ގާޒާގައި ދިރިއުޅެމުންދާ ރައްޔިތުންނާއި ދެކޮޅަށް އިސްރާއީލުން ހިންގަމުންދަނީ ބޮޑި ޖަރީމާއެއް ކަމުގައި އަރަބި ލީގުގެ ގާނޫނުހަދާ މަޖިލިސްކަމުގައިވާ އަރަބި ޕާލަމެންޓުން ބުނެފިއެވެ.
5 އަހަރުގެ ކުޑަ ކުއްޖަކުވެސް ހިމެނޭގޮތުން، މިހާތަނަށް 10 މީހަކު ޝަހީދުވެ 55 މީހަކަށް އަނިޔާވެފައިވާ މި އުދުވާންގައި އިސްރާއީލުގެ ހަމަލާތައް އަމާޒު ކުރަމުންދަނީ ދިފާއުވެވޭނެ އެއްވެސް ވަސީލަތެއް ނެތް އާންމު ރަޔިތުންނަށް ކަމުގައި އަރަބި ޕާރލަމެންޓުން ނެރުނު ބަޔާނެއްގައި ވިދާޅުވެފައިވާކަމަށް ސައުދީ ޕްރެސް އޭޖެންސީން ރިޕޯޓު ކޮށްފައި ވެއެވެ.
އަރަބި ޕާރލަމެންޓުން ނެރެފައިވާ މި ނަޔާނުގައި ތުހުމަތު ކޮށްފައިވަނީ، މިހާރު އުފެދިފައިވާ ހަމަނުޖެހުންތައް އުފެދިގެން ގޮސްފައިވަނީ ފަލަސްތީނުގެ ބިންތައް ހިފައިގެންތިބި އޮސްރާއީލުގެ ބާރުތަކުން ފަލަސްތީނުގެ ގާޒާއަށް ބޮން އަޅަން ފެށުމުގެ ސަބަބުން ކަމުގައެވެ.
"މި ހަމަލާތަކަކީ ބައިނަލްއަގިވާމީ ގާނޫނުތަކާއި ޚިލާފަށް އަދި ޔޫއެންގެ ޗާޓަރާއި ކޮންވެންޝަންތަކާއި ޓްރީޓީތަކާއި، އިންސާނީ ހައްގުތައް ހިމާޔަތް ކުރުމަށް ފާސްކޮށްފައިވާ ރިޒޮލިއުޝަންތަކާވެސް ޚިލާފަށް ހިންގަމުންދާ އުދުވާންއެއް،" އަރަބި ޕާލަމެންޓުގެ ބަޔާނުގައި ވިދާޅުވެފައި ވެއެވެ.
އަދި މިބަޔާނުގައިވަނީ އިސްރާއީލުން ފަލަސްތީނުގެ ރައްޔިތުންނާއި ދެކޮޅަށް ހިންގަމުންދާ އުދުވާން ހުއްޓުވާ ދިނުމަށް ބައިނަލްއަގުވާމީ ފަރާތްތަކަށް ގޮވާލާފައެވެ.
އިސްރާއީލު އުދުވާންއާއި ދެކޮޅަށް ފަލަސްތީނުގެ މިނިވަންކަމަށް ހަގުރާމަ ކުރަމުންދާ ޖަމާއަތްތައްކުން މިހަފްތާގެ ހުކުރުދުވަހު ވަނީ ރޮކެޓް ހަމަލާތައް ފޮނުވާލާފައެވެ.
ގާޒާގައި ވެރިކަން ކުރަމުންދާ ހަމާސް ޖަމާއަތާއި އެއް އުސޫލުތަކެއް ގަބޫލުކުރާ އިސްލާމިކް ޖިހާދުން ބުނެފައިވަނީ އިސްރާއީލުގެ އުދުވާނީ ހަމަލާތަކުގެ ރައްދުގައި އެ ޖަމާއަތުން 100 ރޮކެޓް ހަމަލާ އިސްރާއީލަށް އަމާޒު ކޮށްފައި ވާކަމުގައެވެ.
އިސްރާއީލުން ބުނެފައިވަނީ، އިސްލާމިކް ޖިހާދު ޖަމާއަތާއި ދެކޮޅަށް ދެމުންދާ ހަމަލާތައް ހޮނިހިރު ދުވަހު އިތުރަށް ފުޅާކޮށްފައި ވާކަމަށާއި، ހިފާފައިވާ ހުޅަނގު އައްސޭރީގައި އިސްލާމިކް ޖިހާދު ޖަމާއަތުގެ 19 ހަގުރާމަވެރިއަކު ހައްޔަރު ކޮށްފައިވާ ކަމުގައެވެ. އަދި އިތުރު ހަމަލާތައް ގާޒާގައި ހަރަކާތްތެރި ވަމުންދާ ހަނގުރާމަވެރިންގެ އަމާޒުތަކަށް ދީފައިވާ ކަމުގައެވެ.
