދު ބައިވެރިވެވަޑައިގެންނެވުމާ ގުޅޭގޮތުން ރާއްޖޭގެ ބައެއް މީޑިއާތަކުގައި ކޮށްފައިވާ ރިޕޯޓާ ގުޅިގެންކަމަށް ބެލެވެއެވެ. އެއީ ޗައިނާއިން އިންތިޒާމުކުރި ބައްދަލުވުމެކެވެ. ބައްދަލުވުން އިންތިޒާމުކުރި ފަރާތުން ވަނީ އެބައްދަލުވުމުގައި ދިވެހި ރާއްޖޭގެ ފަރާތުން ރާއްޖޭގެ ކުރީގެ ރައީސުލްޖުމްހޫރިއްޔާ ޑރ.މުޙައްމަދު ވަޙީދު ޙަސަން ބައިވެރިވެވަޑައިގެންނެވިކަމަށް ބުނެފައެވެ. އާލާސްކަންފުޅާ އުޅުއްވާތީ ޑރ.ވަޙީދު ބައިވެރިވެވަޑައިގަތީ ވީޑިއޯ މެސެޖެއް މެދުވެރިކޮށެވެ.
ޗައިނާއިން މިކަން މިގޮތަށް ހާމަކުރުމުން ރާއްޖޭގެ ޚާރިޖިއްޔާއިން ވަނީ ބަޔާނެއް ނެރެފައެވެ. އެބަޔާނުގައި ވަނީ ޑރ.ވަޙީދު ތަމްސީލްކުރެއްވި ދިވެހި ސަރުކާރު ނޫންކަމަށާ، ރާއްޖެއިން އެބައްދަލުވުމުގައި ބައިވެރި ނުވާކަމަށެވެ. މިއާއެކު ރާއްޖޭގެ މީޑިއާތަކުން ވަނީ ދިވެހި ސަރުކާރަށް ނޭނގި "ވަގަށް" ޑރ.ވަޙީދު ރާއްޖެ ތަމްސީލްކުރައްވައި ޗައިނާއިން ބޭއްވި ބައްދަލުވުމެއްގައި ބައިވެރިވެވަޑައިގަތްކަމަށް ދޭހަވާ މޭރުމަކުން ރިޕޯޓުކޮށްފައެވެ.
މިކަމަށް ރައްދުދެއްވައި ރައީސް ވަޙީދުގެ އޮފީހުން ނެރުއްވި ބަޔާނުގައި ވަނީ އެމަނިކުފާނު އެބައްދަލުވުމުގައި ބައިވެރިވެވަޑައިގަތީ އަމިއްލަފުޅު ޙައިސިއްޔަތުންކަމަށެވެ. އަދި އެމަނިކުފާނަށް ދަޢުވަތު ލިބިވަޑައިގަތީވެސް އެ ޙައިސިއްޔަތުން ކަމަށެވެ.
Press Statement: President @DrWaheedH participates in “The Regional Forum on Development Cooperation” @ChinaEmbassy_MV pic.twitter.com/I45ZDswN1z
— Office of President Waheed (@DrWaheedOffice) November 28, 2022
އެބަޔާނުގައި އިތުރަށް ވަނީ، ރައީސް ވަޙީދު އަބަދުވެސް މަސައްކަތް ކުރައްވަނީ ދިވެހިރައްޔިތުން ތަމްސީލްކޮށް ރައްޔިތުންގެ މަސްލަޙަތަށް ވަކާލާތުކޮށް، ދިވެހި ރައްޔިތުންނާއި ޤައުމު ދިފާޢުކުރުމަށްކަމަށެވެ. ނަމަވެސް ބައިނަލް އަޤްވާމީ އެއްވެސް ފޯރަމެއްގައި އެމަނިކުފާނުގެ ދައުރު، މިހާތަނަށްވެސް، އަދި ކުރިއަށް އޮތްތަނުގައިވެސް އޮޅުވައެއް ނުލައްވާނެކަމަށެވެ.
އަދި ޑރވަޙީދަށް މިބައްދަލުވުމަށް ވަޑައިގަތުމުގެ ދަޢުވަތު ލިބިވަޑައިގަތީ އެމަނިކުފާނަކީ، ބައިނަލްއަޤުވާމީ ތަރައްޤީއާއި ޕަބްލިކް ޕޮލިސީގެ ދާއިރާއިން ދެކުނު އޭޝިއާއިން ފާހަގަކޮށްލެވޭ ޢިލްމުވެރި ބޭފުޅަކަށް ވާތީކަމަށާ، އެމަނިކުފާނަކީ ސްޓެންފޯޑް ޔުނިވަރސިޓީން އިންޓަނޭޝަނަލް ޑިވެލޮޕްމަންޓްގެ ދާއިރާއިން ޕީއެޗްޑީ ޙާސިލްކުރައްވައި، އިންސާނިއްޔަތު ކުރިއަރުވަން ގިނަ މަސައްކަތްތަކެއް ބައިނަލްއަޤުވާމީ މައިދާނުގައި ކުރައްވާފައިވާ ބޭފުޅަކަށް ވާތީކަމުގައިވެސް އެމަނިކުފާނުގެ އޮފީހުން ވިދާޅުވެއެވެ. އަދި އެމަނިކުފާނީ 16 އަހަރު އދ.އާއެކުި ބައިނަލްއަޤްވާމީ ތަރައްޤީގެ ދާއިރާގައި މަސައްކަތް ކުރައްވާފައިވާ ބޭފުޅެއްކަންވެސް މި ބަޔާނުގައި ފާހަގަކުރައްވާފައިވެއެވެ.
ޗައިނާއިން އިންތިޒާމުކުރި "ރީޖަނަލް ފޯރަމް އޮން ދެވެލޮޕްމަންޓް ކޯޕަރޭޝަން" ބައްދަލުވުމުގައި އިންޑިއާއިން ބައިވެރިއެއް ނުވެއެވެ. ރާއްޖެއަކީ އިންޑިއާއާ އާދަޔާ ޚިލާފު ގުޅުމެއް އޮންނަ ޤައުމަށްވާތީ، އިންޑިއާގެ ބައިވެރިވުމެއް ނެތި ސަރަޙައްދީ މިފަދަ ބައްދަލުވުމެއްގައި ރާއްޖޭގެ މިހާރުގެ ސަރުކާރުން ބައިވެރިވާން ބޭނުން ނުވާކަމަށް އިދިކޮޅު ފަރާތްތަކުން ބުނެއެވެ. އަދި ޑރ.ވަޙީދު އަމިއްލަފުޅު ޙައިސިއްޔަތުން ބައިވެރިވެވަޑައިގަތުމުން ދިވެހި ޚާރިޖިއްޔާއިން ބަޔާނެއް ނެރެން ޖެހުނީވެސް އިންޑިއާ ރުއްސުމަށްކަމަށް އިދިކޮޅު ފަރާތްތަކުން ބުނެއެވެ.
