މިސަރުކާރަށް ރައްޔިތުންގެ ތާޢީދާ އިތުބާރު ހޯދަން ބޭނުންނަމަ އައްޑޫސިޓީގެ ތަރައްޤީއަށް އިސްކަންދޭންޖެހޭކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ރައީސް ނަޝިދު އައްޑޫއަށް ކުރައްވަމުން ގެންދަވާ ދަތުރުފުޅުގައި އައްޑޫގެ އެމްޑީޕީ ސަޕޯޓަރުންނާ ރޭގެ ވަގުތެއްގައި ބައްދަލުކުރައްވާ ވާހަކަފުޅު ދައްކަވަމުން ރައީސް ނަޝީދު ވިދާޅުވީ، ރަށެއްގެ ބޮޑު އަދި ކުޑަ މިނެއް ބެލުމެއް ނެތި ތަރައްގީ ގެންނަށް އިސްކަން ދީފިނަމަ މުޅި ރާއްޖެއަށް ވެސް އުނދަގޫތަކާ ކުރިމަތިލާން ޖެހޭނެކަމަށެވެ. ނަޝީދު ވިދާޅުވީ އައްޑޫއަށް އިސްކަންދީގެން ބޮޑު މަސައްކަތްތަކެއް ކުރެވިއްޖެނަމަ، މި ސަރުކާރަށް މިހާރަށްވުރެވެސް ތާއީދު ބޮޑުވާނެކަމަށް ގަބޫލުކުރައްވާކަމަށެވެ. އަދި ރާއްޖެއަށް ހެޔޮ ގޮތް އެދޭ ނަމަ، އައްޑޫއަށް އަޅާލުމަކީ މުހިންމު ކަމެއްކަމަށްވެސް ރައީސް ނަޝީދު ވިދާޅުވިއެވެ.

މިއީ 32،000މީހުންގެ އާބާދީ. ދެން އޮންނަ ރަށެއްގައި 80 މީހުން އުޅެނީ. ދެން މި ދެ ރަށް ތަފާތު ނުކުރާނަމަ ކިހިނެއްތޯ ހަދާނި. ފަސްގަނޑަކަށް ބެލޭކަށް ނެތް،

– ރައީސް ނަޝީދު ވިދާޅުވިއެވެ.

ނަޝީދުގެ ވާހަކަފުޅުގައި ސަރުކާރުން  އައްޑޫއަށް އަމާޒުކޮށްގެން ކަންތައްތަކެއް ކޮށްފިނަމަ ސަރުކާރަށް މިހާރަށް ވުރެ އިތުރަށް ތާއީދު އިތުރުވާނެކަމަށް ވިދާޅުވިއެވެ. އައްޑޫ ރައްޔިތުންނަށް ރާއްޖޭގެ ހުރިހާ ހިސާބަކަށް ވެސް އެހީތެރިވެވެން އެބައޮތް ކަމަށާއި އެކަން ކުރެވޭނީ އައްޑޫ ތަރައްގީ ކޮށްގެންކަމަށްވެސް ރައީސް ނަޝީދު ވިދާޅުވިއެވެ.