ކުރިއަށް އޮތް ރިޔާސީ އިންތިޚާބުގައި ވެރިކަންކުރާ ޕާޓީ އެމްޑީޕީގެ ރިޔާސީ ޓިކެޓު ހޯދުމުގެ އެއްވެސް ޝައުޤުވެރިކަމެއް ނެތްކަމަށާ، ތާޢީދުކުރައްވަނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށްކަމަށް ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.
ޝާހިދު ރިޔާސީ ރޭހަށް ނުކުމެވަޑައިގެންފާނެކަމަށް އަންނަނީ އަޑުފެތުރެމުންނެވެ. އެގޮތުން އެމްޑީޕީގެ ޕްރައިމެރީގައި ޝާހިދު ވާދަކުރައްވަފާނެކަމަށާއި ރިޔާސީ ޓިކެޓު ހޯއްދެވުމަށް މަސައްކަތް ކުރައްވާކަމަށްވެސް އަޑުފެތުރިފައިވެއެވެ. އެމްޑީޕީގެ ދުވަސްވީ ބައެއް އިސް ބޭފުޅުން ޝާހިދަށް އެމްޑީޕީގެ ރިޔާސީ ޓިކެޓު އަރުވަން ތާޢީދުކުރާކަމަށްވެސް އަޑުއިވެއެވެ. އެހެންނަމަވެސް މިކަމުގެ އެއްވެސް ޝައުޤެއް ނެތްކަން ޝާހިދު މިވަނީ ހާމަކުރައްވާފައެވެ.
ރާއްޖޭގެ އޮންލައިން ނޫހަކަށް ދެއްވި އިންތަވިއުއެއްގައި ޝާހިދު ވިދާޅުވެފައިވަނީ، "އަޅުގަނޑު ވާދައެއް ނުކުރަން. ތާއިދު ކުރަނީ ރައީސް ސޯލިހަށް،" ކަމަށެވެ. ޝާހިދަކީ ރައީސް އިބްރާހީމް މުޙައްމަދު ޞާލިޙުގެ ސަރުކާރުގެ އެންމެ ވަރުގަދަ އެއް ވަޒީރެވެ. އަދި އެންމެ ތަޖުރިބާކާރު އެންމެ ސީނިއަރ އެއް ބޭފުޅާވެސް މެއެވެ. ކޯވިޑް19އާއި އެނޫންވެސް މުހިންމު ބައެއް ޙާލަތްތަކުގައި ބޭރުދުނިޔެއާއި ރާއްޖެ ގުޅުވާލައި، ޚާރިޖީގޮތުން ސަރުކާރުގެ ސިޔާސަތު ތަންފިޒުކުރައްވަން ޝާހިދުވަނީ ގިނަ މަސައްކަތްތަކެއް ކުރައްވާފައެވެ.އދ.ގެ ޢާންމު މަޖިލީހުގެ ރައީސްކަންކުރެއްވި ފުރަތަމަ ދިވެއްސަކީވެސް ޝާހިދެވެ.
އެމްޑީޕީގެ ތަރުޖަމާނު އަނަސް އަބްދުއްސައްތާރު ދާދިފަހުން ވިދާޅުވެފައިވަނީ އެމްޑީޕީގެ ރިޔާސީ ޕްރައިމަރީގެ ކުރިން ފުރިހަމަކުރަންޖެހޭ އިދާރީ ކަންކަން ފުރިހަމަކުރުމަށްފަހު ޕްރައިމަރީ ބާއްވާނެ ތާރީޚެއް ހާމަކުރައްވާނެކަމަށެވެ.
