ސައުތުުގެ ފިލްމު އިންޑަސްޓްރީގެ އެންމެ ނަންހިގާ އެއް އެކްޓަރު ޕްރަބާސްގެ ކުރިއަށް އޮތް ފިލްމު އަދިޕުރުޝް އަޅުވާ ތާރީހަށް ބަދަލު އައިސްފައިވާ ކަމަށް މުނިފޫހި ފިލުވުމުގެ ޚަބަރުތައް ގެެނެސްދޭ ނޫސްތަކުން ބުނެފިއެވެ.
މި ފިލްމު އަޅުވާ ދުވަސް ބަދަލު ކޮށްފައިވަނީ ކުރިން ކަނޑައެޅި ތާރީހުގައި ސައުތުގެ ގިނަ ފިލްމު ތަކެއް ރިލީޒް ކުރާތީއެވެ. ފިލްމު ރިލީޒް ކުރަން ކުރިން ނިންމީ ޖަނަވަރީ ގައެވެ. ނަމަވެސް ފިލްމު ވަނީ އަންނަ އަހަރުގެ ޖޫން މަހަށް ފަސްކޮށްލާފައެވެ.
ފިލްމުގެ ޑައިރެކްޓަރު އޯމް ރައުޓް ވަނީ މިކަން އިއުލާން ކޮށްފައެވެ. އަދި ގިނަ ފިލްމް ތަކަކާއި މުޑިއަރަން ބޭނުން ނުވާތީ ފިލްމު އަޅުވާ ދުވަސް ފަސްކޮއްލީ ކަމަށް އޭނާ ވަނި ބުނެފައެވެ.
މި ފިލްމުގެ ޓީޒާއެއް ވެސް މިހާރު ވަނީ ބެލުންތެރިންނަށް ދޫކޮށްލާފައެވެ. ހިންދޫ މީތޮލޮޖިކަލް ފިލްމު އަދިޕުރުޝްގެ ޓީޒާގައި، ފިލްމުގެ ލީޑު ތިން ތަރިން ކަމަށްވާ ޕްރަބާސްއާއި ސައިފް އަލީ ޚާނާއި ކްރިތީ ސެނޮން ފިލްމުގައި ފެންނާނެ ގޮތް ވަނީ ދައްކާލައިފައެވެ.
ސައިފް މި ފިލްމުގައި ކުޅެފައިވަނީ ނެގެޓިވް ރޯލެކެވެ. އަދި ހީރޯގެ ގޮތުގައި ޕްރަބާސް ފެނިގެންދާއިރު ކްރިތީ އަކީ އޭނާގެ ލޯބިވެރިޔާއެވެ. މި ތިން ތަރިންގެ އިތުރުން ފިލްމުގެ މުހިންމު ރޯލުތަކުން ސަނީ ސިންގ، ދޭވްދައްތާ ނާގޭ، ވަޓްސަލް ޝެތު، ސޯނަލް ޗޯހަން އަދި ތުރުޕްތީ ތޮރަޑްމާލް ފަދަ ތަރިން ފެނިގެންދާނެއެވެ.
ހިންދީ، ތަމަޅަ، ޓެލެގޫ، ކަންނަޑާ އަދި މަލަޔާލަމް، މި 5 ބަހުން ޑަބްކޮށް ނެރެން ހަމަޖެހިފައިވާ މި ފިލްމަކީ ޓީ-ސީރީޒާއި ރެޓްރޯފައިލްސް ގުޅިގެން، 500 ކްރޯޑް ރުޕީސްގެ ބަޖެޓަކުން އުފައްދާފައިވާ ފިލްމެކެވެ.
