ރިބެރީ ފުޓްބޯޅަ ކުޅުން ހުއްޓާލައިފި

ފްރާންސްގެ ގައުމީ ޓީމާއި ބަޔާން މިއުނިކްގެ ކުރީގެ ތަރި ފްރޭންކް ރިބެރީ، ފުޓްބޯޅަ ކުޅުން ހުއްޓާލައިފިއެވެ.

ރިބެރީ، 39 އަހަރުގައި ކުޅުން ހުއްޓާލިއިރު ރިބެރީ ހުރީ އިޓާލިއަން ލީގުގެ ސެލަނިޓާނާގައެވެ. އެކަމަކު، އޭނާ ރިޓަޔާކުރީ ކަކުލުގެ އަނިޔާއަކާ ގުޅިގެން ކުޅުމާ ދުރުގައި ދުވަސްތަކެއް ހޭދަކުރުމަށް ފަހުއެވެ. މިދިޔަ އަހަރު ސެލަނިޓާނާއާ ގުޅުނު ރިބެރީ މި ސީޒަންގެ އިޓާލިއަން ލީގުގައި އެ ޓީމަށް ކުޅުނީ އެންމެ މެޗެކެވެ. އެއީ މި ސީޒަންގެ ލީގުގައި ސަލެރްނިޓާނާ ކުޅުނު ފުރަތަމަ މެޗެވެ.

ރިބެރީއާ އެކު ހަދާފައިވާ ކޮންޓުރެކްޓް "ދެ ފަރާތުން އެއްބަސްވެގެން" އުވާލާފައިވާ ކަމަށް ސެލަނިޓާނާ އިން ވަނީ ބުނެފައެވެ.

ރިބެރީ އެންމެ ބޮޑަށް ފާހަގަވެފައިވަނީ ޖަރުމަނު ބުންޑަސްލީގާގެ ޗެމްޕިއަން ބަޔާން މިޔުނިކަށް ކުޅުނު ދުވަސްވަރުއެވެ. މިގޮތުން އޭނާވަނީ ބަޔާންއަށް 425 މެޗް ކުޅެދީ 124 ލަނޑު ޖަހާދި 182 ލަނޑު ޖެހުމަށް އެހީތެރިވެދީފައެވެ. އޭނާ ބަޔާން އަށް ކުޅެފައިވަނީ 2007 ވަނަ އަހަރުން ފެށިގެން 2019 ވަނަ އަހަރާއި ދެމެދުއެެވެ. އަދި 2013 ވަނަ އަހަރު އެކްލަބާއެކު ޗެމްޕިއަންސް ލީގު ކާމިޔާބު ކުރުމުގެ އިތުރުން ބުންޑަސްލީގާގެ ތަށި 9 ފަހަރު ބަޔާން އާއެކު އުފުލާލާފައިއެވެ.

ރިބެރީ ބަޔާންއަށް ސޮއިކޮށްފައިވަނި ފްރެންޗް ލީގުގެ އޮލިމްޕިކް ޑި މާސޭއިން 2007 ވަނަ އަހަރުގެ ޖޫން މަހު 17 މިލިއަން ޕައުންޑްގެ އަގަކަށެވެ. ރިބެރީ ވަނީ ފަރަންސޭސި ޤައުމީ ޓީމަށް 81 މެޗް ކުޅެދީ 16 ލަނޑު ޖަހާދީ 25 ލަނޑު ޖެހުމަށް އެހީތެރިވެދީފައެވެ. އަދި 2006 ވަނަ އަހަރު ފީފާ ވާރލްޑް ކަޕްގެ ފައިނަލްގައި ވާދަކުރި ޓީމްގައި ރިބެރީ ހިމެނުނެވެ. އަދި ޤައުމީ ޓީމަށް ކުޅުން ހުއްޓާލާފައިވަނީ 2014 ވަނަ އަހަރުއެވެ.