އެމްޑީޕީ ކޮންގްރެސްގައި ބައިވެރިވާ މަންދޫބުންގެ ޤާނޫނީ ހައިސިއްޔަތާއިމެދު އެމްޑީޕީގެ ރައީސް މުހައްމަދު ނަޝީދު ސުވާލު އުފައްދަވައި ވާހަކަ ދެއްކުމުން، ކޮންގްރެސްގައި ބައިވެރިވާ ބޭފުޅުންގެ ނުރުހުން އަމާޒުވެއްޖެއެވެ.
މިއަދު އެމްޑީޕީގެ އަސާސީ ގަވާއިދަށް ހުށަގެޅިފައިވާ އިސްލާހުތަކުގެ ބަހުސްގައި، އެމްޑީޕީގެ ނައިބް ރައީސް މުހައްމަދު ޝިފާޒު ވަނީ އެމްޑީޕީގެ މިހާރު ކުރިއަށްދާ ކޮންގްރެސްގައި ބައިވެރިވާ މަންދޫބުންނަކީ ސައްޚަ މަންދޫބުންތޯ ސުވާލު އުފައްދާފައެވެ. އަދި ކުރިއަށް އޮތް ތަނުގައި މިކަމަށް ހައްލު ގެނެސް އަސަސީ ގަވާއިދަށް އިސްލާހު ގެންނަން ޖެހޭކަމަށެވެ.
ޝިފާޒުގެ ވާހަކަ ތަކަށް ރައްދު ދެއްވައި ވާހަކަ ދައްކަވަމުން މަރަދޫ ދާއިރާގެ މަޖިލިސް މެމްބަރު އިބްރާހިމް ޝަރީފް ވިދާޅުވީ، އެމްޑީޕީގެ ކޮންގްރެސްގެ މަންދޫބުންނާއިމެދު ސުވާލު އުފެއްދުމުގެ ޖާގަ ޕާޓީގެ ނައިބް ރައީސަށް ނޯންނާނެކަމަށެވެ. އަދި ޝަރީފް ވަނީ ޝިފާޒަށް ހޫނު ބަހުގެ ހަމަލާތަކެއް ދެއްވާފައެވެ.
މިވާހަކަތަކާއި ގުޅިގެން އެމްޑީޕީގެ ރައީސް މުހައްމަދު ނަޝީދު ވިދާޅުވީ، މި ކޮންގްރެސްގައި ބައިވެރިވާ ގިނަ ގޮފިތަކަކީ ސައްޚަނޫން ގޮފިތަކެއްކަން ގިނަ ބަޔަކަށް އެގޭކަމަށެވެ. ނަޝީދު މިހެން ވިދާޅުމާއިއެކު ކޮންގްރެސްގައި ބައިވެރިވެރިންގެ އަޑުގަދަވެ، ހޯލު ތެރޭގައި ވަނީ ނުރުހުން ފާޅުކޮށްފައެވެ.
ރައީސް ނަޝީދުގެ ވާހަކަތައް ކުރިއަށް ނުގެންދެވޭވަރަށް އަޑުގަދަ ކުރުމުން ރިޔާސަތުންވަނީ މެމްބަރުން އަޑު މަޑުކުރުމަށް ތަކުރާރުކޮށް އެދިފައެވެ. ކޮންގްރެސްގައި އަސާސީ ގަވާޢިދަށް ހުށަހެޅިފައިވާ އިސްލާހުތަކާ ގުޅޭގޮތުން ވާހަކަ ދައްކަވަމުން ރައީސް ޞާލިހު ވިދާޅުވީ، އެމްޑީޕީ ހިންގުމުގައި މިހާތަނަށްވެސް ކައުންސިލްތަކަށް އެންމެ އެކަށީގެންވާ ދައުރެއް ދެވިފައި ނުވާކަމަށެވެ. އަދި މިހާރު ހުށަހެޅިފައިވާ އިސްލާހު ތަކުގައިވެސް އެޖާގަ އެންމެ އެކަށީގެންވާ ގޮތަކަށް ދެވިފައިނުވާކަމަށެވެ.
ރައީސް ވިދާޅުވީ އެމްޑީޕީއަކީ ލާމަރުކަޒީ އުސޫލުން އިދާރީ ދާއިރާތައް ހިންގުމަށް އެންމެ ބޮޑަށް އިސްކަމެއްދޭ ޕާޓީއަށްވާއިރު، ރާއްޖޭގެ އެކި ކަންކޮޅުތަކުގައި އިންތިޚާބު ވެފައިވާ އެމްޑީޕީގެ ކައުންސިލްތަކަށް އެމްޑީޕީގެ ޤައުމީ މަޖިލީހާއި، އެމްޑީޕީގެ ކޮންގްރެސްފަދަ ބޮޑެތި ސިޔާސީ ހަރަކާތްތަކުން ޖާގަ ލިބެންޖެހޭކަމަށް ރައީސް ވިދާޅުވިއެވެ. ހުރިހާ ކައުންސިލްތަކަށް އެޖާގަ ނުދެވޭނަމަ ސިޓީ ތަކަށް އެޖާގަ ދީގެން ނަމަވެސް ކައުންސިލްތަކަށް އެމްޑީޕީ ހިންގުމުގެ ފުރުސަތު ލިބެންޖެހޭކަމަށް ރައީސް ވިދާޅުވިއެވެ.
ރައީސް ޞާލިހު ވިދާޅުވީ ޕާޓީގެ ހަރަކާތްތައް ހިންގުމުގައި ޕާތީގެ ގޮފިތަކުގެ ދައުރުވެސް މިހާރަށްވުރެ ބޮޑުކުރަން ޖެހޭކަމަށެވެ. ކޮންމެ ކޮންގްރެސްއަކާއި ގުޅިގެން އިންތިޚާބެއް ބާއްވައިގެން ކޮންގްރެސްގައި ބައިވެރިވާ މީހުން ކަނޑައެޅުމުގެ ބަދަލުގައި ގޮފިތަކުގެ ރައީސުންނަށް އެޖާގަ ދެވޭގޮތަށް އަސާސީ ގަވާއިދަށް އިސްލާހު ގެނައުމަކީވެސް ބޭނުން ތެރި ކަމެއްކަމަށެވެ.
އެމްޑީޕީ ހިންގުމުގައި އެންމެ އިސްކަންދޭންވީ ޕާޓީގެ ގޮފިތައް ހަރުދަނާކޮށް، ހިންގޭނެ ގޮތްތަކެއް ފަހިކުރުމަށް ކަމަށް ރައީސް ވިދާޅުިވިއެވެ.
