ސަރުކާރުގެ އެކި ވުޒާރާތަކުން ހިންގާ ކޮރަޕްޝަންގެ ކަންކަން ނުހުއްޓުވެނީ މަޖިލީހުން ކުރަންޖެހޭ މަސައްކަތްތަކުގެ ޒިންމާ އެންމެ ރަނގަޅަށް އަދާ ނުކުރެވޭތީ ކަމުގައި ރައްޔިތުންގެ މަޖިލީހުގެ ވިލިފުށީ ދާއިރާގެ މެމްބަރު ހަސަން އަފީފް ވިދާޅުވެއްޖެއެވެ.

ނޮޅިވަރަމް ދާއިރާގެ މެންބަރު މުޙައްމަދު ނަޝީދު ހުށަހަޅުއްވާފައިވާ، އެއްގަމު ދަތުރުފަތުރުގެ ޤާނޫނުގެ ބަހުސްގެ މަރުހަލާގައި އަފީފް ވިދާޅުވީ ދަތުރުފަތުގެ ނިޒާމުގެ ވާހަކަ ދައްކާއިރު އެންމެ ބޮޑަށް ދެކެވޭ ވާހައަކީ ކޮރަޕްޝަންގެ ވާހަކަ ކަމަށެވެ. ސަރުކާރުން ކޮރަޕްޝަން ރީޒޯ ޓޮލަރެންސްގެ ސިޔާސަތެއް ގެންގުޅޭއިރު، ކޮރަޕްޝަން ހިންގާ މީހުންނަށް އެސިޔާސަތު ނުހިނގާކަމަށެވެ.

ޓްރާސްޕޯޓް މިނިސްޓްރީ ތެރެއިން ހިންގާ ކޮރަޕްޝަންގެ ވަހަތަކަކީ ތަކުރާރުކޮށް އަޑުއިވޭ ވާހަތަކެއް ކަމަށް ވީނަމަވެސް އެކަން ނުބެލޭކަމަށް އަފީފް ވިދާޅުވިއެވެ. މިނިސްޓްރީން ގަރާޖު ސިޓީއަށް އެތައް ބައިވަރު ފައިސާ ނަގައިގެން ވެހިކަލްތައް ރަޖިސްޓްރީ ކުރާކަމީވެސް ބޮޑު މައްސަލައެއްކަމަށް އަފީފް ވިދާޅުވިއެވެ. މިނިސްޓްރީގައި ތިއްބެވި ބޭފުޅުންވެސް އަދި މާލެ ސިޓީގައި ތިއްބެވި ބޭފުޅުންވެސް ބަލަނީ އަމިއްލަ މަންފާއަށް އަމިއްލަ ޖީބަށް ވަންނަ އަދަދު ހޯދުމަށް އަފީފް ވިދާޅުވިއެވެ.

އޭނާ ވިދާޅުވީ މިބޮޑު ޖަރީމާ ހިންގަމުންދަނީ ގުޅިގެންކަމަށެވެ. ނަމަވެސް މިކަން ހުއްޓުވުމަށް މަސައްކަތް ކުރަންޖެހޭ ވަރަށް އިދާރާތަކުން މަސައްކަތް ނުކުރާކަމަށް އޭނާ ވިދާޅުވިއެވެ. އެގޮތުން މަޖިލީހުގައި ހިމެނޭ މިކަންކަން ބެލުމަށް ތިއްބެވި ކޮމެޓީތަކުގެ އިސްބޭފުޅުންނަކީ ޓްރާސްޕޯޓް މިނިސްޓްރީވިޔަސް އެހެން ވުޒާރާއެއް ވިޔަސް އެވަޒީރެއް ހިންހަމަ ނުޖެހިދާނެތީ މައްސަލަ ބަލަން ފަސްޖެހޭ މީހުންކަމަށް އަފީފް ވިދާޅުވިއެވެ.

އަފީފް ވިދާޅޫވީ ކޮރަޕްޝަންގެ މައްސަލަތައް ހުއްޓުވުމަކީ ހަމައެކަނި ދެކެވޭ ވާހަކައެއް ކަމަށެވެ. މިހާތަނަށްވެސް އެޅުނު އެއްވެސް ފިޔަވަޅެއްވެސް އަދި ކުރެވުނު އެއްވެސް ކަމެއްވެސް ފެންނަން ނެތްކަމަށެވެ.