މާދަމާ ރިލީޒް ކުރުމަށް ތާވަލް ކޮށްފައިވާ ފިލްމް "ރާމް ސެތޫ" ގެ ފުރަތަމަ ލަވަ ބެލުންތެރިންނަށް ދޫކޮށްލައިފިއެވެ.
ފިލްމްގެ ގިނަ މަންޒަރު ތަކަކާއި އެކުގައި ލަވަ ދޫކޮށްލާފައި ވާއިރު، މި ލަވައިން ފިލްމް ބެލުމުގެ ޝައުގުވަރަށް ބޮޑަށް ވަނީ ދަމައިގެންފައެވެ.
މި ފިލްމުން ބެލުންތެރިންނަށް ދޫކޮށްލި ލަވައިގެ ނަމަކީ "ޖެއި ޝްރީ ރާމް"އެވެ. ލަވާގައި ފިލްމުގެ މައިގަނޑު ހުރިހާ ތަރިން އަދި ފިލްމްގެ ގިނަ މަންޒަރު ތަކެއް ފެނިގެންދެއެވެ.
"ރާމް ސެތޫ" އަކީ ސައިންސާއި ތާރީހުގެ ކަންތައްތަކެއް ދައްކުވައިދޭ ފިލްމެކެވެ. އަލަށް ނެރުނު ލަވައިން ވެސް ފެންނަނީ މޮޅެތި ޓެކްނޮލޮޖީ ބޭނުންކޮށްގެން ތަފާތު ހޯދުންތައް ހޯދުމަށް ކުރާ މަސައްކަތެވެ.
އަކްޝޭ ކުމާރުގެ އިތުރުން ފިލްމުގައި ދެ ބަތަލާއަކު ފެނިގެން ދާނެއެވެ. އެއީ ޖެކޮލިން ފެނާންޑޭޒް އާއި ނުޝްރަތު ބަރޫޗާއެވެ.
މި ފިލްމުގައިި އަކްޝޭ ފެނިގެންދަނީ އާކިއޮލޮޖިސްޓެއްގެ ގޮތުގައެވެ. މި އެކްޝަން-އެޑްވެންޗަރ ފިލްމަކީ އަބީޝެކް ޝަރުމާ ޑައިރެކްޓްކޮށްފައިވާ ފިލްމެކެވެ. އޭނާ އެންމެ ފަހުން ބެލުންތެރިންނަށް ގެނެސްދިން ފިލްމަކީ 2020ގެ "ސޫރަޖް ޕޭ މަންގަލް ބާރީ" އެވެ.
މި ފިލްމަކީ މި އަހަރު ރިލީޒްކުރާ އަކްޝޭގެ 5 ވަނަ ފިލްމެވެ. މިއަހަރު ރިލީޒްކުރި އަކްޝޭގެ ހުރިހާ ފިލްމަކަށްވެސް ލިބުނީ ވަރަށް ފިނި ތަރުހީބެކެވެ. ބަލާނެ މީހަކު ނުވެ އެންމެ ފަހުން ހުރިހާ ފިލްމެއްގައި ވެސް ފްލޮޕް ބޯޑު ވަނީ އަޅުވާފައެވެ.
