ބަތަލާ ސޮނާކްޝީ ސިންހާގެ ބޭބެ ކުޝް ސިންހާ ޑައިރެކްޝަނަށް ނުކުންނަ ފިލްމު "ނިކިތާ ރޯއި: އެންޑް ދަ ބުކް އޮފް ޑާކްނެސް"ގެ ޓީމާ އެކްޓަރު އަރުޖުން ރާމްޕަލް ގުޅިއްޖެއެވެ.
މި ފިލްމުގެ ލީޑުން ފެނިގެންދާނީ ބަތަލާ ސޮނާކްޝީ ސިންހާއެވެ. މަޑުމަޑުން ކާސްޓް ރިވީލް ކުރަމުން އަންނަ ފިލްމުގެ ޝޫޓިން މިދިޔަ މަހުގެ މެދު ތެރެއިން ފެށިގެން އިނގިރޭސިވިލާތުގައި ކުރިއަށް ދާއިރުގައި ފިލްމުގެ ޓީމާ މިހާރު ވަނީ އަރުޖުން ގުޅިފައެވެ.
ފިލްމާ ގުޅޭ މާގިނަ މައުލުމާތެއް އަދި ހިއްސާ ކޮށްފައި ނުވި ނަމަވެސް ސޮނާކްޝީ ވަނީ އެ ފިލްމާއި ގުޅޭ ޕޯސްޓަރެއް މިދިއަ މަހުގެ ތެރޭގައި އިންސްޓަގްރާމްގައި ހިއްސާ ކޮށްފައެވެ.
ޕޯސްޓަރުން ފެންނަ ގޮތުގައި ފިލްމަކީ ބިރުވެރި ފިލްމެކެވެ. އެއީ ޕޯސްޓްރުގެ ބެކް ޑްރޮޕާއި ސޮނާކްޝީ ފެންނަން ހުރި ގޮތުންނެވެ.
މިއީ ސޮނާކްޝީ އާއި އޭނާގެ ބޭބެ އެކުގައި މަސައްކަތްކުރާ ފުރަތަމަ ފިލްމެވެ. އަދި ހަމަ އެހެންމެ މިއީ ހުޝް ޑައިރެކްޓް ކުރާ ފުރަތަމަ ފިލްމު ވެސް މެއެވެ.
ބޮލީވުޑްގެ ކުރީގެ އެކްޓަރު ޝަތުރުގަން ސިންހާ އާއި ޕޫނަމް ކައިވެނި ކޮށްގެން ލިބުނު ތިން ކުދިންގެ ތެރެއިން ކުޝް ސިންހާ އާއި ލަވް ސިންހާ އަކީ އެއްމާބަނޑު ދެބެންނެވެ. ދެން ހުނަނީ ސޮނާކްޝީއެވެ. ލަވް ސިންހާ އަކީ އެކްޓަރެއްގެ އިތުރުން ޕޮލިޓީޝަނެކެވެ.
ކޮމެންޓު ފޮނުވާ