ސައްޚަނޫން އިންޓެލް ރިޕޯޓަކަށް ބަރޯސާވެ މީހެއްގެ މިނިވަންކަން ނަގައި ނުލެވޭނެ ކަމުގައި ދީނީ އިލްމުވެރިޔާ ޑރ.މުހައްމަދު އިޔާޒު ވިދާޅުވެއްޖެއެވެ.
ޑރ.އިޔާޒު މިހެން ވިދާޅުވީ ޔޯގާ ދުވަހުގެ އިވެންޓް ހުއްޓުވަން ގަލޮޅު ދަނޑަށް ވަދެގަނެ ހަމަނުޖެހުން ހިންގި މައްސަލާގައި ހައްޔަރުކޮށްފައިވާ ޝައިޚް އާދަމް ނިޝާނާ ދެކޮޅަށް ފުލުހުން ހުށަހަޅާފައިވާ އިންޓެލިޖެންސް ރިޕޯޓްގައި ހައްސާސް މައުލޫމާތުތަކެއް ހިމެނޭ ކަމަށް ކްރިމިނަލް ކޯޓުގައި ބުނެ ދެއްކި ވާހަތަކާއި ގުޅިގެން ކުރެއްވި ޓުވީޓެއްގައެވެ.
ޑރ.އިޔާޒު ވިދާޅުވީ ފުލުހުންގެ އިންޓެލް ރިޕޯޓަކީ މީގެ ކުރިންވެސް އެކި ހާލަތްތަކުގައި އެކި ގޮތަށް ތައްޔާރު ކޮށްފައިވާ ރިޕޯޓުތަކެއް ކަމަށެވެ. ވަކި މައްސަލައަކަށް މިސާލު ނަންގަވަމުން އިޔާޒު ވިދާޅުވީ ކާނަލް ނާޒިމްގެ ގެއިން ފިސްތޯލައެއް ފެނުނު ކަމަށްވެސް ބުނާ މައްސަލަގައިވެސް ފުލުހުން އިންޓެލް ރިޕޯޓެއް ތައްޔާރު ކުރިކަމަށެވެ. ނަމަވެސް އެއީވެސް އެއްވެސް އިތުބާރެއް ރިޕޯޓަކަށް ވެފައިވާކަމަށެވެ.
ހަމަ އެފަދައިން ޝައިޚު ނިޝާނާއި ދެކޮޅަށްވެސް ފުލުހުން ތައްޔާރު ކޮށްގެން އުޅޭކަމަށް ބުނާ ރިޕޯޓަކީ ރަނގަޅު މައުލޫމާތުތަކެއް ހުރި ރިޕޯޓެއް ނޫންކަމަށް ޑރ.އިޔާޒު ވިދާޅުވިއެވެ. އަދި މިގޮތަށް އިންޓެލް ރިޕޯޓަކަށް ބަރޯސާވެ މީހާގެ މުޅި ދިރިއުޅުން ނަގާލުމަކީ ބަލައި ގަނަވޭނެ ކަމެއްނޫންކަމަށް ޑރ.އިޔާޒު ވިދާޅުވިއެވެ.
ޝައިޚް ދަންނަ އެއްވެސް މީހަކިނޤަބޫލެއް ނުކުރާނެ ހަމަނުޖެހުމަކަށް ހިތްވަރު ދެއްވަފާނެ ކަމަކަށް. ފުލުހުންގެ އިންޓެލް ރިޕޯޓުގައިވަނީ ރަގަޅު މަޢުލޫމާތެއް ނޫން. އެއީ ނާޒިމްގެ އެޕާންޓްމަންޓުގައި ފިސްތޯލައެއް އޮތްކަމަށް ބުނެ ދޮގު ރިޕޯޓް ހެދި ބަޔެއް. ހިސްޓަރީވެސް އެބައޮތް. ވީމާ، އިންޓެލް ރިޕޯޓަކަށް ބަރޯސާވެގެން މީހެއްގެ މިނިވަންކަން ނަގާލުމަކީ ވަރަށް ދަށުދަރަޖައިގެ ޢަމަލެއް.
– ޑރ.އިޔާޒު ވިދާޅުވިއެވެ.
ނިޝާން ހައްޔަރުކުރިތާ އިއްޔެއަށް 42 ދުވަސް ވެފައި ވަނިކޮށް ބަންދަށް އިތުރު ތިން ދުވަސް ދީ ކޯޓުން ނެރުނު އަމުރުގައި ގާޒީ މުހައްމަދު މިސްބާހް ވިދާޅުވެފައިވާ ގޮތުގައި އާންމު އުސޫލަކީ ހެއްކެއްގެ ގޮތުގައި އިންޓެލިޖެންސް ރިޕޯޓް ބަލައިނުގަތުން ކަމަށް ވިޔަސް މި މައްސަލާގައި އެއަށް ރިއާޔަތްކުރަން ޖެހެނީ ނިޝާންގެ ބަންދު އިތުރު ކުރުމަށް، ޓެރަރިޒަމް މަނާކުރުމުގެ ގާނޫނުގެ ދަށުން އެދިފައި ވާތީކަމަށެވެ.
ޓެރަރިޒަމް މަނާކުރުމުގެ ގާނޫނުގައި ބުނަނީ އެ ގާނޫނުގެ ދަށުން ތުހުމަތުކުރާ މައްސަލަތަކުގައި އިންޓެލިޖެންސް މައުލޫމާތަކީ ހެއްކެއްގެ ދަރަޖައިގެ، ސާބިތުކުރުމުގެ ވަސީލަތެއް ކަމުގައި ބަލަންޖެހޭނެ ކަމަށެވެ. އަމުރުގައިވާ ގޮތުން ނިޝާންގެ މައްޗަށް ތުހުމަތުކޮށްފައިވާ މައްސަލައިގެ ބާވަތްތަކުގެ ތެރޭގައި ޓެރަރިޒަމްގެ އިތުރުން ބިރު ދެއްކުން، ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގުން، މާރާމާރީ، މުދަލަށް ގެއްލުން ދިނުން އަދި ހުއްދަނޫން ތަނަކަށް ވަނުން ހިމެނެއެވެ. އަމުރުގައި ބުނެފައިވަނީ ނިޝާންގެ މައްޗަށް ތުހުމަތުކުރާ ކުށް ކުރިކަށް ބެލެވޭ މިންވަރުގެ ހެކި ފުލުހުން ހުށަހަޅާފައިވާ ކަމަށެވެ.
