މަސްތުވާތަކެތީގެ ވިޔަފާރި ފުޅާދާއިރާއެއްގައި ކުރާކަމަށް ފުލުހުން ތުހުމަތު ކުރާ އަރުޝަދު ހާލިދު ބަންދުން ދޫކޮށްލީ އޭނާ ބަންދު ދެމެހެއްޓޭވަރަށް ހެކި ގަރީނާ ލިބިފައި ނުވާތީކަމަށް ފުލުނުން ބުނެފިއެވެ.
ފުލުހުން އަރުޝަދު ހައްޔަރުކޮށްފައި މިވަނީ މި މަހުގެ 10 ވަނަ ދުވަހު އޭނާ ރާއްޖެ އައުމުން ހައްޔަރު ކުރުމަށްފަހު ކޯޓަށް ހާޒިރުނުކޮށް ދޫކޮށްލުމަށްފަހުއެވެ. ކޯޓުން ފުލުހުންގެ ބެލުމުގެ ދަށުގައި އަރުޝަދު ބަހައްޓައިގެން ހާޒިރުކުރުމަށް އަމުރެއް ނެރެފައި އޮތް ނަމަވެސް އޭނާ މި މަހުގެ 13 ވަނަ ދުވަހު ހައި ކޯޓުގައި އޮތް އަޑު އެހުމަށް ހާޒިރުވީ އަމިއްލައަށެވެ.
އޭގެ ފަހުން އޭނާ ބަންދުކުރުމަށް ހައިކޯޓުން ނެރުނު ހުކުމް އަރުޝަދުގެ ފަރާތުން ސުޕްރީމް ކޯޓުގައި ވަނީ އިސްތިއުނާފުކޮށްފައެވެ. އަރުޝަދު ބަންދުގައި ބަހައްޓައިގެން ކޯޓަށް ހާޒިރުކުރުމަށް ހައި ކޯޓުން ނެރުނު އަމުރެއްގެ އިސްތިއުނާފު ޝަރީއަތަށް މިއަދު އޭނާ ސުޕްރީމް ކޯޓަށް ހާޒިރުކޮށްފައި ވަނިކޮށް އޭނާގެ ވަކީލް ވަނީ ހައްޔަރުކޮށްފައި ހުރީ މަސްތުވާތަކެތި އެތެރެކުރި ކަމުގެ ތުހުމަތެއްގައި ކަމަށް ކޯޓުގައި ވިދާޅުވެފައެވެ.
އަރުޝަދު އިއްޔެ ހައްޔަރުކުރީ ފުލުހުންގެ ޑްރަގް އެންފޯސްމަންޓުން ގދ. އަތޮޅުގައި އޮޕަރޭޝަނެއް ފަށައި އެ މައްސަލާގައި ބަޔަކު ހައްޔަރުކޮށްފައި ވަނިކޮށެވެ. އެ އޮޕަރޭޝަން ތެރެއިން ފުލުހުންގެ ބެލުމުގެ ދަށަށް ގެންދިޔަ މީހަކު ކުއްލި ގޮތަކަށް މަރުވި މައްސަލައެއް ރޭ ވަނީ ފެންމަތިވެފައެވެ. މަރުވީ އަރުޝަދުގެ ރަށް ކަމަށްވާ ގދ. ހޯނޑެއްދޫ މީހެކެވެ. އޭނާގެ މަރުގައި ފުލުހުންގެ އިހުމާލުވާކަމަށް ވެސް ވަނީ ތުހުމަތުކޮށްފައެވެ.
އަރުޝަދުގެ މައްޗަށް ފުލުހުން މަސްތުވާތަކެތީގެ ވިޔަފާރިކުރުމުގެ ތުހުމަތު ކޮށްފައިވަނީ މިދިޔަ އަހަރުގެ ޑިސެމްބަރު މަހު މާލޭގައި މަހު ފުލުހުން ހިންގި ހާއްސަ އޮޕަރޭޝަނެއްގައި 119 ކިލޯގެ މަސްތުވާތަކެތި އަތުލުމަށްފަހުއެވެ. ފުލުހުން ބުނަނީ އެ މަސްތުވާތަކެތި އެތެރެކުރުމުގައި އިސްކޮށްހުރީ އަރުޝަދު ކަމަށެވެ. އެފަހަރު ފުލުހުން ވަނީ އަރުޝަދު އިސްވެ ހިންގާކަމަށް ބުނާ ޑްރަގް ނެޓްވޯކްގެ މީހުން ވެސް ހައްޔަރުކޮށްފައެވެ.
