އިކޮނޮމިކް މިނިސްޓްރީގެ ސީނިއާ އެގްޒެކެޓިވް ޑިރެކްޓަރެއްގެ މަގާމުގައި ހުންނެވި އަހުމަދު ނިޔާޒް، ވެރިކަން ކުރާ މައި ޕާޓީ އެމްޑީޕީ ދޫކޮށް އިދިކޮޅު ޕީޕީއެމް އަށް ސޮއި ކުރައްވައިފިއެވެ.
ނިޔާޒް އިދިކޮޅު ޕީޕީއެމް އާއި ގުޅިވަޑައިގެން، މެމްބަރު ކަމުގެ ފޯމު ވަނީ، އެ ޕާޓީގެ ރައީސް އަދި ރާއްޖޭގެ ކުރީގެ ރައީސް ޔާމީން އާ ހަވާލު ކުރައްވާފައެވެ. ނިޔާޒް އަކީ މީގެ ކުރިން އެމްޑީޕީގެ މިލަންދޫ ދާއިރާގެ ގައުމީ މަޖިލީހުގެ ކުރީގެ މެމްބަރު ކަންވެސް ކުރައްވާފައިވާ ބޭފުޅެކެވެ.
އެމްޑީޕީން ވަކިވި ސަބަބާއި ގުޅޭގޮތުން ނިޔާޒު ވިދާޅުވީ ވެރިކަމަށް އައުމަށް އެމްޑީޕީން ވެފައިވާ ވައުދުތަކާއި ޚިލާފްވެ އެތައް އޮޅުވާލުމެއް އޮޅުވާލާފައިވާކަމަށެވެ. އަދި ހަމަ މިއާއިއެކު މިހާރު އޮތް ވެރިކަމުގައި އިސްލާމް ދީނަށް ފުރައްސާރަ ކުރުން އިންތިހާއަށް އިތުރުވެ، މާތް ރަސޫލާއަށް ފުރައްސާރަކޮށް ހަޖޫޖަހާއިރުވެސް ސަރުކާރުން މާބޮޑު އަޅާލުމެއް ނުބަހައްތާކަމަށެވެ. މިފަދަ ސަބަބުތަކާއިހުރެ އެމްޑީޕީގައި ދެމި ހުރުމަކީ ގަބޫލު ކުރެވޭ ކަމެއް ނޫންކަމަށް ނިޔާޒު ވަނީ ވިދާޅުވެފައެވެ
އެމްޑީޕީގެ އިސް ސަފުގައި އުޅުއްވާ އަދި މީގެ ކުރިން ހަރަކާތްތެރިވި ގިނަ ބަޔަކު އެމްޑީޕީ ދޫކޮށް އިދިކޮޅު ޕީޕީއެމްއާއި ދަނީ ގުޅެމުންނެވެ. އަދި މިހާރު އޮތް މަސްރަހުގެ ތެރެއިން ރައީސް ޞާލިހާއި ރައީސް ނަޝީދުގެ މެދުގައި އުފެދިފައިވާ ކޯޅުމުގައިވެސް އެމްޑީޕީގެ ރައީސް ނަޝީދަށް ތާއީދު ކުރާ ފަރާތްތަތަކުން ދަނީ ސަރުކާރަށް ފާޑުކިޔައި އެމްޑީޕީއާއި ފެޔަށް ޖެހެމުންނެވެ.
