ސުކޭޝް ޗަންދުރަޝޭކަރު ކިޔާ ނުފޫޒުު ގަދަ މީހަކާ ހާއްސަ ގުޅުމެއް އުފެދި، މަނީ ލޯންޑަރިންގެ މައްސަލަގަނޑެއްގެ ތެރެއަށް ވެއްޓި، އެކަމުގެ ތުހުމަތުގައި ފުލުހުން ސުވާލު ކޮށްފައިވާ ބޮލީވުޑްގެ ބަތަލާ ޖެކޮލިން ފެނާންޑޭޒް ފިލްމު ތަކަށް ގެންނަން ނުވަތަ ފިލްމު ތަކުގައި ބައިވެރި ކުރުވަން ޕްރޮޑިއުސަރުން ބޭނުން ނުވާ ކަމަށް ޚަބަރުތަށް ބުނެފިއެވެ.
އެ މައްސަލާގައި ސުކޭޝްގެ ފަރާތުން އަގުބޮޑެތި ހަދިޔާތަކެއް ވެސް ލިބިފައިވާ ކަމަށް ތުމަތުކޮށް ނުހައްގުން މުއްސަނދިކަން ހޯދާފައި ވާކަމަށް ބުނެ ޖެކޮލިން ވަނީ އިންޑިއާގެ އެންފޯސްމަންޓް ޑިރެކްޓޮރޭޓް (އީޑީ) އިން އެތައް ފަހަރެއްގެ މަތިން، ސުވާލު ކޮށްފައެވެ.
މި މައްސަލައިގެ ތެރޭގައި އޭނާ ތާށިވެ ކެރިއަރު ނިމިދާނެ ކަމުގެ ކޮޅުމަތި ފެންނަށް ފަށާފައިވާކަމަށް މީޑިއާތަކުން ވަނީ ބުނެފައެވެ. އެގޮތުން އޭނާ ލައްވާ އެއްވެސް ޕްރޮޑިއުސަރެއް މިހާރު ފިލްމު ކުޅުވަން ބޭނުންނުވާ ކަމަށް ޚަބަރުތައް ބުނެއެވެ. އަދި ހަމަ އެހެންމެ މައްސަލަ ގަނޑުން އަރައިގަނެވޭނެ ގޮތެއް ޖެކޮލިންއަކަށް ނުވެއެވެ.
މި މައްސަލައިގެ ސަބަބުން ހިންދީ ސިނަމާއިން ޖެކޮލިން ބޮއިކޮޓް ކުރާނެކަމުގެ އިންޒާރު މިހާރު ވަނީ ދީފައެވެ. އެއްވެސް ޕްރޮޑިއުސަރަކު އޭނާ ލައްވާ އައު ފިލްމަކަށް ސޮއިކުރުވާކަށް މިހާރު ބޭނުމެއްނުވެއެވެ.
މި މައްސަލަގަނޑު ހިލުމުގެ ކުރިން ބައެއް ފިލްމު ތަކަށް އޭނާ ވަނީ ސޮއިކޮށްފައެވެ. އޭގެތެރޭގައި އަކްޝޭ އާއި އެކު ކުޅުނު ފިލްމު "ބައްޗަން ޕާންޑޭ"، "ސަރކަސް" އާއި "ރާމް ސެތޫ" ފަދަ ފިލްމުތައް ހިމެނެއެވެ. ނަމަވެސް ކުރިއަށް އޮތްތާގައި ޖެކޮލިންއަށް ވާނެގޮތެއް ނޭގޭތީ އެއްވެސް މީހަކު އައު ފިލްމެއް އޭނާއަށް ނުދޭކަމަށް އޭނާއާއެކު މަސައްކަތްކޮށްފައިވާ ޕްރޮޑިއުސަރަކު ވަނީ ބުނެފައެވެ.
ސްރީލަންކާއަށް ނިސްބަތްވާ ބަތަލާ، ބޮލީވުޑްގެ އޭ ލިސްޓުގައި ހިމެނޭ މަޝްހޫރު އެކްޓަރުންނާއެކު ގިނަ ފިލްމުތަކެއް ކުޅެފައި ވެއެވެ. އުމުރުން 37 އަހަރުގެ ޖެކޮލިން ބޮލީވުޑަށް ތަޢާރަފުވީ 2009 ވަނަ ރިލީޒްކުރި ހިންދީ ފިލްމު "އަލާއްދީން" އިންނެވެ.
