މުއިމިނުންނަކީ ފޭރާމެއްގެ ރޮދިތަކެއްފަދަ ބައެއް ކަމަށާއި، އެއީ ވަރަށް ގިނަ ގޮތްގޮތުން އެކަކު އަނެކަކާއި ގުޅި ލާމެހިފައިވާ ބައެއް ކަމުގައި މިއަދު ހުކުރު ޚުތުބާގައި ވިދާޅުވެއްޖެއެވެ.
"އިސްލާމީ އަޚްވަންތަކަން" މި މައުޟޫއުގެ މައްޗަށް ޚާއްސަ ކުރެވިގެންދިޔަ މިއަދުގެ ހުކުރު ޚުތުބާގައި ބަޔާން ކޮށްފައިވާ ގޮތުގައި އިސްލާމީ މުޖުތަމަޢުގެ އަފްރާދުން ވާންޖެހޭނީ އެއް ހަށިގަޑެއްފަދަ، އެކުވެރި ބަޔަކު ކަމުގައެވެ. އެއްބަޔަކު އަނެއް ބަޔަކަށް އެހީތެރިވުމާއި، ހެޔިކޮށް ހިތުމުގައެވެ. އެކަކު އަނެކަކުގެ ހާލު ބެލުމާއި އެކަކު އަނެކަކަށް އަޅާލާއި އޯގާތެރި ވުމުގައެވެ.
އަދި މީގެ އިތުރު، ދުނިޔޭގެ ކަންކޮޅުތަކުގައި ނިކަމެތި ހާލުގައި ޖެހިފައިވާ އަޚުންނާއި އުޚުތުންގެ މަތިން ހަނދާންކުރުމަށް އިލްތިމާސް ކުރަމުން، އެމީހުންނަށް ހެޔޮ ދުއާކޮށް އިހުސާންތެރި ވުމަށްވެސް ޚުތުބާގައި ވަނީ ނަސޭހަތްތެރި ވެފައެވެ.
ޚުތުބާގައި ވިދާޅުވެފައިވާ ގޮތުގައި ކޮންމެ މުސްލިމަކީވެސް އިސްލާމި އުޚުއްވަތްތެރިކަމުގެ ހަށުގަޑުގައި ހިމެނޭ، އެއާއި ވަކި ނުކުރެވޭނޭ ގުނަވަނެކެވެ.
އެ ހަށިގަޑު އުފުލާންޖެހޭ ކޮންމެ ތަކްލީފަކާއި ކޮންމެ ވޭނެއް، އެ ހަށިގަޑުގެ ހުރިހާ ގުނަވަންތަކެއް ހިއްސާ ކުރަންޖެހެއެވެ. މިއީ މުސްލިމުންގެ މިސާލެވެ. މުސްލިމުންގެ މެދުގައި އޮންނަންޖެހޭ އެއްބަޑު އެއްބަފާކަމެވެ.
ހުކުރު ޚުތުބާގައި ވިދާޅުވެފައި ވެއެވެ.
މިއަދުގެ ޚުތުބާގައި ބަޔާން ކުރައްވާފައިވާ ގޮތުގައި، ކޮންމެ މީހަކުވެސް އަނެކުންނާއި އަޅާލާ އިޙުސާންތެރި ވުމަކީ، އޭނާގެ މައްޗަށްވާ ދީނީ ވާޖިބެކެވެ.
ޚުތުބާގައި ވިދާޅުވެފައިވާ ގޮތުގައި، މުއްސަދީން ނިކަމެތި ފަގީރުންނަށް މާލީ އެހީތެރިކަން ފޯރުކޮށް ދިނުމާއި، އެމިހުންގެ މުހުތާދުތައް ފުއްދަވައި ދިނުމާއި، އާރާއި ބާރުހުރި މީހުންނާއި މަތީ މަގާމްތަކުގެ ވެރީން، އަނިޔާ ލިބެމުންދާ މީހުންގެ އަތުގައި ހިފައިގެން އިންސާފު ހޯދާދޭން މަސައްކަތް ކުރުމަކީވެސް އެއް މުސްލިމަކު އަނެއް މުސްލިމަކަށް އެހީތެރި ވެދިނުމުގެ ގޮތުން ކުރެވިދާނޭ ކަންކަމުގެ ތެރޭގައި ހިމެނޭ ކަންކަމެވެ.
